Mara ṭhalaite intihhlimna kut 'O Dôh Ku' hmang

Siaha | February 11, 2026: Model Youth Association, Multipurpose Hall, New Siahaah Vawiin chawhnu dár 1:00PM khân Mara ṭhalaite intihhlimna kut O Dôh Ku hman a ni a, Mara Autonomous District Council (MADC) Deputy CEM S Lalremthanga'n khuallian niin a hmanpui a, Director (E) & Cluster head IBES DR Lalropuia, chu Khual zahawm a ni.

Thu sawiin khual lian chuan Mara ṭhalaite kut pawimawh tâk, mi nawlpuiin kan hriat lâr tawh loh O Dô Ku hman a ni chu lawmawm a tiin, ṭhalaite pual bîk atân he kut hi hman ṭhîn a ni, a ti. Hmanlai kan pi leh pute chu tlangram lo neia eizawng an ni a, Buh leh thlai an seng zawh awllen laiin nula leh tlangvalte chuan an khuaa mi awmthei deuhte in chu an hual a, 'Pi bêr kan lo lut dâwn e, kawngkhar min lo hawn rawh,' tiin an ko a. Chhungkua an inrawnkhawm hnuah, Pi bêr chuan a kaa tui hmuam ṭeuh chungin kawngka a hawng a, ṭhalaite chu a phuh deuh ṭhawt ṭhawt a, lawm takin an inah a luhtir a; zankhuain zu leh sâ nên hlim takin an zai a, an lam a, nuam titakin an hmang ṭhin. Kar tin in tinah an insawn zêl a, ṭhalaite dawlzo thei tur chhungkua an thlang chhuak ṭhin. Chutiang chhungkua chu an khuate pawhin an ngaisang em em a, ṭhalaite hlim nân insenso an hreh ṭhin lo hi an entawn tlak hle a ni, a ti.

Hnam tihdan leh rohlute vawnhim zel a ṭul thu leh chutiang kawngah chuan Akashvani in pawimawhna an neih thu S Lalremsanga chuan sawiin, Kan pi leh pute kut leh nunmawi tâk kan sakhuanin a phal chin hnuaiah inmil taka hman chhoh a nita hi thil ropui leh chhinchhiahtlak tâk a ni. Mara fate ngei pawhin kan hriat tawh mang loh kut pawimawh tâk huaihawt nachang Akashvani Community Radio Service-in inhria hi lawmthu ka hrilh che u a. Hnam tlêm leh hnufual zawkte khawvel mipui hriata min phochhuaktu langsar tâk pakhat innih avângin Mara mipuite pawh hian inchungah lawmthu sawi tur kan ba nasa hlein ka hria, a ti. Hnam läm leh rohlute hi chawisang a, ngaihlu a, vawnhim a, thiam tum ṭheuh turin ṭhalai leh school naupang kal khawmte a chah bawk.

Khual zahawm DR Lalropuia chuan Hnam lam leh ṭawng humhalh a ṭul thu sawiin, chumi atân chuan tlawmngai pawl leh akashvani a thawktu ten mawhphurhna nasa tâk kan nei a, a dik thei ang bêra thil kalpui a ṭul a ni a ti. Ram hmasawn (developed country) apiang an dam rei thu leh, Mizo mipuite kan damrei lo hi veiawm a tih thu kual zahawm hian sawiin chawhrualin mipa kum 66 leh hmeichhia kum 81 chauh kan dam a, hriselna lam kan ngaih pawimawh deuh deuh a ṭul a ni, a ti. Akashvani Community Radio Service Siaha pawh thuamṭhat chhoh zel tum niin tunah hian facebook leh youtube kaltlangin live-a pekchhuah a ni a, rawtna emaw sawiselna emaw nei kan awm anih chuan engtik lai pawhin a thawktute hnenah thlen theih reng anih thu a sawi bawk.

O Dôh Ku hi Akashvani Community Radio Service, Siaha buatsaih niin Mizoram hmun hrang hranga Akashvani thawktuten an hmanpui bakah Siaha khawpui chhunga Mara Thyutlia Py (MTP) Branch hrang hrang te'n hnam lam chi hrang hrang an entîr a, malzai ngaihnawm tak tak ngaihthlak a ni a, Maraland Academy School te a bîk taka sàwm an ni bawk. Anu Deshyaley Hlychho-in lawmthu sawina a nei a, kut hman a ṭiak a ni.