MPSC CHHANNA CHUNGCHANGA MZP NGAIHDAN LEH HRILHFIAHNA

Mizo Zirlai Pawl (MZP) chuan MPSC zahawmna humhim a nih theihna turin MPSC-in Online Portal thar 2.0 hmanga nikum 2025 June thla atanga hna a lak hrang hrangah, Candidate ten harsatna an tawh changin MPSC-ah lengin chinfel a nih theihna turte, Candidate te buaina tawh zinga langsar tak One Time Registration (OTR) system chu rinrawla neih ngam chi a nih rih loh zia te, MPSC Online Portal chu tihchangtlun a ngaih zia leh tihchangtlun a ngaihna point hrang hrangte thlen in hma alo la thin a.

MPSC thuneitute Chairman leh Secretary ho ngei a Online Portal thar 2.0 en hovin Demonstration te pawh en ho alo ni tawh bawk a ni. MPSC Online Portal thar chuan hmasawnna tur tam tak a neih zia hmuh a ni a. OTR a Candidate te Document upload pawh duh anga alo capture thin loh avangin Document check mumal awm lovin Candidate Valid List tarchhuah a nita mai thin a, Written result chhuah vek tawh leh Interview tura koh tawh te pawh OTR a document upload kim loh avangin reject an nih phah ta thin a ni.

Online Portal thar hian Candidate Valid List tarchhuah dawnin document a tla leh tla lo alo capture anga Document upload kim lo te chu alo reject thei tura ngaih a ni, OTR hian chutiang anga hna a thawh tak siloh avang leh System a fail tak avanga Valid list a lang vek, Written Exam vek tawh leh Interview tura koh hial tawh te pawh Interview tura koh turte Document chauh manual a check a nih hnuin, Document upload kim loh avangin Reject an ni leh ta thin a ni.

Tin, Online Portal thar 2.0 hman a nih dawn hian tuna Candidate te harsatna tawh zinga langsar ber pawl OTR a document upload kim loh avanga Reject te reject chhan tur Instruction mumal leh falfai tak MPSC atanga chhuah a nilo hrim hrim a ni. Slot pakhat-ah Document pakhat upload theihna siam a ni a, Slot tlemte bakah Others awmin Slot a document upload bak zawng chu Others ah PDF a compile in upload vek tur tih emaw Others ah Document dang chu upload tur tih Instruction awm si lovin Others a Document upload kim lo te chu Valid list a an lan hnu, Written Exam an pek hnu, Written result a chhuah hnu-ah Interview tura koh tawh te pawh document upload kim loh chhuanlam hian reject an ni leh ta thin a ni.

Heihi MZP chuan reject chhan tlingah a ngailo a, Online Portal famkim tawk loh avanga Candidate te tawrh tir leh daih si hi MZP chuan dik theiah a ngai lova, MPSC Online portal that tawk loh vang leh a that tawk lohna ang anga MPSC in Instruction mumal tak a pek bawk siloh avangin MPSC thiam loh liau liau-ah MZP chuan a ngai a, Candidate te harsatna chu chinfel sak ngei tur leh MPSC chu an tih dik tawk loh ah tang tlat lova inpawmthiam tur leh hmasawn zel turin MZP a beisei tlat a ni.

A chunga kan sawi point te khian Online Portal thar 2.0 chu a rintlak tawk rih loh zia tarlangin, MPSC hian a rintlak tawk lohna leh an thiam loh ni rengah pawh Candidate te tawrh tir an tum tlat hi thil dik ni thei ah kan ngailo a, OTR chungchanga Instruction mumal leh felfai tak pe chuang si lova Candidate Physical Verification nei thei reng, Written ah pawh tling thlap tawh Interview tura koh tawh te pawh Reject/Drop leh phah nana OTR an hmang leh thin chu ti tawh lo tur leh an tih dik tawk loah mawhphurhna la ngam turin MPSC hotute kan ngen a, system fail avanga Candidate te reject aichuan system fail avanga candidate te chunga physical verification nei tura chance pek emaw OTR-a document upload leh hun chhung siam chu thil nih dan phung ni turah MZP chuan kan ngai a ni.

