PWD Minister Vanlalhlana’n Ngaizel lung tlakna thin a Sorkar hmalakna a enfiah

AIZAWL | August 19, 2026: PWD Minister Vanlalhlana chuan vawiin chawhnu dar 2:00 khan Ngaizel lung tla thin laka kawngpui âna awm te leh kawngpui zawhtu mipui leh lirthei te an him zawk nan a, ADDMA, PWD, G&M ten lung tla mai thei tur an karthlak (Scaling) zawh tawh te leh lung tla te direct taka kawngpuia an tlak lohna tura kopang/kham tuam hna “draping” an thawh te a enfiah.

Kumin July ni 8 &9 khan Ngaizel Petrol pump bulah lung leh leivung nasa takin a tla leh, heng lung leh leivung tla thenfai hna hi JCB(Backhoe Loader) –Pahnih(2) leh Tipper sawmli(40) hmanga thawh nghal zung zung a ni a. Leivung leh Lung tla hnawk zualpui chu 12th - 14th August, 2026 khan then zawh a ni a. Lung lian zualpui engemaw zah la awm te erawh chu khawl (Rockbreaker) nena chhut keha thiar chhuah an ngaih dawn avangin kawng zau laiah hnawl tawm an ni a, thiar chhuah hna hi kalpui leh thuai turin PWD lam chuan hma a la mek zel a ni.Hnathawktu leh mipui te tan a him zawk nan Ngaizel kawng hi hun enge maw chen khar a nih hnuah,mipui hman theih turin 14th August, 2026 tlai khan hawn leh a ni.

Minister Pu Vanlalhlana chuan Ngaizel kawngpui zawhtu mipui leh lirthei te bakah kawngpui âna cheng te an lo him zawk nana theitawp chhuah a, chhun leh zan pawh sawi lova thawk thintu ADDMA, Geology & Mining Dept., QRT, Traffic Police te bakah Local council te chungah lawmthu ka sawi tak meuh a ni, a ti.Tuna “Green Draping HDPE” aia tha zawk leh tlo zawk tur “Shotcrete” hmanga lungtla te venna tur Shotcreting Machine(wire mesh a tuama, cement, balu,etc. chawhpawlh a phuhna khawl) leina turin PWD lamin proposal te siamin, Shotcreting Machine leina tur hian Quotation koh mek a ni a, estimate nen an la submit thuai dawn a ni, a ti bawk.

Tuna Ngaizel kham tuam( Draped) nana hman hi Green Draping HDPE(High Density Poly Ethylene) a ni a, Ruah leh nisa laka leilung a ven bakah, leivung leh lung lian lutuk lo chu dang zo tura beisei a ni a. Tunah Mizorama vawikhat hmanna anih avangin,a daih rei zawng tur kum erawh an sawi thei loh thu,G&M Geologist ten sawiin, Trial stage-ah kan la awm mek a ni, an ti. Ngaizel kham/kopang tuam nan hian Green Draping HDPE roll 13 hman niin,cheng nuai ₹19 sen a ni. He Green Draping HDPE hi ADDMA (Aizawl District Disaster Management Authority) in a lei a ni a. Bawrhsap leh Chairman ADDMA ni bawk Er. Lalhriatpuia kaihhruaina hnuaia hian ADDMA hian Aizawl district chhunga khuarel chhiatna a thlen chuan rang takin Emergency meeting te neiin, hmalak tul ang ang te an bawhzui nghal zung zung thin a ni.

Kum 10 kal ta chhung khan Ngaizel lungtla a vang hian mi 3 in nunna lo chan tawhin, Lirthei ke 2 leh ke 4 nei chi, avaiin 16 a lo del chhe tawh a, hliam tuar 8 an awm tawh bakah Kawngpui ân a awm In te a lo delchhe nual tawh a ni.

Vawiin Ngaizel a tlawhnaah Minister hi ADDMA, G&M Dept., QRT leh PWD official ten an tawiawm a ni.