Mizoram-ah Vaihlo, zuk leh hmuam ti 58.7% awm mek, India ram pumah pawh a sang hle!

Aizawl | March 24, 2026: State Tobacco Control Cell, National Tobacco Control Programme, National Health Mission buatsaihin “Training of Trainers for Mizoram Government Dental Surgeon” chu vawiin khan DHME Auditorium-ah neih a ni. He training hi Sawrkar hnuaia Dental Surgeon thawk mek te tan a buatsaih a ni.

He training ah hian National Tobacco Control Programme (NTCP) Additional Director (Dental) cum State Nodal Officer Dr Zoramthangi Renthlei chu chairperson niin he hun hi a kaihruai a, Additional Director Dr Zonunmawii Pachuau chu Special Guest niin he hun hi a hmanpui a, kalkhawmte chu rinawm taka sawrkar tana thawk tur leh Sawrkar hnathawk te hriatpui pawimawh tak tak a sawi.

NTCP State Consultant R Lalremruata chuan Powerpoint Presentation hmangin National Tobacco Control Programme hmalakna hrang hang a tarlang a, Hospital tina Doctor te hnathawh tur leh an tih tur hrang hrang te leh vaihlo sim thei tur a puih dan tur chungchang te hrilhhriatna a nei. NTCP State Legal Consultant Vanlalzari'n COTPA 2003 te, PECA 2019 (E-Cigarette khuahkhirhna dan) te chungchang sawizauin zirhona neih a nih bakah duh zawng sawihona hun tha tak neih a ni bawk.

Vaihlo zuk leh hmuam hman tam lamah hian Global Adult Tobacco Survey (GATS) 2016-17 in a tarlan angin India ram pum ah pawh kan sang hle mai a, 58.7% in vaihlo zuk leh hmuam kan hmang mek a ni. Hemi piah lamah hian Global Youth Tobacco Survey – 4 kum 2019 a neih in a tarlan dan in zirlai kum 13 atanga 15 inkar zingah vaihlo zuk leh hmuam hmang mek hi 58% zet an awm bawk a ni. Vaihlo zuk leh hmuam hman hian natna hrang hrang a thlen thei tih chu mi tam zawk te chuan kan hre tawh awm e, vaihlo zuk leh hmuam hman hian kan landan thlengin a ti danglam thei tih kan hriat a hmel nung tak leh hrisel tak te kan put reng theih nan kan insum theih hi a pawimawh hle a ni. Thangthar te tan phei chuan vaihlo zuk leh hmuam tello (Tobacco Free Lifestyle) a khawvel kan hman hun a nghahhlelhawm tawh hle a ni. Hemi nei thei tur hian mitin kan pawimawh vek a chutih rualin nu leh pa te hian kan fate vaihlo zuk leh hmuam hmang lo tur a zirtirna kan pek tam hi a pawimawh tak zet a, tunlaiah kan ramah ruihhlo a hluar hle mai a, mi thiam te chuan ruihhlo hman tanna kailawn (Gateway substance) an tih chu vaihlo zuk leh hmuam hi a ni. Hemi a nih avang hian hriselna a khawih chhiat bakah economy thlengin a nghawng thei a ni tih te kan ngaihtuah a hun tawh hle a ni.

NTCP Programme Assistant T Lalbiaksanga chuan sawmna ngaipawimawh a hmun hla tak tak atanga rawn kalkhawmte hnenah lawmthu a sawi bawk.