NH 102B siam dana lungawi lovin Ngopa-ah total bandh

Aizawl | May 14, 2026: Mizoram leh Manipur inkalpawhna National Highway 102B siam mekah Ngopa chhehvel (package-2) siam a nih danah lungawiloin Ngopa khawtlang intelkhawmna Joint Action Committee chuan tukin, May 14 zing dar 7 atang khan total bandh an huaihawt a. NH 102B kawngpui an dang.

JAC Ngopa chuan, NH 102B Package-2 siam mekah khaw chhung kawng peng hrang hrang laih chhiat siamthat leh loh, kawng zau zawng a nih tur ang tling lo lutuk, hmanrua hman chhiat lutuk leh thildang tam takah a nih tur ang a ni lo nasa tih sawiin, hma laksak turin NHIDCL, contractor leh Mizoram chief secretary hnenah ngenna an lo thlen tawh thin a, awmzia a nei lo hle tih an sawi.

Hemi avang hian Joint Action Committee chuan nimin, May 13, 2026 thlenga an ngaihchan hnuah awmzia a neih loh chuan May 14-ah Ngopa khaw chhungah total bandh huaihawt nise, tiin an lo sawi lawk tawh a ni.

An ngenna hian awmzia a neih loh avangin tukin atang khan total bandh hi an nei tan a, Ngopa khawchhunga sawrkar office zawng zawng leh dawr zawng zawng khar a ni. Duty ni lo mipui chu mahni ina awm vek turin an lo inhriattir lawk tawh bawk. Bandh hian tlai dar 4.00 thleng a awh phawt ang.

Hetihlai hian dam lo phur lirthei, medical duty, tui sem, magistrate, media, electric emergency duty leh enforcement duty chu total bandh hian a huam lo.

Ngopa lam aṭanga thudawn danin, Thuneitute hnen atanga thu lawmawm dawn a nih hma chu a tul angin NH102B hi dan chhunzawm tum a ni tih an sawi a. Total bandh hian mipui leh zin veivakte nunphung a khaihlak nasat dawn avangin hriatthiamna an ngen tih an sawi.

JOINT ACTION COMMITTEE

on ΝΗ 102B PACKAGE 2

Ngopa

12th May, 2026

THUCHHUAH

National Highway 102B Package-2 siam mekah hian hna a chhiain a nih tur ang a ni lo hle mai a. Compensation reject chung changah te, khaw chhung kawng peng hrang hrang laih chhiat siam that leh loh chung changah te, kawng zau zawng a nih tur ang tling lo lutuk te, hmanrua hman chhiat lutuk chung changah te leh thil dang tam takah a nih tur ang a ni lo nasa em em a ni. Hemi chung changah hian hma min laksak turin NHIDCL, Contractor leh Chief Secretary Mizoram hnenah ngenna siam a ni tawh thin a, heng hmalakna hrang hrang hian awmzia a nei lo hle mai a, Ngopa khawtlang tangrual pawl Joint Action Committee chuan Ni 13.5.2026 thlenga kan ngennain awmzia a neih loh chuan Ni 14.5.2026 hian Ngopa khaw chhungah Total Bandh huaihawt a ni dawn a, chumiin awmzia a neih loh chuan NH 102B hi tiam chin awm lova khar/dan a ni ang.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]