Mualthuam N tleirawl H Ramdinpuii thiin hmu! - CM, Education Minister, MZP, MHIP leh pawl hrang hrangin sunna thuchhuah an siam

Aizawl | August 5, 2026: Mualṭhuam 'N' tleirawl H Ramdinpuii (K-15), August 3 zan aṭanga bo chu tukin August 5, 2026 chawhma dar 10:00 khan, Mualṭhuam N Middle School hnungah thiin hmuh a ni.

H Ramdinpuii d/o H Lalawmpuia hi kum 15 niin, pawl 10 zirlai a ni a, August 3, 2026 zan dar 8:00 aṭang khan a bo ṭan a. A chin an hriat mai theihloh avangin uluk takin khawchhungah a chhungkhat ten an zawng a, hmuh mai a ni lo.

Hemi hnu hian khawtlang punin zawn ṭan tak tak a ni a, YMA hmalaknain ruahmanna pawh siam a ni. Zan lam thlengin a theih ang anga ngaihven zui a ni a. Tukin August 5, 2026 chawhma dar 10:00 khan, Mualṭhuam N Middle School hnungah thiin hmuh a ni.

A khuaa mite sawi danin, nimin lamah Middle School ah hian school naupang te pawh an kal a. Tin, uluk taka khawchhungah hian zawn tawh niin, Middle school bul vel pawh hi a zawngtuten an dap tho niin an sawi a. Ram lama in zawn nghal tawp aiah, mi tlawmngai ṭhenkhatten middle school leh a chhehvel an han hrut nawn leh a. Langsar taka school aṭanga hmuh mai theihah alo awm reng a ni.

A ruang hmu hmasatu te sawi dan hian a hrawk leh awm bawrah hian hliam hnuhma ni awm tak a awm thu an sawi a. A bo ni a a thawmhnaw pawh ṭha takin alo la ha vek bawk a ni.

Ramdinpuii hi tleirawl hrisel leh ruihhlo a fihlim, Ngaihzawng ngaihsak nachang pawh hrelo, nu leh pa thuawih, Kohhran lam ngaihsak mi a ni.

Lunglei Police Station lam hriattir an ni tawh a. Annin a ṭul angin hma an la zawm thuai ang.

MZP Headquarters Lunglei chuan, Lunglei District huam chhunga Zirna In zawng zawngah kan zirlai pui H. Ramdinpuii sunna hun hmang theuh turin an ngen.

Chief Minister Lalduhoma, Education Minister Dr Vanlalthlana, MZP, SSU, MHIP leh pawl hrang hrangin sunna thuchhuah an siam

H RAMDINPUII SUNNA THUCHHUAH HRANG HRANG:

Chief Minister Lalduhoma

Mualthuam North nula H Ramdinpuii (D/o H. Lalawmpuia) chu thia hmuh a nih thu leh misual kut tuara thi nia a lan thu ka lo hria a. Ka rilru a nain ka lainat hle mai. A kalsan tak amah hmangaihtute Pathianin thlamuan lul rawh se.

He thila mawhphurtu(te) hi hriat chhuah lohvin an awm tur a ni lo va, an phu tawk hremna an hmu ngei tur a ni. Thil sual titu hriatchhuah a nih theih nan mipuite tangrual ila, kan police-te tha i tichak ang u.

Mizoram hmun tinah hian kan tu leh fate, hmeichhia leh naupangte hi an him tur a ni.

Education Minister Dr Vanlalthlana

Mualthuam North tleirawl duhawm tak leh hma hun eng tak H. Ramdinpuii kum 15, D/o H. Lalawmpuia chunga thil thleng chungchang ka lo hriat khan min barakhaih hle mai a. Zirlai duhawm, Pawl 10 zir mek, mi dang pawisawi lo leh chhungte inngahna la ni chho mai turin mi kut tuar ni ngeia hriat leh rawng taka a tual thihna hi a pawi ka tiin Ramdinpuii chhungte zawng zawng thinlung takin ka tawrhpui a. He thil duhawm loh tak titu hi man chhuah a nih ngei theih nan leh a phu tawk ang ngeia hremna na tak a chungah lek a nih theih nan Mizoram sawrkar chuan theihtawp a chhuah dawn a ni.

Ramdinpuii’n a kalsan tak a chhungte zawng zawng chungah Pathian thlamuanna lo awm se la, an lusunnate Lalpan lo chhawk zel se, Zoram mipuite pawhin an chhungkaw tan thlamuanna i dilsak theuh ang u.

