Mizoram Kuhva Chingtu Pawl-in Dan lova Kuhva ro tawlhruk man a ni lawmawm ti, "dan lova Kuhva ro tawlhtute kan dem a, sorkar hmalakna kan thlawp," ~ Mizoram Kuhva Chingtu Pawl

Aizawl | April 25, 2026: Mizoram Kuhva Chingtu Pawl chuan vawiin khan thuchhuah siamin, Dan lova Kuhva ro tawlhruk man a ni lawmawm an tih thu ans awi a, "dan lova Kuhva ro tawlhtute kan dem a, sorkar hmalakna kan thlawp," an ti bawk.

Mizoram Kuhva Chingtu Pawl, General Headquarters chuan ram leilung fa kut hnathawktute hma khawngaia dan lova foreign Kuhva ro tawlhruk Mizoram Police in an man hi lawmawm kan ti a, Ram leilung fa Kuhva chingtuten Mizoram chhung leh pawn lama kan thar chhuah ngei Kuhva kan hralhna daltu, dan lova Kuhva ro tawlhtute kan dem a, sorkar hmalakna kan thlawp takzet a ni.

Dan lova kuhva tawlhruk dapchhuahna leh man chhuah an nih theihna tur kawngah engtiklai pawhin Mizoram Kuhva Chingtu Pawl (MKCP) chuan sorkar hmalakna kan thlawp tlat a, Mizo mipuite pawh ram leilung fa kuthnathawktute hma khawngaia min hrethiam a, min thlawp a dan lova Kuhva tawlhruk min dopui zel turin kan ngen takzet a ni.

MKCP General Headquarters chuan MKCP district headquarters, Sub- headquarters leh branch hrang hrangte dan lova foreign Kuhva tawlhruk, mahni area theuh a lo veng tur leh Mizoram Police lo thawhpui theuh turin kan inhriattir nghal bawk e.