MPSC hotute chu vawi tam tak Meeting puiin Online Portal thar chu tichangtlung turin rawtna hrang hrang thlen a ni tawh a, Portal thar that tawk rih loh avang leh a that tawk rih lohna ang anga hman zui zel a nih dawn pawhin Instruction mumal zawk pe turin ngenna vawi tam tak thlen alo ni tawh bawk.

Hmasawnna pawh hmuh tur tam tak a awm rualin Online Portal thar that tawk loh lai ber leh instruction mumal a awm loh laia Form lo fillup tawh te chu Physical verification nei tura hun hawn sak tur pawh in vawi tam tak MPSC hotute hi sawipui an lo ni tawh bawk a ni.

OTR System hi chu MZP pawh in Candidate te tan awlsamna tam tak a thlen avangin a tha kan ti a, mahse kan OTR hman mek hi a friendly tawk rih lova, candidate te zingah buaina tam tak a thlen ta a. OTR chungchanga Instruction mumal dawng lovin Candidate tam takin Form an fillup a, OTR System la that tawk lohna leh MPSC atanga Instruction mumal a awm loh avanga Candidate document upload kim lo te chu Reject mai lovin chance pe turin MZP chuan MPSC hotute a ngen nawn leh bawk.

MZP chuan Candidate OTR avanga buaina tawk mekte chu hriatthiamna pe tur leh OTR system tihchangtlunna tura MZP rawtnate chu tih hlawhtlin a nih hma chuan Candidate tam tak tana buaina thlen tu a nih avangin tih tawp rih a, UPSC in OTR titawp a Universal Registration Number (URN) system thar a introduce ang thleng pawh a Candidate tetana awlsamna leh Fair zawk a ni dawn a nih chuan min kalpui tur emaw OTR tihchangtlunna tura rawtna hrang hrangte tihhlawhtlin a nih hun, hmantlak a nih hun, Demonstration mumal tak neih a nih zawh vek hunah zirlai hna zawng mekte experiment a min hmang tawh lovin hman chauh ni tawh rawh se kan ti a ni.

Hetiang buaina tawk hi an tam em em a, rinhlelh nachang in hrelo, tlin inbeisei rihlo leh MPSC lama zawtfiah lo te chuan Reject an nih leh nih loh hi an in hre dawn lova, MPSC lamin Interview tura koh turte Written a tling chauh te manual a document an check avangin Document upload kim loh avanga Reject te hi nizana MPSC lam thuchhuak a tarlan ai kha chuan an tam fe a rinawm a ni.

Exam pakhatah chuan Valid list ah 103 an awm a, chuta tang chuan mi 74 in exam hmachhawnin mi 70 te chu Document upload kim loh avanga drop an ni a, pali chauh te chu interview tura koh an ni, drop/reject te hian reject an nih hi an in hrelo a, written paltlanglo angah an inngai, mahse titha ve tak tak an awm avang leh mi pali lak turah pali chiah an tlin avangin MPSC lamah an zawtfiah a, reject an nih chhan an hre chauh a ni. He hna lak turah hian Document upload kim loh avanga drop percent hi pali chauh paltlang an awm avangin a sang viauin a rinawm, nizan lama MPSC thuchhuak a hna dilna lut atanga buaina tawkte chu za zela teha a san loh thu an rawn sawi kha chu reject nih in hrelo tam tak an awm vang a tih theih ang.

Tin, hna hmu tawh (Appointment pek tawh) tih buangbar thar leh lam hi MZP in MPSC hnena a ngenna a ni lova, kan ngenna zawk chu a chunga kan tarlan ang khian, thil kal tawh, thil liam tawh te (Appointment pek tawh te) ni lovin tuna Candidate buaina tawk mek, Recruitment Process kal meka MPSC-in interview ala conduct lohna-ah te hian Candidate te Chance siam sak tur leh nakin lawka OTR avanga buaina la tawk leh mai turte laka chance pe tura ngenna zawk a ni.

