VANRAM KAI BEISEI RINGAWT HI A TAWK LO

_Chatuan Nihna Laimu_

By Rick Warren 

— June 2, 2026

“Hriattirna chu hei hi a ni, Pathianin chatuana nunna min pe a, chu mi nunna chu a Fapaah a awm a ni. Fapa neitu chuan nunna chu a nei; Pathian Fapa nei lotu chuan nunna chu a nei lo.” 1 Johana 5:11-12.

Park-ah va kalin mi ṭhenkhat hnenah vanramah nge hremhmunah an kal ang tih i zawh chuan, mi tam tak chuan, "vanram kai ka inbeisei" an ti ang.

Mahse beiseina ringawt chu a tawk lo. Chu chu i chhanna a nih ve loh ka beisei. I chatuan hmun tur hi a pawimawh em a, chiangkuang lo taka awm hi a fel lo a ni.

He leiah hian nangma duhthuin darkar khat chu sawi loh minute khat pawh i awm thei lo a ni. Tun hnaia mihring thihna inchhiarna thar berah pawh zaah za mihring kan thi a ni! Thihna hi chu pumpelh rual a ni lova - chuvang chuan inbuatsaih lova awm hi a atthlak hle a ni. Duhthlanna pawimawh ber i siam tur hi namnul mai mai suh.

Bible chuan 1 Johana 5:11-12 ah, “Hriattirna chu hei hi a ni, Pathianin chatuana nunna min pe a, chu mi nunna chu a Fapaah a awm a ni. Fapa neitu chuan nunna chu a nei; Pathian Fapa nei lotu chuan nunna chu a nei lo" a ti.

Chu thu chu a va chiang kelh kawlh tak em. Isua i neih chuan, nunna i nei a. Isua i neih loh chuan, nunna i nei lo. Duhthlanna i kutah a awm e.

Mi dang rinna avangin vanram i kai dawn lo va. Mi dang duhthlanna avangin hrehmunah pawh i kal hek lo vang.

I duhthlanna liau liau a ni! I chatuan hmun tur chi nangma duhthlannaah a inghat a ni.

Chuvang chuan Krismas leh Easter kan hmang ṭhin a ni. Krismas-ah khan Isua lo kal lo sela — Easter ah khan a thihna ata tho leh lo bawk ta ang sela — kan dinhmun chu a beidawnthlak viau ang. I thiltihin awmzia a nei lovang a. Duhthlan tur pawh i nei lo vang. 

Bible chuan, “Nangni in bawhchhiatnate leh in tisaa serh tan lohna avangin thi in lo ni a, nangmahni ngei chu amah nen a tinung che u a nih kha; kan bawhchhiatna zawng zawngte min ngaidam a, batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta" a ti. Kolossa 2:13-14.

Kraws hi i harsatna ril ber chhanna a ni: Pathian nena ṭhenhran in nihna chu. Vawiinah hian Isua kaltlanga Pathian nena in inrem theihna tur leh i chatuan hmun tur vanram tihchiana a awm theih nan duhthlanna siam rawh le.

Ngaihtuah zui atan

* Mi tute mah hi he leiah hian second khat pawh pek belh kan ni dawn lo tih kan hriatchhuahna hian Isua thlang tura thutlukna siam hmanhmawh a ṭulzia hi nangmahah emaw i thiante leh i chhungteah emaw eng nge nghawng a neih?

* I nunah tu in nge he devotion thu hi chhiar se tih i duh em em? Engtin nge he thu hi i chhiartir theih nan inlaichinna kawngah hma i lak ang?

* Isua zui tura duhthlanna i siam chuan nunna i nei ang a — i hnar chuan nunna i nei lovang — chu chu a chiang thawkhat hle a ni, eng vangin nge mi ṭhenkhat tan hian duhthlanna siam chu a la harsat fo?

*Duhthlanna siam turin i inpeih em?*

Isua hnena nun hlan i huam a nih chuan, heti hian ṭawngṭai rawh le:

“Duh tak Isu, ka rin che chuan, ka sualna zawng zawngte min ngaidam ang tih min tiam a. Min siamna chhan chu ka zir ve anga, i chatuan van inah chuan min lo lawm ve ang che

“Ka sualnate ka puang a, ka Pathian leh min chhandamtu i nih hi ka pawm a. Ka nunah hian ka Lalpa atan ka pawm ta che a. Ka nuna inrelbawlna zawng zawng i kutah ka hlan a. Ka nunna chungah hian thu i nei ta e.

“Isu, i hmangaihnaah chawlh ka duh a. Ka hlawh chhuah tur emaw ka phu  vanga ka dawn tur a nih loh avangin ka lawm e. Keima rawng bawl lovin damchhunga i rawngbawl hi ka thlang tawh zawk ang. Ka nunna tlawm tak hi i hnenah ka hlan a, khawngaihin i angchhungah min lo pawm ang che. Isua hmingin ka dil e. Amen.”

Tunah khan i ṭawngṭai zo chiah a nih chuan he email Rick@PastorRick.com. ah hian min lo thawn ang che.  I mamawh tur ṭhenkhat Isua nena zinkawng bul i ṭan theihna turin ka lo thawn ang che.

*[Lettu: Sangpuia]*