MSU-in kum 25na lawm; "Mizote All India Service-ah kan inziak tling thei ta lo hi a veiawm," ~ K Sapdanga

Aizawl | Feb 12, 2025: Mizo Students’ Union (MSU), General Headquarters chuan vawiin khan an din champha phak leh kum 25-na (Silver Jubilee) lawmin a hawnna hun Vanapa Hall-ah an hmang a, Home Minister K Sapdanga'n khuallian niin a hmanpui a ni.

Khuallian K Sapdanga chuan Mizote All India Service-ah kan inziak tling thei ta lo chu veiawm a tih thu a sawiin tun dinhmuna Mizo zirlaiten kan mamawh chu thiamna tak tak nei tura lehkha zir a ngaih thu a sawi. Hlawhtling tur chuan thiamtheih ai mahin thawhrimna leh taimakna kan mamawh thu leh he ram leh hnam tan leh kan tu leh fate tana ram nuam siam turin tuna zirlai te hian mawh kan phur a ni a ti.

MSU President B Lalkhawngaihzuala chuan MSU chu Pathian kaihhruaina changin kum 25 hmel an hmu ta chu lawmawm a tih thu a sawi a, zirlaite leh ram leh hnam tana ding a nih angin, pawl rinawm leh innghahna tlak a ni ta chu lawmawm a tih thu a sawi a, zirlaite leh ram leh hnam tan ke a pen zel tur thu a sawi bawk.

MSU President hmasa ber K Laldinthara chuan MSU chu lungrual taka SU te, Hnam Pualte nen an din anih thu a sawi a. Lungawilohna vang emaw, tihtauhna emaw a din danah a awm lo tih sawiin tun dinhmun an thleng ta chu lawmawm a tih thu a sawi.

MSu Senior Adviser Prof JV Nunchunga pawhin thusawiin zirlaite chu khua leh tui tha ni tur leh dan ngaih pawimawhna kawngahte, faina leh thianghlimna chungchangahte leh thing leh mau humhalh humhalh kawwngah tan kan lak zual a ngaih thu a sawi a ni.

Silver Jubilee lawmna programme hi SMU Vice President Roluahpuia'n kaihruaiin Salvation Army IET Territorial Commander Colonel Lalbulliana'n hunserh a hmang a, General Secretary Zodinsanga'n inhmelhriattirna leh report pein, Assistant General Secretary Lalruatpuia chuan MSU Sulhnu thlirletna hun a hmang bawk a ni.

MSU din champha phak leh kum 25-na hi MSU dinna hmun hrang hrangah lawm a ni.