"Mizoram hi crime rate hniamna, ram ralmuang a ni a. India pum anga harsatna, hmeichhiate pawh an himin an zalen," ~ Vumlunmang Vualnam IAS

"Paite hnam hi hnam taima leh hawihhawm kan ni a. Kan awmna theuhah, midangte harsatna thlentu ni lova, malsawmna thlentu nih theuh i tum ang u," ~ Vumlunmang Vualnam IAS

Aizawl | April 10, 2026: Mizoram-a a vawikhatna atan Vawiin chawhma dar 11 khan Youth Recreation Center, Falkland-ah Paite Meet 2026 hman a ni a. Ministry of Finance hnuaia Department of Expenditure Secretary Vumlunmang Vualnam IAS chu khuallian a ni a. Mizoram Former Chief Secretary Haukhum Hauzel, IAS (Rtd) chu meet thlengtu niin, Central Board of Indirect Taxes and Customs (GOI) Principal Director General Vungzamuan Valte IRS chu khual zahawm a ni.

He meet thupui atan, “Unity, Peace and share roots” tih hman a ni a, programme hi Siamsinpawlpi (Paite Students’ Association), Paite Tribe Council, Zomi Cultural Society leh Zomi Inkuan Aizawl ten an buatsaih a ni.

He hunah hian khuallian chuan thu sawiin, “Mizoram-ah hetiang hun tha ka rawn hmang thei hi ka lawm a. India ram pum anga en pawhin Mizoram hi crime rate hniamna, ram ralmuang a ni a. India pum anga kan harsatna, hmeichhiate pawh an himin an zalen a. A lawmawm ka ti khawp mai. Manipur a ka thawh lai phei chuan, Mizoram hi kan chung en hle thin a ni. In changkang a, hma in sawn hle a, kawng engkimah in entawn tlak hle a ni.” a ti.

Zofa ten hma kan sawn zel a, chutih rualin kan tawng leh culture-ah Zofaten kan dinhmun kan enfiah a ngai. Tawng thiam tam hi chankanna a ni a, chutih rual chuan Sap tawngin kan pianpui tawng a luahlan lek lek erawh kan fimkhur a ngai a ni a ti bawk.

Khuallian chuan, "Mizorama awm kan nih avangin, Mizo tawng thiam ber nih kan tum ang a, mahni hnam tawng pawh kan theihnghilh tur a ni lo. Hei hi mi changkangte awm dan a ni," tiin, "Paite hnam hi hnam taima leh hawihhawm kan ni a. Kan awmna theuhah, midangte harsatna thlentu ni lova, malsawmna thlentu nih theuh i tum ang u," tiin meet palai kalkhawmte a fuih.

Khual zahawm Vungzamuan Valte IRS leh Meet thlengtu, Pu Haukhuma Hauzel pawhin thu an sawi.

Khawmpui hi Pu Ngulzathuama MCS, Chairman, Organising Committee in inlawmna thu sawina hun a hmang a, Khawmpui neih chhan sawitu Dr. H. Lianzela IAS chuan; Paite hi Mizoram neitu kan ni a, thahnem tak kan awm a, chutih rualin kan darhsarh hle a. Unau karah inpumkhatna tha a awm theih nan te, inremna leh thawhhona tha a awm theih nan te. Khua leh tui tha ni tura infuih tharna atan leh dinhmun inhriat sak a, dinhmun harsa zawkte pawhin hmasawnna an neih theih a nih beisei a meet hi buatsaih a nih thu a sawi.

He hunah hian Paite hnam atanga Mizoram tana thawhhlawk tak tak, Politician, Officer leh kawng hrang hrang a hlawhtlinna chang mi za chuang hnenah chawinawina hlan an ni a. Zo Reunification Organisation (ZORO) leh Mizo Students’ Union (MSU) aiawh ten thu an sawi bawk.

Paite Meet 2026 ah hian Mizoram chhung hmun hrang hrang atangin palai sang khat vel an kalkhawm a ni.