"Ruihhlo Do hian chhungkaw hlimna thlen se kan duh ber,"

Aizawl | Feb 25, 2026: YMA Hunthar Branch chuan Feb 24, 2026 (Thawhlehni) zan khan YMA Kumpuan Ruihhlo Do Hawnna hun hmangin Central YMA General Secretary Prof Malsawmliana'n kumpuan hi a hawng.

Kumpuan hawnna hun hi YMA Hunthar Branch President Remnalalliana'n a kaihruai a ni. YMA Hunthar Branch Secretary VL Malsawma Renthlei chuan report leh inhmelhriattirna hun a hmang a, CEC member Lalbuatsaiha'n Lawmthu sawina hun a hmang bawk.

Prof. Malsawmliana chuan kumpuan a hawn pah a thusawiin, Ruihhlo hi chhungkaw tikehtu, thalai nun suattu, fahrah leh hmeithai tam tak siamtu a nih avangin tha thlah lovin kan do a tul tak zet thu a sawi a. Mizorama Home leh Centre hrang hranga awm tam ber chu ruihhlo leh a kaihhnawih vang a awm an nih thu leh naupang enkawlna ah pawh chhungkaw inrelbawlna tha lo avanga enkawl an tam a; kumtling lo zingah Pathian awm ringhlel hial an pung ta te hi ruihhlo in a hrinchhuah a ni.

Ruihhlo hian crime a ti pung a, chhungkua tlakranna a siam bawk a. YMA in ruihhlo kan do avang hian chhungkaw tam tak, ruihhlo avanga hlim ni hmel hmu tawh lo leh kehchhe tawh ten hlimna rawn hmuh phah se tih hi kan duh ber a ni. Ruihhlo zuartute hi kan Society ah hian an leng tur a nilo, kan endawng a ngai, tiin a sawi.

Sawma hi CEC - Zoramthanga, R Lalthanzuala, PC Lalthanhlira, RL Thanhnuna, C Lalthlamuana, Lalbuatsaiha, Lalrampara, Jacoba Chawngthu, Israela, Anthony Lalruatpuia leh Manliana bakah YMA Vaikawn Branch President PC Lalhuapzauva ten an tawiawm a ni.

YMA Hunthar Branch hi kum 1985 khan Vaivakawn Branch YMA atangin an in dang a ni.

He hunah hian B Lalnunfela, Syed Mushtag Ali Trophy, Plate Group 3 2025 a Mizoram Team Member chawimawina hun hman a ni.