Central YMA-in Sairang - Vairengte kawng siam endik

Aizawl | March 10, 2026: CYMA Road Monitoring Committee chuan Nimin March 9, 2026 (Thawhṭanni) khân Sairang to Vairengte National Highway siam ṭhat mek chu an endik a. Hnathawktu Contractor hrang hrangte hmasawn dan chu ṭha thawkhatah an ngai a; ṭan lak nasat zual ngai Contractor, J Infratech Limited chu hnathawktu tam zâwk lak belh tur leh, hun tiam chhunga hna thawk zo hman ngei tûrin an hrilh bawk a ni.

Sairang Zero Point aṭanga Buichali Bridge inkâr te, New Khamrang to Kawnpui leh Kolasib to Bilkhawthlir kawng te siamtu Contractor, J. Infratech Limited te chu, tun dinhmuna an hnathawh dan thlirpui chuan, hna thawh zawh hun tura an intiam hun April 30, 2026 a an hna zawng zawngte an thawh zawh vek hman loh an hlauh thu, CYMA hruaitute chuan an hrilh a. Hnathawh quality chhiat phah hauh lo chunga, a chak thei ang bera thawk chhunzawm zêl tûr leh, hnathawktu pawh a tam thei ang ber lâk belh turin an hrilh a ni.

CYMA Road Monitoring Committee ten kawng siam an endiknaah hian, Kolasib leh Rengtekawn inkar kawng siam an endik laiin, alkatra (Bitumen Concrete mix) kawngpuia an chap darh tawh, road roller-in a la chilmuk loh chu chik zawkin an endik a. A sat zawng (temperature) chu pawm theih chin aia a hniam tawh avangin paih vek turin an hrilh a. CYMA hruaitute awm lai hian, JCB hmanga hai khawkin an paih leh nghâl vek a ni.

Sairang to Vairengte kawngpui siam hna kal mekah hian, Buichali Bridge to New Khamrang inkar thawktu Contractor, BRC Company te chuan tun March thla chhung hian thawh zawh vek hman an tum thu CYMA hruaitute hi an hrilh a. CYMA hruaitute pawhin a hmuna an hnathawh dan an enpui aṭangin, tun thla chhunga an thawh zawh hman an rinpui a, lâwmawm an ti a. Kawnpui to Kolasib leh Bilkhawthlir to Vairengte inkâr kawng siamtu Contractor, Balaji Constructions Company te chuan hna an thawk zo thawkhat tawh tih an hmu a, CYMA hruaitute chuan lawmawm an ti hle a ni.

Kawng siamtu Contractor-te hian an harsatna tawh hrang hrangte leh, puih an ngaihnate CYMA hruaitute hnênah an lo thlen ve bawk a. Duh anga hna an thawh chak tawk theih lohna chhan an sawi pakhat, kawng siam endiktu an tam lutuk leh, endiktu hrang hrang an rawn kal apianga Contractor (Company) lama a hmuna ṭhutchiltu zingah, a hotu lu ber ten ṭawiawm zêl a ngaih ṭhin avanga, an ni tin hna thawhin a tawrh phah thu an sawi chu, CYMA hruaitute chuan an hriatthiampui a. A theih chuan kawng endiktu dangte pawhin, an remchân huna kal tawp lo deuhin, NHIDCL leh Contractor-te remchan hun zawt hmasain, programme siam theih nise an duhpui hle a. Tin, endiktu hrang hrang ten hnathawh hmasak tur chungchangah, duh dan hrang an neih ṭhin avanga, Contractor ten harsatna an tawh thu an sawi te pawh an hriatthiampui a. A theih chin chinah NHIDCL leh Contractor ten, ruahmanna an siam lawk anga hna thawhtir theih nise an duh thu an sawi ve bawk a ni.

Kawngpui siam endiknaah hian CYMA Road Monitoring Committee Secretary, Er K Lalrimawia, CEC leh RS Lalrinsanga, CEC te an kal a. Kolasib Sub-Headquarters YMA Road Monitoring Committee hruaituten an lo ṭawiawm bawk a. NHIDCL Project Manager leh Contractor-te aṭangin an Project Coordinator leh Engineer ten an lo dawngsawng zel bawk a ni.

CYMA Road Monitoring Committee hian, kumin January ni 10 a Sairang to Vairengte kawng siam hna an endik tawh bâkah, Sihphir to Kawnpui kawng BRTF-in an siam mêk chu, kumin January ni 15 leh ni 23 ahte khan an lo endik tawh bawk a ni.