Mizorama tourist pung zel chungchangah Tourism Deptt hotute leh Central YMA aiawhte inkawm

Aizawl | April 10, 2026: Tourism Lalnghinglova Hmar hovin Vawiin chawhnu dar 1:00 khan Tourism Department officer te leh Central Young Mizo Association (CYMA) hruaitute an inkawm a, Mizoram tlawhtu tourist pung zel lo dawnsawn leh inzirtirna kalpui kawngah thawhho theih dan tur an sawiho.

Tourism Minister Lalnghinglova Hmar chuan Mizoram tlawhtu pung zel chu sum leh pai leh a tha zawnga Mizoram tarlan kawngah thil lawmawm tak a nih rual in, thil tha lo ken tel a neih theih avangin fimkhur taka lo dawnsawn a tul tih a sawi a. “Kum 2025 September ni 13 ah Sairang thleng rel a lo lut a, October thla atang khan chawhrualin thlakhatah mi nuaikhat chuang tourist kan la nei a ni. Kum 2025 chhungin tourist nuai 8 chuang an awm a, kuminah a aia tam an awm kan ring. Hengte hi kan culture leh khawtlang nunphung ti dal si lova mikhual kan lo dawnsawn a, inven tulna kawngah kan lo inven theihna’n nasa taka zirtirna kalpui a ngai a, YMA nen thawhho kan duh a ni.” a ti.

Minister chuan sawi chhunzawmin, “Tourism hi kan tihfuh chuan Mizoram tan industry lian ber pakhat a ni thei. Kan zavaia min nghawng avangin a dawnsawn kawngah pawh kan tanrual vek a ngai a ni.” tiin, Council of Churches in Mizoram leh PCI Mizoram Synod hotute nen pawh hemi chungchangah an lo inkawm tawh a, kohhran dangte leh NGO dangte nen pawh inrawnkhawmna hi neih chhoh zel tum a nih thu a sawi.

Central YMA President R Lalngheta pawhin Mizoram rawn tlawhtute’n hun hlimawm leh nuam tak hmang se an duh a, chutihrualin a sahawk lutuk leh a ram neitute awm tinuam lo zawnga khawsa an awm palh thei tih a tarlang. Chutiang a thlen loh nan, Mizoram mipuite bakah tourist te hriattur pawimawh, an cham chhunga an tih tur leh tih loh tur (Dos and don’ts) mumal tak siam tha a tih thu a sawi.

Vawiina inkawmhonaah hian inzirtirna (awareness campaign) kalpui chungchanga sawrkar leh Central YMA thawhho theihna hrang hrangte sawiho a ni a. Tourism kaihhnawiha eizawng hrang hrangte bakah, tourist te hriattur pawimawh buatsaih leh sem thin a nih thu leh, YMA in ngaih pawimawh zawng a neih chuan sawrkar a inhawn thu tarlan a ni.

Mizorama tourist site hrang hrangte hlutna leh nihna phochhuak tur leh, tourist te pawhin hlawk leh tangkai zawka hun an hman theihna’n Tour Guide training kalpui mek a nih thu tarlan a ni. Homestay hman dan dik tawk lo awm thin chungchang te, Inner Line Permit leh Protected Area Permit kalpui danah tourism thlirna atanga rawtna awmte sawiho a ni bawk. YMA branch hrang hrang atangin tourist te’n harsatna an tawh a an contact theih tur inruat theih a ni em tihte pawh sawiho a ni bawk.

Ram leh hnam tana hmasawnna turah chuan sawrkar tichak a, thawhpui turin Central YMA a inhawng a. Ziaka thawhhona tur Memorandum of Understanding ziah chungchang pawh an lo ngaihtuah tur thu CYMA aiawhte chuan an sawi a ni.

Meeting-ah hian Tourism Department atangin Commissioner & Secretary Vanlaldina Fanai, Director R Lalrodingi leh officer dangte an tel a. Central YMA atangin President bakah Assistant General Secretary SF David Ngursangzuala leh Finance Secretary MS Ralte te an tel bawk a ni.