MZP General Headquarters, Aizawl

SUNNA

Mizo Zirlai Pawl (MZP) General Headquarters chuan Mualṭhuam ‘N’ a kan zirlaipui H. Ramdinpuii (k-15) D/o H Lalawmpuia pawl - 10 zirlai chu, vawiin August 5, 2026 chawhma dar 10:00 khan Mualṭhuam ‘N' Middle School hnungah thi a hmuh a ni hi pawi a tiin, hriatthiam har a ti hle a ni.

Hetianga zirlai duhawm leh midang pawi sawi lo, hma hun eng tak nei, mi kut tuar ngei nia hriat, a tualthi hi MZP General Headquarters chuan pawi kan tiin, a lungchhiatthlak hle a ni.

Kan zirlaipui laka hetiang thil thleng hi kan en liam mai mai dawnlo a, Dan leh thupek kengkhawhtute’n uluk taka chhui zui a, pawi khawihtu hi zawng chhuak ngei tur leh a nà thei ang bera hremna pe ngei turin MZP chuan a phût tlat a ni. A kalsan tak a chhungkhat lainate MZP GHQ chuan a tawrhpui takzet a ni.

Dated Aizawl the 5th August, 2026

Issued by: Mizo Zirlai Pawl, GHQ, Aizawl

MIZO ZIRLAI PAWL

HEADQUARTERS:LUNGLEI

PRESS RELEASE

PR.No.7 of 2026-2028

MUALTHUAM NORTH ZIRLAI NAUPANG TUAL THIH CHUNGCHANG

Ni 3 August, 2026 (Thawhtanni) atanga chin hriat loha bo H. Ramdinpuii (K-15) d/o H. Lalawmpuia Mualthuam ‘N’ ni 5 August, 2026 (Nilaini) chawhma dar 10:00 a Mualthuam ‘N’ Middle School hnunga a ruang chhar a ni chu MZP Hqrs.:Lunglei chuan pawi a ti hle a, kan zirlai pui chunga hetianga thihna a thleng ta mai hi hriatthiam har kan tiin pawi khawihtu hi a rang thei ang ber a man anih theihna atan thuneitute a ngen nghal bawk a ni.

Mizo Zirlai Pawl Headquarters:Lunglei chuan pawi khawihtu hi a na thei ang ber a hremna a hmuh theihna atan a tul dan apiangin hmalak chhunzawm zel a tum a, thuneitute puih theihna a awm anih chuan theihtawp chhuah a puih zel a inhuam bawk a ni.

Lunglei District huam chhunga Zirna In zawng zawngah kan zirlai pui H. Ramdinpuii sunna hun hmang theuh turin MZP Hqrs.:Lunglei chuan a ngen bawk a ni.

H. Ramdinpuii’n a kalsan tak a chhungte MZP Hqrs.:Lunglei chuan a tuarpui tak zet a, he thihna a a pawi khawihtu man chhuah ngei a nih theihna atan MZP Hqrs.:Lunglei chuan a tawp thlengin hma a lak chhunzawm zel dawn a ni.

Dated Lunglei the 5th August, 2026

Issued by-Mizo Zirlai Pawl Headquarters, Lunglei

Students' Self - Support Union (SSU) General Headquarters, Aizawl

PRESS RELEASE LETTER

NO.SSU GHQ 2025-2027|A/21

Date 05/08/2026

Students' Self - Support Union (SSU) General Headquarters chuan Dt 03/08/2026 a bo, Mualṭhuam ‘N’ tleirawl fel tak mai, Ramdinpuii (k-15) pawl - 10 zirlai chu, Tukin 05/08/2026 chawhma dar 10:00 a, Mualṭhuam ‘N' Middle School hnung a Boral a chhar ani ta mai chu SSU General Headquarter hriatthiam har a ti hle a ni.

Hetianga zirlai duhawm tak leh pawi sawi lo, hmahun engtak nei, a tualthi hi SSU General Headquarters chuan nà a ti tak zet a. Dan leh thupek kengkhawhtute’n uluk taka chhui zui a, pawi khawihtu hi zawng chhuak ngei turin leh a nà thei ang bera hremna pe ngei turin SSU chuan a phût tlat ani, tun hnu ah tiang thil duhawmlo hi thleng tawh lo se a ti a, a kal san tak a chhungkhat lainate SSU GHQ-chuan a tawrh pui tak zet ani.

Sd/-

Jacob Lalduhkima

Secretary General

MHIP