Larsap-in LESDE Kût 2026 a hawng

Aizawl | February 10, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin chawhnu khan Labour, Employment, Skill Development & Entrepreneurship (LESDE) Department buatsaih, February ni 10-14 chhung awh tur 'LESDE Kût 2026 chu Khuallian niin Aizawl Lammualah a hawng. Larsap chuan Mizoram Building and Other Construction Workers Welfare Board (MBOCWWB) hnuaia project kalpui tur 'Eizawnna Kailawn' leh 'Rahbi Chhertu' a tlangzarh bawk. He hunah hian LESDE Minister Lalnghinglova Hmar chu Khualzahawm a ni.

Larsap General (Dr) Vijay Kumar Singh chuan LESDE Kût buatsaih tura Minister leh tha thawhtu zawng zawngte inpekna fakawm tiin, sum lei pai hmasawnna chu eizawnna thar siam chhuah zatahte, thalai chhawr tlak chher chhuah tamahte, entrepreneur chawikan tamahte, hmeichhia leh thingtlang mite tel tam lamahte a innghah thu a sawi a. Micro, Small and Medium Enterprises (MSME) sector chu ram thanna atana pawimawh tak a nih thu sawiin, India ram chu MSME sector-ah khawvel hriat hlawh leh thang chak berte zinga mi a nih thu leh ram dangte entawn leh zir chian chak a ni, a ti a. MSME hmalakna chu thingtlang kilkhawr thleng phaka kalpui a tul thu a sawi bawk.

Larsap chuan Mizoram chu hnam ziarang hausa tak, kutthemthiam, kuthnathawh lama theihna nei leh thil siam chhuah kawnga theihna sang tak nei a nih thu sawiin, theihnate hai chhuak tura tanlak a tul thu a sawi a. Job Fair buatsaih chuan hna zawngtu leh ruaitu inkar a hnawh khah dawn thu sawiin, thalaite chu ngaihven turin a chah a. Tunlai thiamna behchhan khawvel sum leh pai dinhmun thang chak tak karah kan thiamnate tihpun ve zel a tul thu a sawi a. Sawrkar hotute chu entrepreneur chawikan phute theihtawp chhuaha pui tura fuihin, nakin hun thleng daih tur leh belhchian dawl hmalakna ngaipawimawh turin a chah a. Sawrkar laipui scheme hrang hrangte mipuite zirtira, a hlawhtlin ngei theih nana tanlak a tul tih sawiin, state ralmuang, leilung hausa leh theihna nei kan nihna chu chawr tangkaia hmasawnna tlo leh huapzo nei state siam turin mizo mipuite a chah a ni.

Khualzahawm LESDE Minister Lalnghinglova Hmar chuan LESDE Department chu nitin khawsak leh eizawnna nen a inngheng tlat tih sawiin, mizo thalaite'n eizawnna ngelnghet an neih theih nana puih, bana kaih leh zawrh ngam thiamna neih tir an ngaipawimawh tih a sawi a. LESDE Kût kaltlangin office dawr tura hmun hran hran kal ngai lova hmun khata dawr theih tura ruahmanna siam a nih thu sawiin, thalai hna zawng lai leh la zawng turte huikhawma fuih phur turin he Kût hi siam a ni, a ti a. Eizawnna Kailawn leh Rahbi Chhertu project-te chuan hmasawnna thar siamin, mizote eizawnna a siam sak dawn tih a sawi a. Mizo mipuite chu Mizoram Building and Other Construction Workers Welfare Board chu ngaihvena inziaklut turin a sawm nghal bawk.

He hunah hian LESDE Secretary Dr Lalhriatzuali Ralte, chuan kalkhawmte lawmna thu a sawi a. LEDSE Director Pu John Tanpuia'n LEDSE Kût chungchang a sawi zau a. LESDE Joint Director T Thangropianga'n lawmthu sawiin hun hman a khar hnuah, Larsap-in stall hrang hrang 168 te tlawh kualin a nghaktute a kawm a ni.

LESDE Kût hi Mizoram Sawrkar hmalakna niin, LESDE Department leh a kaihhnawih board leh institution hnuaia service, programme leh hlawhtlinnate phochhuah a ni a. Thalai, MSME, entrepreneur, hna zawng mek, hnathawktu leh anmahni kaihruai theitu turte chu a kaihhnawih peng hrang hrangte nen thlunzawmin, hna, thiamthil leh hamthatna dangte hre chiang turin hun tha a siam sak a ni. Made in India leh Atmanirbhar Bharat chawilarna niin, state leh regional level trade fair kaltlangin thil siam hrang hrang phochhuah a ni a. Micro and Small Enterprises (MSEs) nen tangkawpin Mizoram leh North Eastern Region-a entrepreneur-te Sawrkar laipui hnuaia Ministry leh Mizoram Sawrkar Department hrang hrangte nen a thlunzawm bawk.

He hunah hian South Tuipui MLA Jeje Lalpekhlua leh Department thawktute leh sawm bikte an tel a ni.