MTKP-in Mahni intihlum an tlem theihnana inzirtirna neih rel, kumin budget atan nuai 18 pawm

Aizawl | Feb 26, 2026: Mizoram Baptist Kohhran hnuaia thalai pawl, Mizoram Thalai Kristian Pawl (MṬKP) Rorel vawi 72-na vawiina neih chuan, Mahni intihlum an tlem theihna tura Inzirtirna neih, TKP Platinum Jubilee pualin Christian Hospital Serkawn-a dah tur Ventilator khawl pakhat lei a dah leh kum hmasa lama MTKP-in a bawhzui tawh 'Thlarau Bo man beihpui thlak' chu kum 2026-2027 chhung hian hmalak chhunzawm zel turin a rel.

Mizoram Ṭhalai Kristian Pawl (MṬKP) rorèl vawi 72-na chu vawiin khan BCM Biak In, Electric Veng, Lawngtlai-ah neih a ni a, rorêl palâi an kal ṭha hle.

MṬKP rorêl vawi 72-na hi MṬKP President Upa R Lalbiakzuala'n kaihruaiin, kum kal tàa ṬKP member ropuina rama kalte sûnna hun ngawi rengin minute khat dingin hman a ni a, MṬKP Senior Adviser Upa K Lalduhawma'n an kalsan chhûngkua leh rawngbâwlpuite tâna ṭawngṭàisakna hun a hmang.

MṬKP rorèl ah hian palâi mi 633 kalin, Unit aiawh mi 407, Bial aiawhin mi 184 leh MṬKP Executive 42 niin Palai kal thei zat tura beisei 680 aṭangin 633 (93%) an kal thei a ni.

Rorel naah hian BCM General Secretary, Director, Fellowship Department, Bialtu Pastor, MBMP, MBKHP KNP Promoter leh Co-opted 2 te’n telpuiin heng bakah hian palâi sàwmte aṭangin APBY te’n rorel hi an telpui bawk a ni.

MTKP Secretary Rev F Zorinkhuma hnèn aṭangin MṬKP hma lâkna hrang hrang report ngaihthlâk a ni a, kum 2025 rorèl leh 2026 rorèl inkârah ṬKP member ropuina rama kal mi 166 (Mipa 139 leh hmeichhia 27 ) an awm a, innei tuak 602 awmin, Kohhran Dân Puitlinga innei tuak 400 leh Dân tea innei tuak 202 an awm a ni.

Treasurer Grace Lalrindiki leh Finance Secretary Rbt PC Lalbiakdika te atangin sum dinhmun hetiang hian ngaihthlak a ni. Kum 2025 - 2026 chhûngin ₹ 81,58,731/- hmuh a ni a, hèng aṭang hian ₹ 71,49,293/- hman niin Balance ₹ 10,09,438/- a awm a ni.

Ṭhalai Êntu Circulation Manager - Rev F Zorinkhuma’n Ṭhalai Êntu Financial Report a pe in kum 2025 chhung khan ₹ 26,14,858/- hmuh a ni a, semchhuah kawngah te leh printing lamahte hman ṭhin a nih angin ₹ 17, 59, 109 hman ral a ni . Ṭhalai Êntu Editor - K Lalremkima hnèn aṭangin Ṭhalai Êntu dinhmun ngaihthlâk chhunzawm a ni a, Ṭhalai Entu hi Hard Copy leh Digital Subscibtiona a awm thute sawiin ṬKP member te’n a tam thei ang bera MṬKP Mobile Application kaltlanga Subscribe turin rorel palaite a ngen. Kum 2025 – 2026 chhûngin Ṭhalai Êntu (Hard Copy) hi copy 12,180 tihchhuah mêk a ni a, Online Subscribers 160 an awm.

MṬKP Rorel vawi 72-na hian “Platinum Jubilee pualin Christian Hospital Serkawn-a dah tur Ventilator khawl pakhat lei a dah ni se”, Tin kum hmasa lama MTKP-in a bawhzui tawh “Thlarau Bo man beihpui thlak” chu kum 2026-2027 chhung hian hmalak chhunzawm zel turin a rel a ni.

MṬKP rorêl hian kum 2026 - 2027 chhûnga hmalâkna tûr (Plan) hrang hrang hetiang hian ruahman a ni.

1. Youth Centre pual sumtuakna chak zawkin hmalakna neih ni se.

2. Missionary-te tana chawnghei ṭawngṭai neih ni se.

3. MṬKP standing prayer points neih ni se.

4. Platinum Jubilee pualin Christian Hospital Serkawn-a dah tur Ventilator khawl pakhat lei nan Unit tinin vawikhat fehchhuah neih nise.

5. Mahni intihlum kan tlem theihna tura inzirtirna neih nise.

6. Thlarau bo man beihpui thlak hmalak chhunzawm nise.

Kum 2026 budget atan ₹ 18,00,000/- pawm a ni.