Aizawl | April 15, 2026: MNF General Secretary Dr Lalrinzuali chuan vawiin chhun dar 12 khan Aizawl press club-ah thuthar thehdarhtute kawmin, "ZPM sorkarin MUCHS a kalpui mek danah thup ruk a tam, mi nawlpui ban phak loh a nih avangin siam tha thuai rawh se," a ti.
Press Statement of Dr Lalrinzuali
General Secretary, MNF GHQ.
15th April, 2026 @ Aizawl Press Club
‘ZPM sorkarin MUCHS a kalpui mek danah thup ruk a tam, mi nawlpui ban phak loh a nih avangin siam tha thuai rawh se’
Mizoram Universal Health Care Scheme (MUHCS) ZPM sorkarin a kalpui danah zep ruk leh thup a tam a, health care scheme dangin a huam ve loh, mipui nawlpuite tan ban phak loh anih avangin tuna kalpui mek dan hi awmze nei lo a ni.
Mipui Health Care Scheme tih hial vuaha ZPM sorkarin chhuang taka an aupui MUHCS-ah hian damdawia inenkawlna scheme nei sa reng, sorkar hnathawkte leh ABPM-JAY (Golden Card nei) te zawng zawng chu hamthatna pek belh awm chuang lo leh sorkar hnathawkte phei chu an hamthatna lak ṭhensak zawkin bilh luh tel vek an ni a. Damdawia inenkawlna (Health Coverage) engmah nei ve lo, a mamawhtu tak tak mipui nawlpui man chawia inziaklutte chu MUHCS 1.0-ah khan mi sing 2 chuang awrh chauh an ni a, hei hi MUCHS hnuaia rin luh zawng zawng atanga 7% vel chauh a ni. Central sorkar scheme awm sa, AB PM-JAY hnuaia Mizorama inziaklut sa, chhungkaw 2,22,943 te chu MUCHS-ah hian seng luh ve tawp an ni a, scheme-in a ken sa bak hamthatna an dawn belh lo va. Mizoram sorkar hnuaia hnathawk Medical Reimbursement Scheme nei sa mi 36,324 te pawh ZPM sorkar hian an hlawh cut luih sakin MUHCS hi a zawm luih tir vek a. Civil Pensioners te pawh medical allowance an dawn thin atanga MUHCS-ah hian sum chhunluh tirin Pensioners 8,733 chu an inziaklut bawk a ni.
Hetianga damdawia inenkawlna (scheme/rules) nei state zawng zawng pawh MUHCS kawma tuam tel vek an nih avang hian scheme lianpui angin lang mahse, a takah erawh Health Care Scheme mamawhtu tak tak, engmah nei lawk ve lo, man chawia inziaklut (contributory beneficiaries) chu chhungkaw 20,213 chauh an ni a. A tawi zawngin, ‘MUHCS hi a funna lian tak, a tak erawh te reuh te ni si’ a ni.
Health Scheme engmah nei ve lo, a mamawhtu tak tak, contributory beneficiaries inziaklut an tlem em em chhan hi inziah luh man a san em vang a ni a. A hniam ber pawh Rs.2,500/- chawi ngai anih avangin mipui nawlpui ban phak a ni lo va, Kohhran hote hialin an kohhran mi leh sa, inziah luhna nei lote puih an inhuam thu an auchhuahpui ta hial hi MUHCS hlawhchham zia lanna, sorkar tan thil zahthlak tak a ni a. Hetihlaia ‘Kohhran hote pawhin ṭha min tih pui’ ti zawnga sorkar hotuten mipui hmaa an sawi duh maite phei hi chu mi harsa zawkte dinhmun an hriatpui phak loh zia lanna leh, mirethei zawkte hmuhsitna lam a hawi zawk a ni.
MUHCS hi kum khat kalpui anih tawh hnuah pawh Mizorama Pvt. Hospital tha zualte zinga zawm duh an la awm lo pawh hi sorkar hlawhchhamna lian tak a ni. Sorkar hian langtlang takin indawrna a kalpui lo a, phai lam leh Mizoram chhung ngeiah pawh Damdawi In thenkhat chu a ruka inremna siampuiin, an inremna chu Assembly House-ah meuh pawh MLA ten an zawt chhuak zo lo a. Thalaite tana hna tam tak siamtu, Mizorama Private Hospital te chu dawmkan a hnekin ZPM sorkar hian sorkar chakna zawng zawng hmanga hrek beh a tum mek a ni.
ZPM sorkar hian Mizorama Private Hopital te an dawr danah ni khata damloten an hman theih tur zat bithliah hniam tak barh luih a tum a. Mipuite hnenah Rs.5,00,000/- thleng hmang thei anga an hrilh laiin, ni 1-a an pawisa hman theih tur zat bituk siam sak an ni a. Entirnan, Medicine Case ang chi-ah damloin nikhata a hman theih zat chu Rs. 2,200/- atanga Rs. 3,850/- inkar chauhte a ni a. Damlote hnenah pawisa tam tak nei anga an puanzar laia an nikhat hman theih zat hniam te te an bituksak leh si hi Mizorama Private Hospital te hmuhsitna leh hrek beh tumna tih loh theih a ni lo.
ZPM sorkarin Mizoram Pvt. Hospital te tana Package Rate a bituk dan pawh damlote tawrhna thlen tur zawng zel a ni a. Entirnan, Tonsil zai ngai chuan, a inzaina senso, damdawi man leh Damdawi In-a a awm chhung atan Rs.6,000/- chauh a hmang thei a. Damloten Rs. 5,00,000/- nei anga an inngaih laia an hman theih zat bithliah siamsak an nih zel dante leh mipui nawlpui ban phak loh anih dante en hian MUHCS hi thiam taka mipuite bumna a ni tih a chiang em em a ni.
MUHCS hmanga damlo enkawlna senso sutkian sak ni tawhte leh ni mekte an lawmpuiawm takzet a, chutihrualin mipuite tan hei aia tha leh changtlung, langtlang tak leh awlsam zawka hman theih hi kan sawrkar hian min chhawpchhuah sak se kan duh hle a, sawrkar hnathawk mekte leh an hun tha zawng zawng sawrkar tana sengraltu Pensioner-te an duhthlanna ngaichang hauh lova an hlawh atanga sum an laksakte hamthatna tur bituk kawnga an uikawm leh em em lawisi te hi a pawi kan ti a. A hming an phuah mawi ang chiah hian thup then nei lo, mipui rilru thianghlimte bumna tel lo, mitin tana hamthatna huapzo Health Care tak tak hi min pe ngei turin kan phut tlat a ni.
Issued by
MNF Publicity Board, MNF General Headquarters, Aizawl, Mizoram
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: