Sports Minister in Bana Kaih atanga Aizawl FC leh Chanmari FC te tanpuina pawisa fai hlan

Aizawl | July 29, 2026: Mizoram atanga Indian Football League khel club pahnih – Aizawl FC leh Chanmari FC – te season liamtaa an senso tanpuina chu vawiin chawhnu dar 1:30 khan khan Pu Lalnghinglova Hmar, Minister of State, Sports & Youth Services Department chuan club pahnih hruaitute kutah a hlan.

Indian Football League club pahnihte hi a vawikhat nan Mizoram sawrkar chuan Bana Kaih (Handholding) atangin Rs. 25 lakh (cheng nuai 25) ve ve in a tanpui a. April 16, 2026 khan 1st installment cheng nuai 17.5 inhlan tawh niin, vawiinah Sports Minister hian 2nd installment cheng nuai 7.5 ve ve a hlan a ni.

He hunah hian Sports Minister Pu Lalnghinglova Hmar chuan Mizoram sawrkarin infiammite bana kaih a ngaipawimawh tih a sawi a. “Football kaltlangin Mizo thalai tamtakin eizawnna an nei a, season liamta khan Indian Super League leh Indian Football League ah Mizoram player 100 chuang an tel. Hei hi player te leh an chhungte bakah a state pum ang pawhin kan hlawkpui pha a ni.” a ti a. Football leh sports discipline dangte chu thalaite hmasawnna thlentu pawimawh tak a nih avangin Bana Kaih scheme nen pawh a inhmeh a, pawisa hmanna awm tak a nih thu a sawi a ni.