Mizoram Chief Electoral Officer-in Special Intensive Revision (SIR) neih a ni dawn tih a puang

Aizawl | May 14, 2026: Election Commission of India (ECI) chuan vawiin khan a bik taka electoral roll ennawnna Special Intensive Revision (SIR) thawh thumna neih a nih tur thu a puang a. He thawhthumnaah hian Mizoram tiamin State 16 leh Union Territory 3-ah neih a ni dawn. Vawiin chawhnu dar 3 khan Aizawl Press Club-ah Press Conference kovin Chief Electoral Officer (CEO) Dr Lalrozama'n Mizoramah SIR neih tur a nih tur thu a puang a ni.

Dr Lalrozama chuan Mizorama Intensive Revision neih hnuhnung ber chu kum 2005 ah niin, kum 20 a liam hnuah 'Special Intensive Revision' neih a nih tur thu a puang a. Hei hi kalphung pangngaia Electoral Roll ennawn thin ang ni loin, “Tun tuma Election Commission of India in ti tura min tih hi chu a dan a dang a. Electoral Roll revision hi a aia thuk zawk leh changtlung zawka neih tur a ni a, BLO ten Enumeration Form nen in (household) tin an tlawh dawn a, Roll thar hlak siam tur a nih avangin voter zawng zawng ten kan ngaih pawimawh hle a tul a ni,” a ti.

Election Commission of India-in SIR thawhthumna a puan rual hian Mizoramah pawh hmalak tan nghal a ni ta a. Kar tharah hian District tina DEO ten Enumeration Form an print anga, hei hi ni 3 chhunga peihfel tura beisei an ni. He Enumeration Form nen hian May 30 - June 28, 2026 chhungin BLO te chu in (household) tinah vawi thum aia tlem lo an kal dawn a. Hemi hun chhung hian in lama biak theiha lo awm hram turin CEO chuan mipuite a ngen a. BLO te hian an bial theuha in tinah Enumeration Form hi an sem anga, in neitute hnenah thil pawimawh an hrilhfiah anga, dahkhah (fill up) tur te an zawh hnuah BLO te vek hian an khawn khawm leh vek ang a. Ennumeration Form submit lo te chu draft roll-ah an chuang dawn lo a ni. Enumeration Form hi copy 2 sem a ni dawn a, pakhat chu voter ta tur niin BLO in a sign hnan anga, pakhat zawk erawh BLO ta tur a ni thung ang.

SIR ah hian kum 2005-a Mizorama Intensive Revision lo neih tawha Electoral Roll leh kum 2025 electoral roll chu enmil a ni dawn a. BLO te chuan kum 2005 Roll-a awm tawh leh la awm lote en dikin, he 2005 Electoral Roll-a chuangte chu an fate leh an thlahte awm leh awm loh nen an enmil hnuah thlunzawm (map) a ni a. Kum 2005 E Roll-ah hian voter 5,59,123 awmin kum 2025 E-Roll ah hian voter 8,75,004 an awm thung a. 2005 leh 2025 E-Roll enmila, percentage of self and progeny (E Roll a hming chuang te leh an thlahte) mapping tihhlawhtlin zat chu 80.37% a ni.

Langtlang leh rintlaka E Roll siam a nih theih nan Political Party tin te chu Block Level Agent (BLA) inruat tura tih an ni a. AAP hian BLA an la inruat lo a; BJP -294, INC-1045, MNF-868 leh ZPM -1223, an vaiin BLA 3430 ruat an ni tawh a ni.

Special Intensive Revision ah hian July 1, 2026 chu qualifying date ah hman tur niin July 1, 2026 a kum tling hman te Roll ah thun an ni dawn a. May 30 - June 28, 2026 chhungin BLO ten in tin an tlawh anga. Draft Electoral Roll hi July 5, 2026 ah tlangzarh a ni anga. Tlangzarh a nih veleh CEO website, ERO office, Village Council leh Local Council office ah tarchhuah a ni dawn a, a duh apiang tan en theih a ni ang. Lungawilohna nei ten claims & objection an thehluh hun hi July 5 atanga August 4, 2026 a ni a. Heng claims and objections chinfel hun chhung hi July ni 5 atanga September 2, 2026 a ni a. Final Electoral Roll hi September 6, 2026 ah tlangzarh a ni ang.

CEO Dr Lalrozama chuan mobile app -ECINET download turin mi tinte a ngen a. He app hmang hian kum 2005 Intensive Revision ah voter ten an hming a chuan leh chuan loh an en thei a. Hei bakah hian BLO phone theihna te, complain thehluhna te, application thlen chin chhuina (track)-na te leh thil dang tam tak atan a chhawr tangkai theih a ni.

Vawiin Press Conference ah hian CEO bakah Joint CEO Ethel Rothangpuii, Deputy CEO James Miahlung leh SIR Media Nodal Officer Pi Lalnunmawii te an tel a ni.