"Ruihhlo do turin rinawmna leh teirei peih a ngai,"

Aizawl | Feb 17, 2025: YMA Venghnuai Branch ten zanin khan YMA Kumpuan hawnna hun an hmang a, kumpuan hawngtu Central YMA General Secretary Prof. Malsawmliana chuan, Ruihhlo do tura YMA te kan pen chhuahna kawngah rinawmna leh teirei peihna neih a tul thu a sawi.

Venghnuai Branch YMA kumpuan hawnna hun hi Rokunga Hall-ah hman a ni a, Pu V. Malrosanga, Branch President in a kaihruai.

Prof. Malsawmliana, General Secretary, Central YMA chuan kumpuan hawngin, “ kan ramin ruihhlo leh a kaihhnawih avanga harsatna leh thalai tam takin nunna an chan avang te, chhungkaw kehchhiatna thleng nasa lutuk avangte in YMA chuan ruihhlo lakah indo a puang a. Ruihhlo do tura YMA te kan pen chhuahna kawngah rinawmna, teirei peihna leh inpekna te, thawhhona tha te a pawimawh” thu a sawi.

“ Ruihhlo ti tlem tura beihna ( supply reduction) bakah a la ti ve lo te venhim leh zirtirna pek kawngah YMA ten theihtawp chhuah a tul zia te, ruihhlo ngaite enkawlna kan neih chhun leh YMA ten mamawh thulha kan indah luh zung zung theihna Home te puibawm that an tul thu te; ruihhlo man danah dan dik taka kal pui a tul zia te a sawi.

Venghnuai Branch YMA atang hian Dam Veng Branch YMA leh Salem Veng Branch YMA te a lo indang tawh a, tunah hian kum 80-na an hmang mek a ni. Kumpuan hawnnaah hian Central YMA atangin General Secretary bakah CEC member te - Pu RS Lalrinsanga, Pu Lalsawma Ralte, Dr Lalrinawma Hnamte, Pu F. Lalfakawma, Pu Rayner Malsawmtluanga, Pu Ramdina Varte, Pu RC Vala, Pu Anthony Lalhriatpuia, Pu Lalrinzuala, Pu Levia Vanlalruata te an tel a, Central YMA Treasurer lo ni tawh, Pu C. Remtluanga a tel bawk.