Zirnaah ṭhahnemngaih vak a ngai lo, inthlah pun lam a ni zawk!

- ZTPpa Colney

He kan thupui, “Zirnaah ṭhahnemngaih vak a. ngai lo, inthlah pun lam a ni zawk” tih hi tunhnaia sorkarin school eng emaw zat a provincialised hnua; heng zinga tel ve lo Adhoc High School zirtirtu pakhat whatsapp status a ni.

Thawnthu bul: Adhoc High School tam tak hi kum 30 hma lama din tawh niin, a din tirh a\anga sorkar-a luh beiseia thawk mi engemaw zat an la awm. Kum 2008-ah MNF sorkar khan Adhoc Grant-in-aid-ah a dah a, sorkar inthlakah pawh hmasawnna nei lem lovin kum 15 hnu, kum 2023 kum tawp lam khan MLA inthlan hma lawkin MNF bawk chuan hun tepter tawh takah hmanhmawh takin High School 120 a (HSS leh MS engemaw zat telin) Provincialised leh ta a ni.

Kut beng ri a ring: Chutianga hun rei tak chhung, a ṭhen chuan kum 30 chuang an lo nghah tawh Sorkar School an han ni ve tur chu chhungkhat pa kut beng ri a ring hle mai. An nupui fanaute bulah sorkar hnathawk an nih ve tawh tur thute chu hahipa sawiin, lawm avanga an mittui tlate chu an in hrukhul sak tawn mawlh mawlh hlawm mai. School Provincialised order a chhuah hnu lawkah sorkar aṭangin an sikul hming bula Government (GOVT ngei mai) an dah tawh tur thu order an han hmuh zui leh meuh phei chuan Pathian hnena lawm thu sawi mai loh chu tih theih neiin an inhre lo va; ‘Tlai ngai lo Pathian a nihna a lang leh ṭhin” tih chu an inhrilh tawn a, whatsapp-ah an inthawn darh chur chur mai a ni.

Provincialised thar school tam zawk chu thingtlang sikul an nih avangin Aizawlah Sikul signboard leh sikul seal-a GOVT tih chuang ngei mai siam turin an Headmaster ṭheuhte chuan Zawlkhawpui an pan sang sang a, an khaw tawn tirh ṭawngṭaina hmun thlen hma chiah, Bawlhhlawh paihnaah chuan an sikul seal hman lai GOVT tih pawh chuang lo chu mamawh ngai tawh reng reng lo turin an vawmthla sap sap a nih kha.

Aizawlah pawh a veng lun lai ber Chanmari YMA Hall-ah chuan ‘Provincialisation Lawmna’ ropui takin an nei a, an lehkha zir chhan ve ber, hu rei tak tlumtea thlira an lo thlir ‘Sorkar Hnathawk’ an nih tawh dawn miau avangin induhsakna leh inchibai aia lar a awm thei lo. Zawlkhawpui nghing dawt dawt khawpa lai chhuat an chhir hnuin, an mahni khua leh district headquarters-ah ṭheuh, a aia uar zawk mah emaw tihtur khawpin ran lu kim nen a lawmna ruai an buatsaih leh ṭheuh a, chutah zet chuan khawtlang a lawm a, chhungkua a nui a, an sikulin par a chhuang thar leh a ni ber mai.

Lal thar a piang: GOVT school an nih tawh tlat avangin a lawmna sahar daih tukah phur takin mahni sikul ṭheuhah sikul dangte tluk loh hlau reng rengin phur takin an hna an chhunzawm leh ta. Thlasik khaw vawt hnuaia tlai dar 5 thleng extra class kal pui leh school-a naupang study camp neih puite chu an tan thil thar a ni lo. Sorkar hnathawk an nih tawh tlat avangin an tan hahthlak leh hreawm pawh sorkar tana a tih ve theih tawkah ngaiin hlim takin an hmachhawn zel thei.

Sorkar a lo inthlak ta a, kalphung tharah hmasawnna rahbi thar hmuh beiseiin, minister viak ṭha takin an department a enkawl chat chuan an ngaih a tiṭhain, an thla a muang hle. Amaherawhchu, hetia thlamuang taka an awm lai hian an beisei angin thil a kal ta hauh lo mai a, sorkar thar chuan sorkar hmasain School a provincialised zingah school tam takin tehkhawng (criteria) an phak loh avangin 15th July, 2024-ah a REVOKE leh ta thut mai a ni.

Kut ben vawi hnihna leh vawi thumna: Chutianga sorkar sikul an lo nih ve tawhna, vawi lehkhata paihthlak thut a nih leh takah chuan mangang leh baihvai takin an awm leh ta a. Amaherawhchu, an hmakhaw ngaitu, zirtirtu ve tho minister an nei tih hriain, dinhmun hniama a awm tir reng an ring lo va, a lakah an beisei sang hle a ni.

