GAC in Aizawl Faina chungchang inrawnkhawmna buatsaih

Aizawl | March 23, 2026: Govt Aizawl College (GAC) hnuaia Research, Innovation and Extension Cell chuan vawiin khan Aizawl khawpui faina chungchanga inrawnkhawmna, ‘Consultation on Clean Aizawl: Urban Cleanliness and Visitor Management ' tih hmangin an buatsaih a. He hun hi Prof Vanlalringa Bawitlung in kaihruaiin, college Principal Lalbiakzuala’n inlawmna thu a sawi a ni.

He inrawnkhawmnaah hian Aizawl Smart City Ltd Dy CEO V Lalruatliana chu keynote speaker niin Aizawl khawpui faina lama kan hmasawna hrang hrang te sawiin tan kan lakna tur hrang hrang te a tarlang bawk. Aizawl khawpui a fai chuan khawpui dang pawh hi a fai chho zel thei a ni tiin nasa lehzuala faina lama hma la turin a fuih a ni.

He inrawnkhawmnaah hian research institute, media, social activist leh academic institute atangin MIAS Secretary Rochamliana, Zonet (Media) Lalnuntawma Fanai, Activist and Environmentalist Vanramchhuangi, leh PUC Asso. Professor Dr Vanramliana ten an tel pui thei a. Sawiho hun hi GAC Asst. Professor Dr C Lalengkima'n kaihruaiin sawihona zau tak leh hun tha tak hman a ni. He programme hi Aizawl Smart City Ltd ten an sponsor a ni.