Chhiatrupna thlen thulh-ah 'Khuarel' app hmang tangkai ang!

Aizawl | July 13, 2026: Tunlaiah thli leh ruah a thawk nasa a, hmun tinah leimin, lei tawlh, lung tla, kawng chim leh kawng ping te a thleng a, hengah hian, Chhiatrupna a thlen thulh-ah 'Khuarel' app hmang tangkai ang! 'Khuarel' apps hian kawng tam takin chhiatna thlenna report leh chhiatna dang a thlen lohna atana mipui hriattir kawngah a pui dawn hle a ni.

Disaster Management & Rehabilitation (DM&R) chuan, 'Khuarel' app chu April 29, 2026 khan an tlangzarh a, he app tangkai tak hi mipuiin kan hman tangkai thiam a tul hle dawn a ni. 'Khuarel' app hi Buannel Geo Solutions & Services siam leh duan a ni a. Playstore-ah awlsam taka install theihin a awm a ni.

Khuarel App hi chhiatrupna a thlen thut pawha vantlang mipui, DM&R Department, leh State & District Disaster Management Authorities (SDMA & DDMA) te inkarah inbiakpawhna leh thil thleng inhrilh zung zung theih nana siam a ni. Chhiatrupna thil thleng hrang hrang laka data (buhbal leh thuziak) te fel fai leh systematic taka chhinchhiah nan a hman theih bawk a ni.

He apps hmang hian, mi tu pawhin, an chhehvela chhiatna thlengte thuneitute hnenah an thlen zung zung thei a, chumi an thlen atang chuan, thuneitute'n hma an lo la zung zung thei a. Hei hian chhiatna thlenna hmuna thuneitute an thlen hma phah a, chhiatna nasa zawk thleng theite a pumpelh thei a ni.

He apps atanga mipui thil thlente vil tur hian thawktute'n darkar 24 an vil reng a, office-ah riah chilhin an enkawl reng a ni.

'Khuarel' apps hmang hian mipuiin awlsam takin chhiatna thlengte thuneitute hnenah kan thlen thei tawh a, chutih rualin, mipui lam pawhin, kan thil thlen kha, a dik tawk a ni tih kan hriat a ngai a, chuti a nih loh chuan, thawktute tana buaina thlentu mai mai kan ni thei a ni.

Chhiatna thlenna kan thlen dawnin, a hmun, a hun leh chhiatna thlen dante chiang taka tarlan theih nise, a hmunah thuneitute an thlen ran theih phah ang a, chhanchhuahna emaw venhimna lam a chak thei ang.

'Aizawl leimin' tia thawn ringawt lovin, 'Aizawl-ah khawi veng nge, chumi vengah chuan khawi lai khawtthler leh veng bawr nge, a chheh vela hriat awlsamna tura thil awmna tarlan tel theih chuan, tanpuitu emaw thuneitute kawng tam takin a pui thei dawn a ni.

'Khuarel' apps hmang hian, mahni phone atangin thlalak leh thuziak hmangin awlsam takin chhhiatna thlenna te kan thlen thei tawh a, thawktute'n lo vil rengin, chumi hmang chuan, hma an la tawh mai dawn a ni.

Chhiatna a lo thleng a, thuneitute number neih loh avang emaw biakpawh ber tur hriat loh avanga chhiatna pawi zawk thleng leh tanpuitu lo thlen lo angte kha 'Khuarel' apps hmang hi chuan a pumpelh tawh dawn a ni.

He a chunga kan hmuh hi Ngaizel petrom pump bula leimin avanga lung thahnem tak tla an report na a ni a, hei hi vawiin July 13, 2026 chhun dar 12:20 khan thuneitute'n an dawng a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]