HBC-in Freshers Social leh Alumni Day hmang; "I chawr chhuahna chu eng pawh nise, Tumahin i tawpna tur an hre lo, Theihtawp chhuah ve phawt mai rawh."

Aizawl | August 6, 2026: Govt Hrangbana College (HBC) Alumni Association leh Students Union buatsaihin vawiin chhun dar 1 khan, an college hall - The Golden Hall-ah 'Freshers Social leh Alumni Day' an hmang a, Aizawl Municipal Corporation (AMC) Mayor H Lalremtluanga chuan khuallian niin a hmanpui a, AMC Executive Corporatoor Vanlalfaka pawhin a telpui.

Aizawl Mayor chuan, "college hi degree lakna mai a ni lova, nunphung zirna a ni a, rilru put dan leh hmalam hun atana inbuatsaihna tha tak a ni," a ti a.

Mayor H Lalremtluanga chuan, "In chawr chhuahna leh zir chhuahna inang lo tak tak a ni ang, he college a luh hi, a hlawha in hlawh chhuah a ni, in chawr chhuahna chu eng dinhmun pawh nise, tumah hi insit reng reng suh u, mahni inring tawk takin, tumah hnuaichhiah lovin, thiamna pawchhuak turin ka sawm a che u." a ti a.

Aizawl Mayor chuan, "I chawr chhuahna chu eng pawh nise, Tumahin i tawpna tur an hre lo, Theihtawp chhuah ve phawt mai rawh." tiin zirlaite fuih a, "Gen Z wave a lar hle, CJP tih te pawh a rawn lar viau a, in thawm a na a, kan ngaithla thap che u a, kan thlir thup che u a ni. Tute political party emaw pawl emaw, tute emaw tawtawrawt-ah tang mai mai bik suh u. Ram hruaitute leh Political Party te hian in che vel leh in thu leh hla hi kan thlir thup tawh a ni,"

"Thu tak leh dikna zui tlat tum mi ni tlat turin ka chah duh che u a, nangni hi nakina kan ram hruaitu turte, ram khalh ngiltu tur pawimawh tak in nih ka beisei," a ti bawk.

HBC Alumni Association Vice President Zothanzama Sailo-in inlawmna thu a sawi a, General Secretary Michael Lalramanga'n inhmelhriattirna leh report a pe a, HBC Students Union hruaitu nilaite inhmelhmelhriatttirna neih a ni a, alumni chawimawina hun neih niin HBC Alumni Association secretary Aldrin Lalrambeiseia'n a kaihruai a, HBC chhuak Aizawl Municipal Corporation (AMC) Mayor H Lalremtluanga leh AMC Executive Corporatoor Vanlalfaka te hnenah chawimawina hlan a ni.

He hunah hian, HBC atanga zir chhuak leh Vice Principal ni mek Lalchangliana, AMC Executive Corporatoor Vanlalfaka leh HBC pensioners aiawhin an principal hlui Dr H Lalzidinga ten thu tawi an sawi bawk.

Hun hnihnaah concert-a hun hman niin, HBC zirlai chhuak, tunlai zaithiam hrang hrangte an zai a ni.