LBS Suzuki-in an hralh theih Burgman thar an tlangzarh

Aizawl | April 14, 2026: Lirthei zuar zinga Mizorama hralh tam ber LBS Suzuki chuan thla liam ta chhungin Burgman 400 chuang an hralh a, thawhlehniah an showroom, Bawngkawnah a chhuak thar Burgman Street an tlangzarh.

April 2 khan India ramah tlangzarh a ni tawh a, ni 12 hnuah LBS Suzuki managing director Pu Joseph Lalthanpuia leh Loz Hnamte chuan Mizorama hralh chhuah turin an khuh hawng. Tlangzarh inkhawmah hian hauh lawk mi 120 zinga 10 hnenah an pe chhuak nghal a ni.

Info Bikes chief test rider Pu Vanlalmuana chuan Burgman Street thar an khalh chin tawh tih sawiin, chhuak hmasa aiin seat a hniam a, engine inang mah se a pickup a chak zawk a, a suspension an tihdanglam avangin a sawh a na lo zawk bawk, a ti.

Burgman Street hi chi hnih - tihnun nan chabi hman ngai lo leh hman ngai a awm a; a hmel leh pianhmang rawn tidanglamin a hma aiin a pui hmel zawk. Burgman ṭhatna - khalh hahdam leh nghet, ke thluan theih leh gas phurh theih, seat sei ṭha tak a la ni reng chungin changkang zawka thuam a ni a, seat hnuai hawn ngai kher tawh lovin petrol thunna dah a ni.

Chabi ngai lo chi Rs 1, 47, 995 (on-road price)-in lei chhuah theih a nih laiin, chabi hman ngai lei nan Rs 1, 37, 974 sen a ngai ve thung.

LBS Suzuki hi Suzuki Motorcycle India hnuaia dealer hrang hrang zinga lian leh hralh hnem ber pawl a ni chho char char a. 2026 bikah January aṭanga March, thla thum chhungin Suzuki two-wheeler 2, 706 an hralh a, heng zingah hian mipuiin Burgman an lei hnem.

February khan 1, 001 hralh chhuakin thla liam taah an tla hniam hret a, 940 an hralh. March bikah hian Burgman 401 hralhin a tam ber a, Access 399 hralh bawkin an inthlau lo viau thung.