MZP-in MPSC siamthat hnatlang nei leh, naktukah pawh chhunzawm tum!

Aizawl | August 11, 2026: Mizo Zirlai Pawl (MZP) chuan MPSC siamthat hnatlang nei lehin MPSC Chairman leh Secretary bakah Officer leh staff te pisa kai tur an dang chhunzawm a. MZP hian, naktuk August 12-ah pawh a ngai anga dan chhunzawm an tum.

Vawiin tlai dar 3:50 hnu lam khan MZP chuan thuchhuah siamin, "MPSC leh Sawrkar thuneitute atanga inbiakna engmah ala awm loh avangin, naktuk hian a hun leh leh hmun ngaiah MPSC Pisa kai tur hi dan leh tur a ni. Zirlai leh thalai hnazawng mekte he hunah hian kal leh vek turin kan in sawm tak meuh meuh e," tiin zirlaite an sawm.

MZP chuan an thil phutte tih hlawhthlin a ni hma loh chu tiam chin awm lo a lungawilohna lantir chhunzawn an tum thu an sawi a, Police ten tharum thawhna an lantir leh MPSC Chairman leh Secretary bakah Officer leh staff ten Police tha chakna hmanga zirlai mahni dikna chanvo phut a an pal lui duh chu an dem takzet tih thuchhuah siamin an sawi a ni.

MZP thil phut te:

1. Mizoram Public Service Commission (MPSC) kalphung siamthat vek ni rawh se, sorkarin reform committee/commission din rawh se: Hemi chungchang hi Chief Minister zahawm tam DP&AR changtu ni bawk hnenah ziakin kan thlen a, MPSC siamtha a thuamchak tur leh kalphung tha zawk leh felfai zawk a awm theih nan sorkarin hma min laksak vat kan beisei a, siamtha tura Reform Committee/Commisison min din sak ngei kan beisei a ni.

2. One Time Registration (OTR) chungchang: OTR hi Union Public Service Commission (UPSC) pawhin a lo hmang tawh thin a, mahse eng eng emaw harsatna avangin Universal Registration Number (URN) hmangin an lo thlak tawh a. MPSC in OTR a hman tan June 2025 atang khan aspirants tam takin vawiin thlengin harsatna an tawk a. Tin OTR pawh MZP te leh mi dang dang rawtna avang hian a form tlema thlak danglam ni mahse ala famkim tawklo a, OTR hi hman tlak a nih hma chuan tih tawpa need based specific application form siam ngei nise kan duh a ni.

3. OTR felfailoh avanga document upload kimlo te Offline-a document te thehluhna hun siamsak ni rawh se: OTR felfailoh avanga aspirants tam takin exam pawh hmachhawn lo a education qualification a tling vek si, application an submit zawh veleh a tlinglo tam tak awm nghal ringawt thin hi a fairlo takzet a, OTR changtlun tawk loh vang leh a changtlun tawk lohna ang anga MPSC atanga OTR hman dan tur instruction mumal tak a awm loh vanga thil thleng a nih angin Candidate harsatna tawk leh mai turte chu offline-a document submit na hun siamsak ngei se kan duh a ni.

4. Written exam-a tling tawh, OTR felfailoh avanga a document upload kim lo reject tawh te tan offline a document submit na hun siam sak ni rawh se: A chunga sawilan tak case ang thoin applicants tam tak written exam nei vek tawh, in ziak tling te pawh OTR-a document an upload kimloh avanga Personal interview nei theilo tura tlinglo leh reject leh tam tak an awm a, heng mite written exam a tling tawh personal interview la hmachhawn lo te hi an interview hma ngeia offline-a document submit tir a, chance pe leh ngei turin kan ngen a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]