Chutiang beiseina sang tak an neih lai chuan minister ṭawngkam hrang hrang- “Sorkar hmasaa Cabinet meeting Agendaa a luh dân kha a dik lo. Dân dik thlapin kalpui kan tum” tih te, “Sawrkar hmasain a upgrade school-te hi thlak danglam vak kan tum lem lo. School building leh naupang pawh nei lote an nih loh chuan” tih te “Rules hmasa lamah thingtlang school-te tân provincialised-a luhna chance a chhe lutuk a, dân kan siam ṭhat belh” tih te “In sikul signboard-a GOVT tih in tarte pawh lo la thla suh u, in vaia lenna tur bawm kan siam mek” a tih te bakah Chief Minister meuhin, “School building pawh nei lo, school naupang pawh nei mumal lo, zirtîrtu qualify lo te bak chu ministry hmasain a lo tih tawh angin kan kalpui ang” a tih thawm an hriat meuh chuan a vawi hnih nan an kut ben thawm ava ring em!

Hei mai a ni lo, December 20, 2024-a Council of Ministers Meeting chu nghakhlel taka an thlir laiin an beisei ang ngeiin Proposal for addition of the new provision “Power to Relax” in the School Education conditions for provincialization of schools a pass tak (Kum 2023 a school provincialization dan siama conditions \henkhat chu; khawpui lam school tana zawm harsa lo, thingtlang lam school tana zawm harsa tak si a awm thei nia hriat a nih avangin. He rules pawhfan theihna dan siam belhna a ni) tih chu Council of Ministers Meeting chuan a pass leh ta rup mai a. Hemi ṭuma an kut beng hi a hma lama an beng ai khan a nep chuang miah lo.

Sorkar sikul nei tura an ramngaw duat em em, an reserved forest-te ṭhiat a, zirtirtute hlawh pe thei ṭawk ṭawka bul an ṭanna chuan a vawrtawp a thleng dawn tawh emaw tih turin, an mahni ngaihsaktu minister chuan an dan siam, an vaia lenna tur bawm ngei chu a taka hman a nih theih nan kum 2025 kum tir lamah Assembly house-ah dan thar chu a LAY ta rup mai a, a aia ringin a vawi thum nan kut an beng leh a nih kha.

Ngaih\ha taka awm tura inngai tawh kha a nawrtu te nawr danin a zir loh vang nge, a hnu lawkah chuan inphatsanna, inkalsanna, inkaisan sanna leh inthlauhthlakna ni ngeia lang chuan Adhoc High Schoolte chu hmun hnihah a \hen ta phawk mai.

Ni hriatreng tawh tur: Dt.18.05.2025 leh 22.05.2025 te hi Council of Miniser meeting-in school provincilased tur a pass ni leh heng school list te Education Minister-in Press conference hmanga a puanchhuah nite a ni a. He ni hi Adhoc High School-a thawk mi 500 chuang tan chuan hun rei tak an lo nghah ve tawh, an sikul tana an theihna leh thiamna zawng zawng an hmanral ṭhakna ni mahse, sorkar sikul an ni ve theih dawn tawh lohna ni in\anna, an hun tawn zinga ṭihbaiawm, a chhe zawnga an hriatreng tawh tur, an mittui ti tla nawn fotu a ni kumkhua tawh dawn a. Chutih rualin Adhoc High School-a thawk mi 200 bawr velte lei rem rah ṭanni, an beiseina a taka a channa ni, ni duhawm a ni kumkhua tawh dawn a ni.

Buklung inrih hleih: Tun ṭuma School Provincialisation puangtu, Education Minister hian kum 2023, MNF sorkar laia notification chhuakah ‘criteria’ pha lo school tam tak an awm thu a sawi a. Criteria pha lo a tihte hi sikul naupang 60 nei tling lo niin a lang. Provincialisation Rules-a sikul naupang neih ngai zat 60 hian thingtlang leh khawpui sikul a thliar lo. Hei hian Aizawl vengkhat in 1000 bawr awmna leh thingtlang kilkhawr in za nufa lek khua chu buklung khatah khai an ni ta a, a inrih hleih loh theih ta lo a ni. Hemi a nih avang hian thingtlang khawte zawka Adhoc High School tam takte chuan naupang neih ngai zat hi mihring pun dan enin tun aṭanga kum 50 hnuah pawh an pha thei ngai dawn ta lo a ni.

Revoke, Rules leh Relaxation (RRR): Sorkar hmasain a provincialised tawh, sorkar tharin a revoke chhan ni bera lang chu ‘criteria’ phak loh vang niin a lang ta a, chu ‘criteria’ chu naupang 60 chin neih chu a ni. Hetiang a nih lai hian ni 22.05.2026-ah Education Minister chuan Press Conference ah hetiang hian a sawi a,

‘Ni 16.10.2024-a Council of Ministers meeting chuan Mizoram Education (Lumpsum Grant-in-Aid for General Maintenance of Private School) Rules, 2024 leh ni 22.9.2023-a Notification hmanga Conditions for Provincialisation of Schools a siamah relaxation engmah a siam loh avangin ‘Relaxation Clause’ a dah belh leh ta a ni’, a ti a.

