Team 12 telna MFA Cup vawi 24-na Lunglei-ah khel tan

Aizawl | Feb 17, 2026: Mzioram Football Association (MFA) Cup vawi 24 na chu nizan khan Convention Centre, Lunglei-ah Lunglei Municipal Council Chairman Lalzuithanga Khiangte chuan a kick off a, football-ah zirlai pawimawh tak tak a awm thu a sawi.

-Lalzuithanga chuan inkhelhah ti goal tura mahni chauha tih theih a nih loh thu leh thawhhona team work a pawimawh thu a sawi a; chumi ti thei tur chuan rilru, taksa leh thlarau chak tha/fit a pawimawh thu a sawi a ni.

MFA Cup vawi 24-na Organizing Committee Chairman PC Lalramnghaka, in a kaihhruai MFA Cup hawnna inkhawm hlimawm leh tawi fel takah hian hunserh hmangtu Rev. Dr. F. Lalsangliana, BCM Rahsi Veng Pastor Bial chuan rilru thianghlim tak leh fet lova inkhel turin infiammite chu a chah a ni.

MFA Honorary Secretary Lalrengpuia chuan Zoram dung leh vanga hlawkna um hauh lova football buaipuitute hlut zia sawiin, Club level a inelna chu grassroots leh youth level a hmalakna rawn par chhuahna a ni tih sawiin MFA Cup chu a hlu hle a ni, a ti a. MFA CUP khel thei tura District hrang hrang Football Association hruaitute hmalakna chu fakawm a tih zia a sawi bawk.

Lalrengpuia chuan ISL leh I-League a player tam ber pawh hun kalta a MFA Cup lo khel tawh te an ni tiin, nakumah MFA Cup Silver Jubilee kan lo thleng dawn ta der mai chu phurawm leh nghahhlelhawm a tih thu a sawi bawk.

MFA Honorary Secretary chuan khelmual chhunga infiammite chet mawi lohna in game a tihhmel mawi loh thin avangin mawi taka khel turin player te a chah bawk.

MFA Cup vawi 24-na Organizing Committee Secretary Rongaia Ralte in report a pek danin MFA Cup hi kum 1999 atanga khelh tan a ni a, champion hmasa ber chu 1st Bn MAP te an ni a, champion lai chu Electric Veng FC, Kolasib te an ni.

Lunglei DFA Ziaktulian Rongaia Ralte chuan 24th MFA Cup atan hian Organising committee member 45 an awm thu sawiin, committee hrang hrang an din thu a sawi a. District tin a club champion te bakah a thlengtu District FA in he inelnaah hian club pahnih an thawh thu a sawi bawk.

India International player hlui Lalrindika Ralte chuan player te mawi leh felfai taka inkhel tura intiamkamna neih tirin khelmual chhung leh pawnah an intiamna chu rilru taka vawng reng turin a chah a ni.

Match hi vawiin khan khelh tan a ni a, hetiang hi he thu buatsaih laia match dinhmun a ni.