Sports Minister-in Nazareth Lalthazuala lawmpuina hlan

Aizawl | June 10, 2026: Sports Minister Lalnghinglova Hmar chuan vawiin khan a pisa-ah One Championship Friday Night Fight, June 5 Bangkok-a hnehna chang Nazareth Lalthazuala lawmpuina a hlan.

Sport Minister chuan, "hlawhtlinna hian mawhphurhna a ken tel avangin a hma ai maha insumtheihna leh thawhrimna a pawimawh leh zual dawn a. Chuvangin, aw leh aih hun thliar thiam a tul hle dawn a ni," a ti a. A (Naza-a) hlawhtlinna phena a thawhrimna, taimakna leh mahni inthunun theihna hian thangtharte rilruah thu sawi se a duh hle thu a sawi.

Mizoram State Mixed Martial Arts Association (MISMA) chungchang sawiin, a puang theitu ni lo mahse an thawhrimna leh achievement -te ngaihtuahin thlirna thenkhatah remchan lohna awm mahse discipline awm mekte ngaihtuahin affiliated an nih theih nana remchan dappui chu Mizoram State Sports Council (MSSC) chuan an bat thu a sawi bawk.

Minister chuan India ramin Olympic, 2036 thlen a tum mek thu leh Zofate hmel hmuh ngei a chakawm thu leh chumi atana hmalak mek a nih thu sawiin. Combat Sport lam chu Zofate tana thlur naawm bera a lan avangin thlur bing a nih tur thu a tarlang a. Chumi atan chuan NESIDS (ORTRI) atangin cheng vaibelchhe 38.4 hmuh a nih tawh thu leh Aizawl-ah Boxing Centre of Excellence din a nih dawn thu a sawi. Hei hian Combat Sport dangte pawh a huam tel dawn thu a sawi.

Lawmpuina hunah hian. Adviser to Chief Minister (Political) Lalmuanpuia Punte, MISMA Honorary President Lt Col Lalhmingthanga MLA, Jeje Lalpekhlua MLA, Sports and Youth Services Director Lalhmingthanga MCS leh MISMA hruaitute an tel a. Sports Minister leh Sports & Youth Services Department hmingin Nazareth-a hi lawmpuina thilpek hlan a ni bawk.

~ Angaihi PC