Relaxation awm loh avanga rules an siam tharah ‘‘Relaxation Clause’ an belh a, chu ‘Relaxation Clause’-ah school tam zawk chu dah luh an ni ta chuang lo chu heng school-a thawkte rilru tina tu ber a ni ta a ni.

Sorkar hmasain provincialised-a a puan tawh ‘Revoke’ thei tu chuan criteria khirh tak mai siam ṭhain, ‘Rules’ thar a siam thei a, emaw a siam lo a nih pawhin a duh phawt chuan Relaxation Clause hi a hmang thei a ni tih hi Adhoc High School-a thawkte leh khawtlang in a beisei dan chu a ni.

Engtin zel?: Sikul naupang ngahin dinhmun \ha an chang a; a nei tlemin an chang ve lo. A nei tlemte an ngaihnathiam duh miau loh chuan dik taka enrolment report ṭhin, naupang 60 nei tling ve ngai lo turte chuan an dinhmun chu \ap chungin an pawm angai ta.

Thingtlang khawte zawkten an theih dan zawng zawng dapa, hah tak leh mahni sum tam tak senga zirna an lo kalpui tawh, sorkar sikul an neih theihna tura an beiseina leh an thawhrimna zawng zawng chu a thlawn dawn ta a. ‘Engtik niah emaw chuan kan tu leh faten khaw danga HSLC an exam ṭhinte hi sorkar sikul kan neih ve a, exam centre kan nih hunah chuan a bo tawh ang’ tia an beiseina chu a thamral dawn ta. Sorkar sikulin hamṭhatna an dawn \hin angte chu thingtlang khawte zawkte sikul chuan an hmu ve ngai dawn lo va; a hun laia khawtlangin an chelh beh, mahni sikul tana rinawm tak la thawk ngat ngatte chu sorkar hnathawk an ni ve dawn ta lo.

Tun ṭuma sorkarin a provincialised lohte hian nakin zelah pawh sikul dinhmun ṭha zawk beisei tur an nei ta lo va, sorkar ruahman danah sorkar sikul nih theihna a awm tawh loh mai bakah sikul naupang neih tur zat nei pha lote chu dinhmun hniamah an tla tawh zawk dawn a ni.

Quality nge quantity: Tuna sorkar sikul tam zawk hi khawtlang din, a hnua sorkarin a lakte anni zel a. Chutianga sorkar sikul neih ve duhna leh zirnaa rualawhna avangin khawtlangin sikul an din ṭhin a; engtik niah emaw chuan sorkarin a lak beiseina nei vek an ni. Sorkar sikul nih ve loh hlau reng rengin khawtlangin an theihna zawng zawng hmangin an enkawl a, hmeithai michhe ber pawisa ip thlengin ṭanpuina khawna, thawh ṭhin an ni. Sikul thawm ṭhat leh cheibawl kawngah khawtlang hnatlang vawi tam koh ṭhin niin, sum leh pai tha leh zung sikul tan seng ṭhin mahse, sorkar sikul an neihna tur a nih phawt chuan an phur em em vek a, tha thawh hreh leh phunnawi an awm ngai lo.

Khawtlang hruaituten theihtawpa sorkar sikul nei tura ṭan an lakna kal zelah, an khawchhunga mithiam an neihte chu khawpui leh hmun dangah hna zawnga chhuak lo tur leh an thiamna khawtlang tana hmang tura an ngen angin, an lehkhathiam neihte chuan beiseina sang tak nen khawtlang sikulah chuan zirtirtu hna, hna zahawm tak chu an luhchilh ta hlawm a. Sikul naupang admission-ah a thiam thiam leh an duh zawng zawng thlan tur a awm ve tak lohah chuan an thiam leh theihna zawng zawng bakah tlem belh hret ngai khawpin sikul naupang tan an inhalral a ṭul ta ṭhin a.

Sikulin result ṭha a neih loh hlau reng reng an nih avang leh sorkar sikul ni tura result ṭha a ngaih an rin avangin school hour pela zirtirna pek chu an nunphung pangngai a ni a, chhungte ruala chaw ei loh chu an tan thil thar a ni lo. Naupang tih phur nan leh zirna ṭha an dawn theih nan sum leh pai phawrh kawngah an kut a rang hle hlawm a, an tana insenso chu channaah an ruat ngai lo.

Hengte hi an nihphung leh an thawh dan ni mahse, sikul naupang 60 nei turin an khua chu a lian tawk lo va, naupiang zatin a daih lo va, sikul kal thei zawng zawngin an daih hek lo. Naupang admit tur zawn belh ngaihna an nei ve lo va, raltlan belhtu tur lah an nei ve hek lo. Sorkar sikul ni ve a, GOVT dah ve turin an thawhrimna zawng zawng chu a tawk zo lo va; mahni hnaa rinawm an intih ve ngamna pawhin a chhanhim zo ve ta lo a ni. Zirnaa ṭhahnemngaih aiin inthlahpun lam uar ta zawk pawh nise, tunge dem thei chuang ang le?

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]