Tawang-ah Hmarchhak state pariata naupang dikna leh chanvo humhalh pawl intawhkhawm

Aizawl | Aug 4, 2026: Hmarchhak state pariata naupang dikna leh chanvo humhalh pawl North East State Commission for Protection of Child Rights (N-E SCPCR) chuan July ni 31 leh August ni, 2026 khan Tawang, Arunachal Pradesh-ah ni hnih awh intawhkhawm hun an hmang a, Mizoram State Commission for Protection of Child Rights (MSCPCR) Chairperson, Commission Member leh Commission Secretary-te bakah thawktu thahnem tak an kal khawm a. He intawhkhawm hi Arunachal Pradesh State Commission for Protection of Child Rights (APSCPCR) in a thleng a ni.

He intawhkhawm hi Arunachal Pradesh Chief Minister, Pema Khandu chuan khuallian niin a hmanpui a, a tawp niah zanriah a buatsaih sak a. Pu Mutchu Mithi, Adviser to CM (Home Affairs leh Education) chu khual zahawm a ni a. A ni hian chaw chhun (lunch) a buatsaih sak bawk a. Minister Dasangha Pul i/c WCD, Cultural Affairs and Science & Technology pawhin sawm bik (special invitees) a nih angin a telpui bawk.

He intawhkhawmah hian State Commission for Protection of Child Rights bakah naupang khaihhnawih department thenkhat-Police, Social Welfare Dept., Women and Child Development Dept., Anganwadi Center, Juvenile Justice Board(JJB), Child Welfare Committee (CWC) te pawh sawm an nih angin an tel tha hle bawk. Tin, cultural troupe pawhin an hnam lam te entirin a hawnna leh kharna programme pawimawhah an telpui bawk.

Two-Day Regional Convention on Child Rights-ah hian naupang kaihhnawh thupui pawimawh zual thlan bik atangin state tinin presentation an nei a, chumi hnuah sawihona neih leh thin a ni. Chung thupuite chu- (1) Strengthening Child Protection System under the POCSO Act and the Juvenile Justice (Care and Protection of Children) Act, 2015. (2) Ensuring Inclusive, Safe and Quality Education for Every Child as Mandated under the Right of Children in Free and Compulsory Education Act, 2009. (3) Child Trafficking, Child labour and Emerging Child Protection Challenges. (4) Cyber Safety, Community Based Child Protection and Children Participation. (5) Emerging Child Rights Issues and Best practices in the North eastern States. (6) Strengthening SCPCR through Regional Institutional Reforms.

Heng presentation-ah hian Mizoram aiawha kal Chairperson Jimmy Laltlanmawia, Member R Laltanpuia leh Darthakunga, Member Secretary Lalremruati leh Legal Priscilla Lallawmsangi, Officer ten thu an sawi theuh bawk.

North East State Commission for Protection of Child Rights (N-E SCPCR) puala ni hnih awh intawhkhawm buatsaihtu leh thlengtu Arunachal Pradesh hian a thleng hneh hle mai a. State pasarih (7) atanga palai kal te sum sen zawng zawng hi a tum vek a, Hotel riah man mai bakah tualchhung veivahna zawng zawng bakah Tawang khawpui leh a chhehvel tourist spot tlawhna zawk zawng senso pawh a tum sak vek bawk a. Hetiang intawhkhawm hi a vawikhatna a nih bawk avangin kalkhawm ten nuam an ti hle a.

He convention-ah hian Central sorkar (National Commission for Protection of Child Rights) in a ngaihtuah zui atan rawtna “Tawang Declaration on Child Rights” point 31 lai siam ni a, hmarchhak biala naupangte, a bikin Child Trafficking leh Cyber Crime laka hmalakan turte leh India ram pumpuia Child Rights lama thawktute dinhmun chungchangte leh North East-a naupangte laka hleihlenna leh pawikhawihna laka a theih ang leh tul dan a zira thawho zuina tur thu an rel a ni.

Arunachal Pradesh hi tourism-ah nasa takin hma a sawn a. Inkhawmpui neihna hmun Tawang khawpui phei chu khawvel hriat khawpa khualzin tamna tia sawi theih hial khawpin a lar a. Intawhkhawm tumah pawh hian ni khat tawp chu tourist spot tlawh nan programme siam a ni a. Bumla (Indo-China boarder, feet 15200 a sang a ni a, mi tam tak tan chuan oxygen keng lova kal chi a ni lo) te, P T So Lake te, Tawang Monastery te tlawh a ni. Heng bakah hian khualzin te tana tlawh ngei ngei tur Tawang panna kawngah hian hmun pawimawh leh nuam tak tak a awm nual a, chung zinga tlawh hlawh pawl te chu Jang Water fall, Baisakhi (feet 11246), Sela Tunnel (feet 13000) leh Bomdila-te an ni.