Mizo Short Film Competition 2026-ah Raymond Colney siam 'Maimizial' a chungnung ber!

Aizawl | Feb 24, 2026: Directorate of Information & Public Relations (DIPR) leh Mizoram Film Development Committee bultuma buatsaih, film tawi siam inelna hmawrbawkna hun chu Vawiin chawhnu khan Mini Theatre, Lianchhiari Run, Directorate of Information & Public Relations, Treasury Square, Aizawlah hman a ni a, He inelnaah hian Film tawi 41 thehluh niin vawiin khan Information, Public Relations & Printing and Stationery (IPR&PS) Minister B Lalchhanzova'n lawmman semna hun a hmanpui a. DIPR Director K Vanlalsangi'n lawmman semna hun hi kaihruaiin IPR&RS Secretary Betsy Zothanpari Sailo, chuan Film tawi hmanga inelna chungchang report tawi a pe.

IPR&PS Minister B Lalchhanzova chuan Film tha chu thil tithei tak, a thlirtu ngaihtuahna, a tha zawng leh tha lo zawnga hruai kawi thei a nih thu a sawi a. Film siam chhuah tam satliah ni lovin, Film tha siam chhuah thiam a pawimawh thu a sawi. Minister chuan I&B Ministry atangin, Mizorama Film lama tui mite tihhmasawnna turin ‘Lemchan - Mizo Film Festival’ tih chu March ni 16 -18 chhung buatsaih tum a nih thu a tarlang a. Film siam leh a khaihhnawih hrang hrangte, eizawnnatlaka kan siam zel theih nan he Festival hi tangkai taka kan hman thiam a pawimawh thu a sawi. Mizo Film Industry chuan hmasawnna a hmuh mek rualin, Film Industry-a hlawhtlinna sang zawk chang tur hian zirna leh thiamna kawngah mahni intuaihriam rengte, mahni inrintawkna tha tak neih te, taksa leh rilru hrisel neihte a pawimawh thu a sawi a. Beidawng duh loa, ‘Ka tithei ve a ni’ tih rilruput tlat a pawimawh thu sawiin Mizo Film-te hi National Award dawng tlak a siam ve turin tan lak a tul thu a sawi.

IPR&PS Minister chuan Film ngaihhlut hlawh tak takte, hlawhtlinna leh chawimawina dawngte han chik hian, an Film siam second tin hi awmze nei takin an duan thin thu a sawi a. Hei hian hun hman dik leh hun hman thiam pawimawh zia a tarlan thu a sawi a. Vawiina I&PR Directorate bultuma Film tawi inelnaa lawmman dawng zawng zawngte chu a lawmpui thu sawiin lawmman la ve lo te pawhin hmasawn zel tura chona leh phurna an hawn theuh a beisei thu a sawi bawk a ni.

Mizo Short Film Competition 2026 atan hian February ni 16, 2026 thleng khan minute 10-15 a sei, Film 41 a lut a. Judge-ten uluk taka an endik hnuah vawiin khan result hi puan a ni a. Pakhatna lawmman hian cheng 2,50,000 , Pahnihna lawmman hian cheng 1,25,000 leh Pathumna lawmman hian cheng 70,000 a keng tel a. Consolation Prize mi panga tan cheng 30,000 theuh a tel bawk a ni.

Mizo Short Film Competition 2026 lawmman dawngtute chu;

1st Prize - Maimizial – Raymond Colney

2nd Prize - Zualtei Pa - H Lalsangzela (Zote Entertainment)

3rd Prize - Nunna - Lalrohlua Renthlei (Phaidung Studio)

Consolation Prize dawngtute

1. Chanchinbumi - Christo Pa

2. Noodles soup - Margaret B.Lalmuanawmi

3. Vindicta - David Sanga

4. The Unforgiven Silence - Ruatfela Mart Khiangte

5. Thangthawvenga - Hruaitea Hauhnar