MPSC insawifiah, MZP GS hnena an thawn chu MPSC WhatsApp channel-ah thehdarh a ni,

To,

The General Secretary,

Mizo Zirlai Pawl (MZP),

General Headquarters, Aizawl.

Subj: Lehkha No. B-93/MZP-GHQ/2025-2027/20: dt. 6.8.2026 chhanna

Ka Pu,

A chunga thupui tarlan tlawhchhanin a hnuaia thu te hi i hnena thlen tura tih ka ni e.

In lehkha a chunga tarlanah khian MZP chuan Mizoram Public Service Commission (MPSC) hnenah ngenna siamin, a hnuaia point 3 te hi tih hlawhtlin sak turin ngen a nia. Chungte chu (a ngai ngaiin):

1. One Time Registration (OTR) hi tih tawp ni se, need base in Specific application form siam ni rawh se.

2. OTR a document upload kim loh avanga reject zawng zawng te Offline-a document te thehluhna hun siam sak ni rawh se.

3. Written exam-a tling tawh, OTR a document upload kim loh avanga reject tawh te tan offline-a document submit-na hun siam sak ni rawh se, tih te a ni.

Hemi chungchangah hian a hnuaia tarlante hi MPSC-in chhanna a pek theih te chu a ni:

(1) I ngenna point hmasa bera i rawn sawi, OTR tihtawp hi chu thil “ih chi a ni lo va, OTR hi hna diltute hmakhua ngaih avang zawka siam a ni. A chhan chu, OTR profile-a thil pawimawh awm tawh reng reng hi hna dilna atana online application-in a ‘capture’ mai thin a, hei hi candidate-te tan a awlsam em em bawk. OTR hi tihtawp a nih a, hna ruak zawrhna tihchhuah a nih apiangah a hranpa liau liaua document pawimawh thehluh thar ziah ang chi (need base-a specific application form siam) hi chu hna diltute hmakhua thlirin pumpelh tir hram zawk hi MPSC duhdan a ni. OTR hian specific taka document upload ngai thin a nuai bo a, miin OTR-ah lehkha/document pawimawh a dah luh tawh chuan application nen a inthlunzawm (fetch) nghal a nih avangin hna dang dilna atan pawh a ring zui ngar ngar thei zawk a ni.

UPSC hnuai ah chuan OTR hi vawi 1 bāk thlâk danglam phal a rih loh lai-in MPSC-ah thung chuan mi qualification thar a neih apiangin a in-update thei reng a, document upload tawh siamthat/thlâk pawh a tih theih a, bituk siam a awm ve lo a ni. OTR ṭhatna te chu:

(a) Tul lova hun khawhral titlemtu: Hna diluten vawi khat chiah an ‘personal details’ an ziah a tawh a, hemi hmang hian hna hrang hrang a dil theih a, hna diltu tan ‘data entry’ ngai a ti tlem êm êm a ni.

(b) Candidate-te tihsual palh vengtu a ni: Mi eng emaw zat hi hna dilna thehluh tawp dawn hnaiha dilna thehlut chauh te an ni. A bik takin heng mite tan hian hnahsarumahna hna dilna thehluh avanga ‘spelling’ leh thil dang tihsual neih awm thei nasa takin a veng a ni.

(c) Document pawimawh humhimna a ni: Applicant-te thil pawimawh dahthat sate chu mamawh hun apianga hman theih turin MPSC Portal-ah him takin vawn ṭhat a ni a, hei hi hna dilute tan leh MPSC tan pawh a hlu êm êm a ni.

(d) Engtik lai pawha en theih a ni: Hna diluten an duh hun hunah (24/7) an dilna chanchin te, admit card download hun te, exam chungchâng thuchhuah pawimawh hrang hrang te en turin dashboard-ah engtik lai pawhin a luh theih reng a ni.

(2) Point pahnihna leh pathumna hi chu chhanna thuhmun pek theih nîna a lang e. I ngenna hi tih hlawhtlin a nih chuan hna hmu tawh (appointment pek tawh) mi eng emaw zât a tibual dawn a. Appointment pek fel tawh tih buang?ar thar leh hi thil dik lo nasa tak avanga a nih chuan Law Court lam pawhin a duh loh ṭhin a ni a, thil tih chi loah ngaih a ni.

Tuna MZP duh ang hi tih ni selang chuan hna dilute tan a buaithlak êm êm zawk dawn tih a lang chiang reng mai. Kum 2025-2026 chung khan hna dilna lut sing nga (50,000) chuan MPSC chuan a buaipui a, kum 2026-2027 hian mi sing hnih (20,000) chuan a buaipui tawh bawk. Hetih lai hian OTR a document upload kim lo emaw, dilna khar tawh hnua upload thar riat leh te hi mi za nga (500) bawr vel chu an ni thei mai thei a, MPSC-in hna dilna lut a buaipui atanga za zela tehin a sang lem lo hle. Mi tam vak lo te buaina chin fel sak tum avanga mi tam zawkte hamṭhatna leh awlsamna neih mek tithawp thung si hi MPSC ke pênna tur niin a lang lo a, a him loh zawk bawk avangin offline-a document thehluh theih tura ruahmanna siam leh hi a remchâng loh ngaih a ni.

Tin, document upload hun bithliah pelh hnua offline-a theluhna hun siamsak chungchâng hi a mamawhṭu te tan tih awm tak ni mah se dan mit atang chuan tih chi ni lo in a lang a. Hon’ble Supreme Court chuan Special Leave Petition (Civil) No. 32964 of 2025 (Rajasathan PSC vrs Lavanshu Sankhla & Ors) a Judgement & Order (Reportable) dt.04.05.2026-ah chuan heti hi a tarlang a:

“A conjoint reading of the advertisement and the governing rules makes it evident that the relevant date for determining eligibility, including educational qualification, is the date of submission of the application. This is for the reason that the eligibility of a candidate is assessed on the basis of the particulars and documents furnished at the time of application, and there is no provision for subsequent supplementation or re-submission of such documents at a later stage,” tiin.

I ngenna tih hlawhtlin a rem lohna te:

1. OTR hi kan tîtâwp emaw, OTR-a document upload kim lote avanga offline-a document thehluhna hun kan hawsak leh emaw a nih chuan MPSC hi tu te emaw hamṭhatna tur bik chauh ngaihtuahna avanga thil ti a ang dawn a. Kan ram Dânpui, Article 14 (Equality before the law) leh Article 16 (Equality of opportunity in matters of public employment) palzûtna a nih theih dawn avangin thil tih chi a ni lo.

2. OTR-a document upload lo emaw, upload tiai (dilna hun tawp hnu) avanga dilna hnawlsak tawh te zinga mi thenkhat chu Gauhati High Court, Aizawl Bench-ah an zualko mek a. Court-a thu inchiah lai a ni a, Court-in thu chhuah a siam hmaa kan kal dan tihdanglam ngawt hi a remchang lo a ni.

Thil tha zawk duhna avanga siam, OTR hi tîtâwp a nih chuan hemiin hamṭhatna leh awlsamna a ken tel te chu candidate-te leh MPSC-in kan chan/hloh vek dawn tihna a ni a. Tin, India ram State PSC zingah OTR hmang lo an awm tawh loh hial zâwk laia he thil tîtâwp emaw, offline-a document thehluh theih hun siam thar chungchang te hi tun dinhmunah sawi thu a chêng lovah MPSC chuan a ngai a ni.

I rintlâk,

(TERESY VANLALHRUAII)

Secretary

MPSC