ZoCareer Solutions buatsaih Pre NEET / SMATEE 2026 Top 10 a langte lawmpuina hun hmang

Aizawl | March 9, 2026: ZoCareer Solutions, Chanmari chuan Mizoram chhunga Pawl 12 Science Subject zirlaite tana inelna a buatsaih Pre NEET/SMATEE 2026-a Top 10 a langte lawmpuina hun chu vawiin khan Hotel Regency Conference Hall-ah an hmang.

ZoCareer Solutions Founder Dr Lalhruaitluanga chuan he Exam buatsaih anih chhan sawifiahin, Zirlaite chuan Medical leh Technical Entrance Exam atan an lo inbuatsaih lawk theihna atan leh tawn hriat tha zawk an neih theihna tura buatsaih a nih thu sawiin,Zirlaite chu Midangte tana malsawmna ni turin a chah a. Kan ram leh hnam tan malsawmna thlentu thalai ni turin leh Mizoram mai nilo, National Level thleng pha theuh tura inbuatsaih zel turin zirlaite chu a chah a ni.

Pre NEET/SMATEE 2026 hi January Ni 24th 2026, Inrinni khan Govt. Hrangbana College-ah buatsaih a ni a. He Exam hi Mizoram chhunga Pawl 12 Science Subject zir mekte tana a thlawna buatsaih niin, Darkar 3 chhung Exam hi neih a ni. Exam Question hi NEET leh SMATEE kalphung ang chiaha siam a ni bawk. OMR Answer Sheet hmangin zawhnate hi chhan a ni.

Mizoram hmun hrang hrang atangin Zirlai Mi 710 te chuan He Pre NEET/SMATEE hi an hmachhawn a. Top 10 alang pha te hian lawmpuina thuziak bakah an zirlai atana tangkai tur lehkhabu leh pawisa fai an dawng a ni.

Program hi ZoCareer Solutions Director RK Hnuna chuan kaihruaiin, Rev HD Ramngaihawma, Counsellor, Family Guidance & counselling Center Vaivakawn chuan hunserh a hmang a. ZoCareer Institute Academic Head Lalchhanchhuaha chuan Technical Report a pe bawk a ni.