.jpg)
Kum 2026 kum thar kan chuang kai chauh tihin kan ram khawpui Aizawl chu party politics boruak chhiain min tuam leh nghâl a. Party worker te chuan an party tana AMC candidate tur, mipuiin an duh ngêi tur mi lâr leh hmingṭha an zawng a. Social media hmang ṭangkaiin an thlalâk te pho chhuakin AMC a lalna leh thuneihna chan ngéi tumin an phu leh ta suau suau mai.
Aizawl Municipal Corporation inthlan hun tur hi la chiang lo mahse kumin 2026 April emaw May thla vela neih rin a ni. Kan hriat angin AMC hna ber chu Aizawl khawpui chhung enkawl a ni. Kum 2010 aṭang khan AMC hi din ṭan niin ward 19 awmin ward tin aṭangin member pakhat zel thlan an ni a, chung thlan chhuahte chu Mizoram State Governor in a nemnghet ṭhin. AMC hi Mayor, Deputy Mayor leh Commissioner te kaihhruaina hnuaiah kalpui a ni. Member hmun thuma ṭhena hmun khat hi hmeichhe tâna ruat bîk a ni. AMC huam chhûngah hian local council 83 an awm.
Kan ram rorêl dan her sual laklawh tawh avang hian engkim mai hi inchuh (politicalize) tur emaw kan ti ta a ni ber mai. Kan nula leh tlangval fel tak tak, party politics tuinu a luh duh rêng rêng lote pawh chu an hmingṭhatna leh felna kha party kawr hak tir nan hmangin BJP, Congress, MNF, PC leh ZPM party mi leh saten party kawr hâk tirin party politics nula leh tlangval ah kan chan tir a. Party politics indona huang chhungah kan hnûklût a, lal leh thuneih inchuh nan kan hmang ta zêl mai chu a ni. Party politics khelh nân Kohhran lama rawngbâwlna a mi ṭangkai leh fel, mipuiin an duh tur kan zawng a. Rawngbawltu fel leh ṭangkâi tak takte pawh chu party politics= Ṭhattheihmiahlohna bawm chhungah chuan kan khung lût zêl a. Party politics tuinû leh bawlhhlawh chuan a lo chiah bâl zêl chu a ni ber mai.
Pathianin mihring a siam danah mawhphurhna sáng tak a pe a. Thilsiam zawng zawngte enkawl tur leh ama duhdân leh a thu ang zêl a rorêlna fel tak kengkawh turin a ruat a ni. Mahse mihring hmasa Adama leh Evi ten Pathian thuthlung an bawhchhia a, ei loh tur Eden huan lai taka thing rah an ei a nih kha. Chu thuthlung bawhchhiatna aṭang chuan mihringte hian Pathian thu leh a duh dân aiin setana duhdânin rorêlna pawh kan kalpui duh ta zêl a ni. Ringtu ṭhenkhat phei chuan khawvel rorélna hi setana tâ tur rêng emaw an ti hial tawh a ni.
Kan ram kohhran pawl hrang hrang rorêlna kan siam dânah Kohhranin rorêlna ṭha zawk, Pathian duh dan ni a kan hriat angin kan kalpui a. Inthlanna felfâi tak neiin rorêlna chelhtu turte kan thlang tlangpui. Mawhphurhna chelhtu tur pawh in chuh buai awm lovin ṭha takin kan in siam rem mai ṭhin. Tuna kan rama kohhran pawl hrang hrangin rorêlna kan kalpui dan hi ‘Democratic Theocracy’ tiin ka vuah a, chu chu ‘Pathian lalna tura mipui thlante rorêlna’ tihna a ni. Hetiang ang hian kan ram rorêlna hi siam a, kalpui nise tun ang êm êm a party politics hmanga rorêlna ṭhalo hi chu kan pumpelh theih ka beisei.
AMC inthlanah te pawh hian party politics tel miah lovin, party sawrkar siam kher lo hian a kalpui theih a.Inthlan kher kha sawrkar dan dinglai a nih a, a ṭul a nih pawhin he hna atâna mi tling leh ṭangkâi tur a duh apiang kha rawn in candidate maise. Mipuiin kan duh duh kha lo vote mai ila, party politics kawr hâk tir emaw chumi party candidate chu a ni ti kher lo khan. Chung kan thlan tlinte chuan mawhphurhna an chelh dan tur pawh chu an mahni in thlangin in ruat ve leh mai se, Party sawrkâr emaw party politics tuinu awm lovin rorêlna felfai leh lungrualna ṭha tak a ni zawk dawn lawm ni? Tuna kan kalpui danah chuan an duh emaw duhlo emaw party kawr in bel tirin party politics indona field ah lohtheihlovin kan luh tir zêl a. AMC pawh tuemaw party ta bik turin kan siam zêl chu a nih hi.
Bible ah Zawlnei Amosa hmanga Lalpan a lo puan, “Rorêlna dik chu lui angin luang zawk sela, Dikna pawh luipui kang ngailo angin luang rawhse” a tih thlen hun tur hi dingdihlipin kan thlir a.Zofate Kristian ram leh Kristian hnam inti ngat ngamte ramah chuan chu chu a taka ding thei tur chu a ni ang. A taka a din theih siloh chuan kan Pathian thu kha a takin kan chan tir thei dawn lo tihna a ni. Rorêlna dik leh ṭha kan neih theihna tur chuan politics thianghlim leh ṭha kan neih phawt a ngâi. Chu politics thianghlim nei tur chuan tuna kan party politics system ṭhalo hi ṭhiah a, Pathian duh dan ang taka rorêlna, Pathian Lal Ram Sawrkâr (PLRS) kan din a ngai. PLRS a din thuai theih nan kan rilru ti thianghlim ila, party politics ruihchilhna sal tânna aṭang hian in thiar fihlim ila, kan ram kan hnam min hruai turin Lal Isua Krista chauh thlang thei tura kan inbuatsaih a hun tak meuh a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: