MIGAHATA | New Ngharchhip khawtlangin sikul kal tur an dang, order an hal bawk; Aug 14 thleng atan sikul an khar!

Aizawl | August 10, 2026: MIGAHTA lungawi lohna lantir chhan chuan a kang kai thui zel a, vawiin khan New Ngharchhip khuaa all NGO, all party, VC leh Managing Committee te chuan an khaw High School, Mizoram sorkarin Adhoc Aided atanga Lumpsum Aided a a dahthlak an duh lohzia lantir nan Govt M/S leh Govt P/S School naupangte leh zirtirtute School kal tur an dang.

Hemi hnu hian New Ngharchhip High School-ah Mizoram Education (Lumpsum Grant-in-Aid for General Maintenance of Private School) Rules, 2026 chu Board Chairman leh New Ngharchhip VCP ni bawk Ronald Lalhruailiana chuan a halral hnuah High sikul chu August 10 - 14, 2026 chhung atan khar nghal a ni.

MUP New Ngharchhip President Upa C Thanghmunga kaihhruainain Ṭawngṭai rualna neih hnuah resolution pass a ni bawk.

Resolution:

1. Mizoram Education(Lumpsum Grant-in Aid for General Maintenance of Private School) Rules, 2026 hi kan khawtlang tan a ṭhat loh em avang leh, Kan High School kal zelna tur atan a him loh avangin, Mizoram Sorkar hian sùt leh ngei rawh se.

2. He Rules hi kan duh lohzia lantir nan, Managing Committee-in kan High School hi August 10 - 14, 2026 chhung khar rawh se.

3. New Ngharchhip High School hi Relaxation hmangin Provincialised ah Mizoram Sorkarin dah let leh rawh se.

New Ngharchhip khua hi Hnahthial district chhunga awm niin, High sikulah Sikul naupang 33 an awm mek a ni.