MHIP-in hmeichhe thuam hmanga in-sawisak leh in-deu-sawhna thleng leh Hmeichhiate hnual suatna leh hmuhsitna tawngkam awm thin pawi ti

Aizawl | Aug 6, 2026: Mizo Hmeichhe Insuihkhawm Pawl (MHIP) General headquarters, Aizawl President Lalliani chuan vawiin khan Aizawl Press Club-ah thuthar thehdarhtute kamwin,"Tunhnaiah hmeichhe thuam hmanga, in-sawisak leh in-deu-sawhna kan ramah a thleng a. Hmeichhiate hnual suatna leh hmuhsitna tawngkam hriattur leh, chhiar tur a awm chho nawk bawk. Mizo hmeichhiate kan rilru a na in, pawi kan ti tak zet a ni," a ti.

Hmanlaiin, Mizo mipa chu, ral leh sa hma-ah an zam ngai lo a, chhungkua leh khawtlang tana, thlamuanpuiawm leh mawhphurtu an ni thin. Chunga mawhphurna hlen thei lo leh tlanchhiate chu, “Pawnfen fentir tlak i ni” tiin an lo sawi thin. Vawiinah erawh chuan, Mizo nunphung a lo dang lamin, ral leh sa, a

hrin a hran a beih tur, a awm tawh lo. Chuvangin khang hunlaia, tawngkam hman te kha, vawiinah chuan hman emaw, a taka lanchhuah tirna chi a ni tawh lo hul hual a ni. Kan hnam, Mizo hnam in hmasawnna nasa tak a nei chho a, a bik takin, hmeichhiate ah, nasa takin hmasawnna a awm tawh a, hmeichhe thawmhnaw hmanga indeu-sawh hi tih loh tawp tur a ni. Politics ah a ni emaw, eng thilah pawh ni se, kan in sawisa in, kan in deu-sawh duh anih pawhin, hmeichhe thawmhnaw hmanga tih a nih chuan, Hmeichhia te hi kan dam thei ngai dawn lo a, kan pawm thei lo a ni. Chuvangin, hmeichhe thuam hmanga, insawisak leh indeu-na hi thleng tawh lo se kan ti.

Social Media khawvelah kan cheng si a, hetianga Mizote kan insawisak a, kan inhmuhsit hian, keimahni mai ni tawh lovin, khawvel hmun tin a mi ten, an lo thlirin an lo hmu ve thei vek a, a pawi em em a ni. Mizo hmeichhe thawmhnaw mai nilovin, hnamdang hmeichhiate thawmhnaw thleng pawhin, nuihzatthlakah kan chhuah a, kan sawisa a, a hnam ang in kan mualphona a ni tih kan hriat a pawimawh hle mai. Hnamdang rilru thleng pawhin kan hliam tel thei a ni. Kum zabi 21-na, 21st Century khawvelah hian, heng ang infiamna, insawisakna hi en liam mai mai chi a ni lo. Thangthar zawkte phei chuan an hrethiam tawh lo a ni. Sim hmak chi a ni a, mitin I fimkhur zel ang u.

Mizo hmeichhe incheina, pawimawh leh zahawm ber chu Puanbih hi a ni a. Mizo Puan, a bikin Sorkarin, dan hnuaia a humhalh, GI Puan (Geographical Indication Puan) - Puanchei, Tawlhlohpuan, Hmar-am, Ngotekherh leh Pawndumte hi a hmanna tur dik tak leh a hman lohna turte, sorkar hian a ti chhuak a, zawm a hlawh tha lo hle. Hmun tam takah Puanchei hi, ruang khuh nan ten kan la hmang a. Tin, dawhkan han khuh nan emaw bang cheimawi nan te kan la hmang thin a, hei hi phalloh a ni. Sorkar in dan ang thlap a, Mizote ta a ni, tia a GI puan an nih vang a ni. Eng programah pawh dawhkan khuh nante, bang cheimawi nan te, kan hmang tur a ni lo. Heihi kan zawm hram hram a pawimawh hle mai.

Tunhnaiah Mizo hnam humhalhna a nasa em em a, hnam dang pasal neilo tura, inzirtirna pawh kalpui niin, a tha em em a ni. MHIP pawn, hetianga hnamdang pasal neilo tura, inzirtirna hi kan kalpui nasa in, kan programme-ah te leh keimahni MHIP chhungah kan inzirtir nasa thin. Chutih lai chuan, thahnem ngaih vang pawh a ni ang, uchuak taka hmeichhiate deuhsawhna leh hnualsuatna, hmuhsit rawngkai leh ualau taka zilhna, hmuh tur a awm hi pawi kan ti tak zet a ni. Mizo hmeichhia fel tak tak, hnamdang pasal neih tum lo, hnamdang pasal nei lo tam tak an awm a. Chuvangin Mizo hmeichhia han tih a, tawngkam dengkhawng tak tak leh hmeichhiate chauh thlur bika, hmalak hi a dik lo a ni. Kan zavaia kan tanrualna tur anih avangin, tumah rilru na lova kan insiam a, tha taka kan tan ho thiam hi, a pawimawh in, kan hnam kan humhalhna kawngah hian, a hlawk zawk ngei ang.

Hmeichhia ten tual thihna leh kut thlak, an tawrh hriattur a awm leh thin hi, Mizo hmeichhiate kan rilru a na in, pawi kan ti tak zet. Nimin lawkah kum 15 mi Ramdinpuii, Mualthuam North khua chu, a ruang chhar a ni. Kan thu hriat danin, a taksa ah vihna leh zaina hnuhma a awm tih a ni. Pawi khawihtu an awm a nih chuan, man chhuah a nih thuai a, dan hnuaiah na taka hrem a nih ngei hi kan duh a ni. Hetiang tualthihna hi thleng tawh lo se kan ti a. Hmeichhe chunga diklo taka, kutthlak emaw chetna, a awm a nih chuan, Mizo hmeichhia te hian kan enliam mai mai dawn lo, a tul angin a tawp thlengin hma kan la zel ang.

Mizo hnam hian, tha taka hma a sawn a, hnam zahawm leh hmeichhia leh naupangten, him tak leh, zalen taka nun an hmanna, a nih zel theihnan, MHIP chuan a theihna kawngah, tha thlah lovin a bei zel ang.

MIZO HMEICHHE INSUIHKHAWM PAWL (MHIP)

GENERAL HEADQUARTERS

PRESS NOTE

Ni 6 th August, 2026 (Ningani)

Tunhnaiah hmeichhe thuam hmanga, in-sawisak leh in-deu-sawhna kan ramah a thleng a. Hmeichhiate hnual suatna leh hmuhsitna tawngkam hriattur leh, chhiar tur a awm chho nawk bawk. Mizo hmeichhiate kan rilru a na in, pawi kan ti tak zet a ni.