MRB-in DM&R-ah motor hlan

Aizawl | April 24, 2026: Mizoram Rural Bank chuan Corporate Social Responsibility (CSR) kaltlangin vawiin ni 24 April 2026 khan thilpek an hlan.

Thilpek inhlanna hi Mizoram Rural Bank Head Office Board Room ah neih niin Pu V. Lalrinmawia, Secretary CSR Committee in thilpek inhlanna inkhawm hi a kaihruai a. Mizoram Rural Bank chuan Bank profit atanga chhuta CSR kaltlanga pawl, khawtlang leh Sawrkar Office hrang hrang tana an luanchhuah thin tawh thu leh kumin pawh hian Nuai za chuang hmanral anih thu a tarlang. Pu Saibal Kanti Roy, General Manager, MRB pawhin thu sawiin MRB chu mipuite tana luangchhuak thin Bank a ni a. MRB chuan Bana Kaih Scheme kaltlangin mi 280 hnenah loan ₹ 21 Crore chuang an pe tawh a, hei hi loan pek tawh zawng zawng atangin 68.13% a ni. DM&R Department pawhin MRB chu an Department sum enkawltu atana an rin ngam thu leh heng deposit hmanga mi dangte tana loan hmanga chanhai zawkte khaichhuah an nih thin thu a tarlang a ni.

He hunah hian Thar Roxx 4x4 Motor chu Disaster Management & Rehabilitation Department hnenah hlan a ni a. He thilpek hi Prof Dr. Lalnilawma, DM&R Minister in DM&R Department aiawhin a dawng a ni.

Minister zahawmtak Prof Lalnilawma pawhin thu sawiin, MRB ten hetiang thilpek hlu tak mai DM&R Department an pe chu a lawm thu a sawi a. Ram hmasawnna tur atana a bial a hmalakna tur chhawpchhuah a neih mekte sawiin chungah pawh chuan MRB chu thawhpui turin a sawm nghal bawk a ni.

Pu Shri Udit Prakash Rai, IAS, Commissioner & Secretary pawhin lawmthu sawiin Mizoram tana Bank tha tak MRB kan nei chu lawmawm a tih thu a tarlang bawk a. Pu Chuauhnuna, Director DM&R Department pawhin MRB thiltih chu fakin, tunah chuan chhiattawhna hmun kilkhawr pawh an kal theih tawh tur thu leh, an motor neih sa te chu hman a ngamawm tawh loh thu a tarlang a. Thilpek hlu tak petu MRB chungah lawmthu a sawi bawk a ni.

March ni 31, 2026 khan MRB hian CSR kaltlangin Department 4 laiah thilpek thahnem tak an lo hlan tawh bawk a ni.