Khawvel hmuh-ah India rama mipui rorelna kalpui dan phochhuak

Aizawl | Feb 2, 2026: Tun hnaia India International Conference on Democracy and Election Managemnet (IICDEM)-a Chief Election Commissioner Gyanesh Kumar-a’n ram 70 chuang atanga palai lo kalte a lo lawmnaah, kum sangthum chuang zet India-in mipui rorelna a lo kalpui tawh dan pho chhuah a ni.

He conference-ah hian palaite ngaihthlak atan Atharva Veda hun laia Sanskrit hla, BCE 1200-1000 vel ami chu tih rik niin, Sabha tia hriat assembly leh Samiti tia koh council hmanga Rig Vedic society-a mipui rorelna lo thang lian tawhte chu tar lan a ni. Kum zabi 10-naa lunga inziak, Vailuntha Perumal Temple, Kancheepuram District-a Uthiramerur hmuna hmuh chhuah te pawh pho chhuah tel a ni. Heng thuziak te hian khawtlang rorelna mumal tak, tunlaia kan neih ang an lo kalpui tawh tih a ti chiang a ni.

Conference-ah hian Vaishali, Stupa leh Ashoka Pillar awmna hmun, kum zabi 6-na BCE-a Licchavi-hoin mipui rorelna (Republic) hmasa ber an dinna hmun chu tar lan a ni bawk. Licchavi Republic-ah chuan mipui aiawh General Assembly leh Council of Minister te awmin anni hian thuneihna an pumbilh tur venna siam a ni bawk.

India hi khawvela democracy ram lian ber a ni a, vote nei mi maktaduai 900 chuang inthlanna a enkawl a, hei hi conference palaite chuan an ngaihlu hle.

Conference hi January 21-23 chhung khan neih a ni a, he conference-ah hian khawvel ram hrang hranga inthlanna enkawltu leh senior official-te bakah hnam hrang hrang ambassador-te an tel a ni. He inkhawmpui hian India-in electoral management lama khawvel pum huapa hmahruaitu a nih chhoh zel dan a tar lang a, hmanlai finna leh tunlai thiamna in kawp rem takin a kal kawp thei tih a tichiang hle a ni.

India-in International IDEA Chairship a luah denchhena conference neih hi mipui rorelna kum tam tak chhung a lo kalpui tawh pho chhuahna remchangah hman a ni. Conference-a tel palaite tan chuan India rama tunlai inthlanna kalphung hriatna mai ni lovin, khawvela democracy lian ber chu kum sangthum chuang kalta a lungphum phum tawhah nghet takin a la ding a ni tih a hriattir a ni.