Aizawl | Jan 7, 2026: Zoram Peoples Movement (ZPM) party-in CADC-ah mipui thlan sorkar ngelnghet siam an duh! Chakma Autonomous District Council-ah ZPM sorkar siam turin mi an ngah tawk avangin hma la thuai turin Larsap an duh thu ZPM General Headquarters Media chairman leh Supply Minister B Lalchhazova chuan a sawi.
Supply Minister B Lalchhazova hova vawiin chawhnu dar 2:30-a Aizawl Press Club-a Chakma Autonomous District Council (CADC) Member of District Council (MDC) Member 16 ten thuthar thehdarhtute an kawmnaah he thu hi sawiin, Chakma Autonomous District Council-a ZPM sorkar siam turin an inpeih tih Mizoram Larsap General VK Singh an hrilh hnuah Larsap chu hma la thuai tura an duh thu a sawi.
B Lalchhanzova chuan, "kan beisei ang leh, 6th schedule in a thuneihna a pek ang pawha thil a kal ta lo a nih chuan, keini chuan kan thei tawpin mipui sorkar tungding turin theihtawp kan chhuah dawn a ni." a ti bawk.
Vawiin hi CADC-a Governor Rule tawp ni a ni a, hemi chungchang thu-ah nizan lama Council of Minister inhmukhawmin CADC-a Governor Rule kenkawh chu tul an tih tawh lo a, CADC-a sorkar mumal tak a awm theihna atan hma la se an ti tih a sawi bawk.
Chakma MDC te hian vawiin khan Larsap hi sorkar an siam theih thu leh hma la se an duh thu an thlen a, hemi chungchangah hian Larsap chuan hma a la vat lo a nih chuan an party-in theihtawp an chhuah dawn ti B Lalchhanzova chuan a sawi a ni.
He huna thusawitu dang Chakma District Council President Karan Dewan chuan vawiin lama Larsap-in Chakma Autonomous District Council-te kumthar thilpek a tiam sorkar ngial nghet tak siam chu a tak a thleng ngei tura an beisei thu a sawi a ni.
Hetihlai hian, Chakma Autonomous District Council chungchanga Mizoram Larsap-in Council of Minister te thurawn hriat a duh avangin nizan khan Council of Minister chu Chief Minister Pu Lalduhoma kaihhruaiin Chief Minister Office Cabinet room-ah an thukhawm a.
Larsap hian Chakma Autonomous District Council kal dan chhui chiangtu tur Inquiry Commission thar din tha an tih leh tih loh a zawt a, hemi chungchangah hian Council of Ministers chuan Inquiry Commission chu din a ni tawh a, report pawh an thehlut tawh a, hemi hnuah Autonomous District Councils pathumte kalphung zirchiangtu Study Team, Chief Secretary kaihhruaina hnuaiah din leh niin an report an thehlut tawh an ti a. Lawngtlai Deputy Commissioner pawhin Chakma Autonomous District Council chungchang report a thehlut tawh bawk a, heng report pathumte chu a that tawk avangin a hranpaa Inquiry Commission din tharleh hi a tul tawh lovah a ngai an ti a ni.
Council of Minister thukhawm chuan, Chakma Autonomous District Council-ah MDC member 20 a member 16 neia sorkarna siam thei Party an awm avang leh High Court-in sorkarna siamtir dan kawng zawng tura thurawn a lo pek tawh angin Governor's Rule-a dah lova sorkarna siamtir turin ngenna a lo siam tawh mahse Governor's Rule-ah dah a ni tho an ti a, Governor's Rule term a zawh hnuah pawh sorkarna siam thei party chuan an dinhmun sawh sawn lova sorkarna an la siam theih reng avangin Governor's Rule-a thla ruk dang dah leh a tulna chhan engmah a awmlo tih sawiin CADC ah chuan sorkar ngelnghet tak a ding thei tih chu Council of Minister ngaihdan a ni an ti.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: