Hmeichhe minister-in Lalpa zanriah buatsaih

Aizawl | April 3, 2026: kristiante hunpui, Good Friday hma zan 'Venpui zan' chu nizan khan kohhran hrang hrangin Pathian biak inkhawm leh Lalpa zanriah nen hman a ni a.

Baptist Church of Mizoram (BCM) Republic Vengthlang kohhran-ah chuan BCM hnuaia hmeichhe minister ordain hmasa ber Rev Prof RL Hnuni'n Lalpa zanriah a buatsaih.

Rev Prof RL Hnuni hi March 11, 2012 khan BCM Assembly-ah minister atan ordain a ni a, hetihlai hian BCM bible college - Academy of Integrated Christian Studies (AICS) principal a nih lai a ni a, Dr RL Hnuni tia a hming ziah a ni.

Rev Prof RL Hnuni hi 1951-ah a piang a, A pa chu R. Lalthianga (L) Ramlaitui (Lunglei Dist) niin a nu hi Khawngaihthangi (L) Hmuntlang (Lunglei Dist) an ni. 1975 ah NEHU-hnuaiah ah B.A History 24th position niin Hons a zo a. B.D 1979-ah Bachelor of Divinity (B+ (High second Class)-ah a passed bawk. 1980-ah Rev. Dr. K. Thanzauva nen inneiin kum khat hnu-ah in Eastern Theological College, Johat-ah Lecturer-in an thawk dun a. 1983-ah M.Th chu an nupa-in United Theological College, Bangalore-ah an zir a, Eastern theological College atanga tirh an ni, 1985-ah M.Th chu First Class-ah a passed. Doctor of Theology: D.Th chu South Asia Theological Research Institute (SATHRI), Senate of Serampore College (University) United Theological College Bangalore-ah 1991-ah preparatory period kum 1 chhung a zir leh a, a pasal erawh chuan Whitley College, Melbourne-ah Admission a hmuh avangin September 1990-ah Australiaah a kalsan a. Kum khat preparatory period a tih hnu-ah research a ti thei chauh a ni.

1992-ah Exposure program Senate-in neih a phal a, an chhungkua-in Melbourne-ah a pasal zirna hmunah chuanan kal a. Research hna tak tak chu Melbourne-ah kum 2 chhung a thawk a, India ramah 1994-ah an lo kir hnuin Germany –ah 1995-ah Bochum University-ah a ziak chhunzawm a. Library hrang hrang Bochum Univ. Bielefeld, leh Wuppertal Hochshule Library te hmang tangkaiin a thesis a ziak zova. Doctor of Theology degree chu 1997-ah Senate of Serampore-in Convocation, Mangalore-ah a pet a a ni. India ram pumah hmeichhe zingah Old Testament subject-a M.Th leh D.Th degree nei hmasa ber a ni.

Mizoram Baptist Kohhran History-ah Hmeichhia, Minster atana ordain hi an la awm ngai lova, Rev Prof RL Hnuni ordain a nih ṭum khan a hmasa ber a ni. BCM Assembly 2011-chuan Pastor ni lo, Minister-a ordain dan a siam thar a, chu Dan hmang chuan Rev Prof RL Hnuni chu Minister atan ordain turin Pastoral Committee leh Assembly Executive Committee chuan a thlang a. Hei hi BCM History-a thil thar danglam tak pakhat a ni. He Ordination hi Pastor atana Ordain a ni lova, Woman Ordination pawh a ni chuang lo. Minister atana Ordain (Ordination for Minister) a ni. RL Hnuni Ordain tur hian BCM Pastoral Committee te, Executive Committee leh Central Committee te paltlang vekin Assembly ah Report a nih hnu-ah March 11, 2012 khan Pro Pastor zir chhuak mi dang pangate rualin ordain a ni ta a ni.