MHIP-in ‘Women Icon Award 2026’ dawngtu Minister Lalrinpuii lawmpuina hlan

Aizawl | Feb 25, 2026: Mizo Hmeichhe Insuihkhawm Pawl (MHIP) General Headquarters chuan vawiin khan Treasury Square-a an Office-ah February ni 11, 2026-a New Delhi-a Achievers’ World, Indian Achievers’ Forum leh All India Business & Community Foundation (AIBCF)-te tanghovin an buatsaih ‘National Summit 2026 - Vikshit Bharat 2047 through Comprehensive Socio-Economic Development’-a ‘Women Icon Award 2026’ dawngtu Health & Family Welfare Department leh Social Welfare, Women & Child Development Department Minister Lalrinpuii chu lawmpuina an hlan.

Lawmpuina dawngtu Minister Lalrinpuii chuan MHIP chungah lawmthu sawiin, Award a dawn dan chanchin a sawi a. A chanchin hriate’n Women Icon Award dawng turin a hming an lo rawtsak a, he Award buatsaihtute hian Bangalore-a hmeichhia leh mi harsate a lo tanpui thin dan te leh Mizorama hmeichhe Cabinet Minister hmasa ber a nih thu te lo hriain, a Department chante’n Viksit Bharat 2047 nena inrem takin Mizoram Universal Health Care Scheme hmanga mipuite hnena man pe lawk lo (cashless)-a health insurance an pek bakah ‘Ruangphurh’ policy hmanga mi retheite in lum ngeia an chhungte ruang an phurh thlensak chu ropui an ti a, India ram tana Mizoram chhunga a hnathawh chu chawimawi tlakah an ngai a ni, a ti.

Lalrinpuii chuan Corporate Social Responsibility (CSR) pawimawhzia leh Mizoram pawna a hun hman thin ram tana a hlawkzia sawi bawkin, Award a dawn tuma Mizoram chu CSR dawng tlem ber a nih avanga company liante chu CSR rawn chhunglut tura a sawmna chuan ‘Father of CSR in India’ tia an koh thin Dr. Bhaskar Chatterjee-a beng verhin, CSR 1% chauh luhna Mizoram chu a tinzawn nghal dawn a, an indawr mek thu leh Aizawl lo tlawh a tum thu a sawi a. Tin, Bhubaneswar-a CSR & Sustainability Conclave 2025 an chhim tumin thil thar siam chhuaktute nen indawrin, Mizorama mitdel zawng zawngin mitdel tiang tha chi an dawn theih nan Toyota atangin CSR cheng vbc 2 dil mek a ni, a ti a. Zoram Medical College & Hospital (ZMC&H)-a lung zaina tur Operation Theatre (OT) sak nan leh bungraw lei nan State Bank of India Mutual Fund-in cheng vbc 4.4 an pe a, sak mek a ni a; Indian Oil Corporation Ltd. (IOCL) atangin ZMC&H-a Neurosurgery OT sak nan cheng vbc 2.2 dawn a nih thu a sawi bawk a ni.

Minister chuan MHIP changtlun zel nana theihtawp a chhuahpui tur thu sawi bawkin, MHIP chu rual ute’n hmeichhe tanpui ngaite leh khawtlanga harsatna tawkte tanpui a, hmeichhiate tana hamthatna awm apiang ngaihtuahpui a, hmeichhiate hmasawn theihna tura an lo din a nih anga vawng nung zel turin a chah a ni.

He hun hi MHIP President Lalliani'n kaihruaiin, hmeichhe Minister viak tha leh hna chak Mizoramin a nei chu lawmawm a tih thu a sawi a. MHIP General Secretary Irene Lalruatkimi, chuan Minister-in Mizoram tana a hna thawh that avanga chawimawina a dawng chu MHIP chuan chhuangin a lawmpui thu leh ram leh hnam tana ke a pen zelna turah duhsakna an hlan tih sawiin, pawl aiawhin lawmpuina citation a hlan a ni.

B Sangkhumin MHIP Gen Hqrs tan a tulna apianga hman turin Darkhuang a hlan bawk.