Aizawl | Feb 9, 2026: Railway Minister Ashwini Vaishnaw chuan vawiin khan Guwahati atangin Sairang leh Silchar inkar Rel service thar leh Gauhati Rel Station-a Blended Hospitality Service hawnna a nei a, Sairang Rel Station-ah he mi pual hian inkhawm buatsaih niin Chief Minister Lalduhoma chuan a telpui a. Minsiter Prof Lalnilawma, Minister B Lalchhanzova leh Adviser to CM leh bialtu MLA ni bawk TBC Lalvenchhunga, ten an tawiawm.
Thu sawiin Chief Minister chuan, Prime Minister Pu Narendra Modi kaihhruaina hnuaia Act East hmalakna zarah Mizoram leh hmarchhak bialte chu ram hmasawnna lana hmun pawimawhah a chang chho mek a. Hmun kilkhawr zawka ngaih thinte chuan inkalpawhna tha zawk kan nei chho mek a ni. Vawiina kan hawn thar Sairang leh Silchar rel service hi chung zinga pakhat chu a ni. He rel Service thar hian Assam nena kan inpawhna a ti tha lehzual ang a, Sawhthing leh thlai dang kan tharchhuahte hralhna tur zau zawk min hawnsak ang a, kan flagship scheme Bana Kaih hi a ti chak dawn a ni.
Sairang leh Silchar inkar rel tlantir tura ka dilna min tihhlawhtlinsak avangin Railway Minister Pu Ashwini Vaishnaw chungah lawmthu ka sawi a. Silchar hi kan thenawm khawpui pakhat a ni satliah lova, economic lama kan kawngpui pawimawh a nih avangin he rel Service hi kan economy chuan a thatpui dawn a ni.
Thla nga liam ta mai khan Sairang rel station hi hawn a ni a, hawn a nih atanga hun reilote chhungin a tihchangtlunna hna tam tak thawh a lo ni leh tawh a. Railways hmalakna hian fak a phu a, a bik takin NF Railway Lumding Division te chungah lawmthu ka sawi a ni, a ti.
Chief Minister hian, Handholding Scheme ti chak leh zualtuah leh Mizoram loneitute tan Sairang Station-a Warehouse sak a tul thu te, Thenzawl Peace City thlenga rel kawng kalna tur tihfel thuai a tul thu te a tarlang a. Delhi – Silchar Rajdhani Express chu Delhi – Sairang ni tura tihsei (Extension) tul a tih thu a tarlang bawk.
Bialtu MLA Pu TBC Lalvenchhunga, Adviser to CM pawhin thu a sawi a ni.
Chief Minister leh Ashwini Vaishnaw te hian Sairang – Silchar Rel Service thar hi an vailiam a, kar khatah vawi nga a tlan thin dawn a ni.
A hawnna inkhawm neih zawhah Chief Minister hian a ngenna anga Sairang rel Station, World Class Rel Station-a siam tura tih fel tak design a en a. Railways thawktute hian hnathawhna tur Rs. 97 Crore sanction a nih thute, tender an tihchhuah tawh thute leh tender hi thla thar March thlatir lama hawn an tum thu an hrilh a ni.
Vawiin chhun dar 12 khan Sairang rel station-ah Chief Minister Pu Lalduhoma hovin Sairang leh Silchar inkar rel service tur vai liamna inkhawm neih a ni a; Union Railway Minister Pu Ashwini Vaishnaw chuan online-in rel service tur hi a vailiam.
Sairang to Silchar rel service tur hi No. 05679 niin kar khatah vawi 5 a kal thin ang.
CM Pu Lalduhoma chuan thutawi sawiin, “Prime Minister Narendra Modi hmathlir ropui tak mai, India hmarchhak state te hmasawnna tura a beihna kawng khat; inkalpawhna tha kan neih theihna tura sum tam tak a ruahman avanga hetiang hmasawnna ropui tak kan hmu hi PM Modi chungah pawh kan lawm hle a ni,” a ti a. “Silchar hi thenawm state khawpui pakhat a ni satliah mai lova, hman atanga Mizoramin ei leh bar kan chawk luhna khawpui pawimawh tak a ni a. Thla 5 lek kaltaah Mizoram khawpui Aizawl dai leh India ram khawpui ber Delhi te, kan chhuahka pawimawh Kolkata te thlunzawm a nih hnu lawkah, tunah Sairang atanga Silchar bik kal tur a hranpaa rel kan nei leh tur hi a lawmawm em em a, kan state sorkar policy Handholding Scheme atan pawh he rel service hi a tangkai ngei ka beisei,” a ti.
CM chuan Union Railway Minister hnenah Mizoram mamawh Sairang rel station bula hmalakna tur thenkhat te a thlen nawn leh nghal bawk.
Chief Minister hi Minister pahnih Pu B. Lalchhanzova leh Prof. Lalnilawma bakah; he station awmna Aizawl West I bialtu MLA & Adviser to CM (Finance) Pu TBC Lalvenchhunga, MLA & ZPM Thalai Headquarters President Pu Jeje Lalpekhlua leh Media Department ten an tawiawm a ni.
Union Railway Minister Pu Ashwini Vaishnaw-in Sairang leh Silchar inkar rel tlan tur vai liam
Chief Minister Pu Lalduhoma hovin a vai liamna inkhawmah tel
Dated Aizawl, the 9th February: Vawiin chhun dar 12 khan Sairang rel station-ah Chief Minister Pu Lalduhoma hovin Sairang leh Silchar inkar rel service tur vai liamna inkhawm neih a ni a; Union Railway Minister Pu Ashwini Vaishnaw chuan online-in rel service tur hi a vailiam.
Sairang to Silchar rel service tur hi No. 05679 niin kar khatah vawi 5 a kal thin ang.
CM Pu Lalduhoma chuan thutawi sawiin, “Prime Minister Narendra Modi hmathlir ropui tak mai, India hmarchhak state te hmasawnna tura a beihna kawng khat; inkalpawhna tha kan neih theihna tura sum tam tak a ruahman avanga hetiang hmasawnna ropui tak kan hmu hi PM Modi chungah pawh kan lawm hle a ni,” a ti a. “Silchar hi thenawm state khawpui pakhat a ni satliah mai lova, hman atanga Mizoramin ei leh bar kan chawk luhna khawpui pawimawh tak a ni a. Thla 5 lek kaltaah Mizoram khawpui Aizawl dai leh India ram khawpui ber Delhi te, kan chhuahka pawimawh Kolkata te thlunzawm a nih hnu lawkah, tunah Sairang atanga Silchar bik kal tur a hranpaa rel kan nei leh tur hi a lawmawm em em a, kan state sorkar policy Handholding Scheme atan pawh he rel service hi a tangkai ngei ka beisei,” a ti.
CM chuan Union Railway Minister hnenah Mizoram mamawh Sairang rel station bula hmalakna tur thenkhat te a thlen nawn leh nghal bawk.
Chief Minister hi Minister pahnih Pu B. Lalchhanzova leh Prof. Lalnilawma bakah; he station awmna Aizawl West I bialtu MLA & Adviser to CM (Finance) Pu TBC Lalvenchhunga, MLA & ZPM Thalai Headquarters President Pu Jeje Lalpekhlua leh Media Department ten an tawiawm a ni.
Issued by
Media & Publicity Deptt.
ZPM Gen. Hqrs., Aizawl
Issue No. 20 of 2026
Date: 09/02/2026
Post a Comment
He post chungchanga i ngaihdan lo sawi ve rawh: