~ Ruatfela Nu
09/01/2026
A KHUH HAWNNA:
Mizorama domestic tourist vai tam thut hi kan tih that vang ni loin, REL rawn lutah tunlai thlalai, hmun kilkhawr dai dar chakte man man zawka an rawn zin khawthawn theih tak vang a ni thei ang em? Chung thalaite chuan awlsam taka thla lak theihna an kutah phone camera tha tak an hum a, kan ram leilung mawina leh an la hmuh ngai loh; kan tualzal nun an vlog a, chu chuan mi dang rawn kal chak a ti pung ni berin a lang a. Hei hian rei a daih ang em tih chu hunin a la rawn hril ang a.
Hetianga a hlawp hlawpa tourist rawn lut tup tup hi mi thiamte chuan ‘Mass Tourism’ an ti a, a hlauhawm an ti bawk. Mass Tourism hlauhawmna laka invenna lam ka hre lo a, sawrkar a inbuatsaih that leh that loh pawh ka hre chuang lo a, ‘hetiang hian inbuatsaih rawh u’ tia kawh hmuh tur pawh ka hre hek lo. Mass Tourism a hlauhawmna lam chu mi thiam leh chinchang hre zawkte thu ziak leh an tawngkam/ titi ka ngaihthlak atangin ka hre teuh a. Tin, khawvel chanchin (history) atangin sawi chhawn tur tam tak a awm bawk a. In ngaih dan a nih leh nih loh chu thu hran.
Ruih hlo Tawlh ruk (Hawng 440) Part-9 thleng ka ziak a, Medical Joy Ride Part-5 thleng ka ziak ang deuhin, Mass Toursim leh a kaihhnawih chungchang hi Part-10 thleng vel ziak tur ka pai puar luah a, ka rawn ziak zel ang a, thenkhatin in hua ang a, thenkhatin in lawm ang.
Tichuan, hun rei lote chhunga tourist pung thut hi a hlawkna lam kan thlir rualin a hlauhawmna lam kan thlir tel a pawimawh. Hma lakna reng reng hian, positive & negative impact a nei ṭhin. Tourism lamah pawh a positive impact lam kan duh a nih pawhin, a negative impact lam ti nep tura inbuatsaih leh ruahmanna siam tel a ṭul.
Tun din hmunah chuan tourism promote tura hma lakna kan sawi uar viau a, a ken tel chhiatna ti ziaawm tura inbuatsaihna lam erawh ngaihthah niin, a sawi pawh kan sawi ri mumal leh si lo. A chhiatna lam sawi ritu chu mi ngiau ngerh leh sawrkar hma lakna dotu anga chhuah kan ni thin. A pawi teuh lo. Thu dik chu khua rei thlenga a dinchan zel tho vangin. A nghawng tha lo a rawn lan hunah mipuiin kan hre fiah chauh thin hi a pawi lai tak zawk chu a ni. Siam thatna khua a tlai tawh thin si a. Eng pawh ni se, hun lo kal zelah ‘Ruafela Nu te khan an lo hmu/thlir dik a ni’ in tih leh atan a hlauhawmna lam tlem ka’n thai lang dawn a ni:
1. Mizoram a khual zin an pun thut vanga kan lawma kan sahawk viau lai hian venthawn tur tam tak a awm: kan inrin loh lai hian kan phu zawk mai ang tih a hlauhawm hlel lo e.
2. Khual zin vloggers ten min fakna a la tam hle mai, hetiang reng hi a ni dawn lo tih hria ila. Kan khawpui lun laia motor horn hmeh loh ringawt ang hi kan ni lo tih hre chiangtu kan ni vek a. Kan khaw daiah motor insulpel a hahthlak em em a, kan two-wheeler che vel a chhuanawm loh hle bawk.
3. Kan fai vek si lo. Bawhhlawh tling khawm a tam em em a, vaiho ang thoa ek thlahdah kan ni a, kan tui tlante hi kan ek thli vek. Khawpui lailiah pawh kawr kama cheng tam zawkin an ek kawrah an paih. Hetiang pawh hi an la rawn cover dawn.
4. Vai khual zin ho hi ram dang tam takah pawh mikhual duhawm an ni ngai lo. Fel tak tak chu an awm ve a, chung karah a tam zawk chu che tawp tak tak an ni.
5. Vaiho hi a tlangpuiin awm khawma bengchheng, mi dang ngaichang miah lo, city bus leh restaurant ah pawh tawng zawihna chang hre lo an ni. Kan thalaite'n an la ning mai ang.
6. Thlen ina thil awm ang ang paipawn mai hreh lo etc., heng hi kan la tawng dawng chauh a nia.
7. Khual zin pangngai karah mi bum hmang, mi sual tlan bo, tawm-imna zawng etc,. an la tam chho dawn. Thlen man pe lo, ei man pe lo. Khual zin mi rawn bum tum an awm chho dawn chiang.
8. Kan society hi a famkim bik si lo a, kan nula sih hnip leh sum siam nana in phalrai ho hian min la ti mualpho hle dawn chiang a. Nakinah chuan kan nulate laka insawi thei duh pawh an la awm dawn a ni. Kan famkim si lo a, kan that lohna lai an pho lan hun hi a awm ngei ngei dawn.
9. Thailand ang maia rawn chet tum khual zin an awm hunah leh kan nula fel pangngaite rawn beisei an tum hunah in hne rem lo a la awm ngei ngei dawn a. Kan mipate’n an fanute thlavang hauhin vai khual zin an hnek fo lo ang tih a sawi theih loh.
10. State pakhata ka hmelhriat chuan, “‘samosa tourist’ hotel tlawm thei ang bera thleng, pawisa thlauh tur pawh nei mang lote avang hian, kan state a nawm loh phah vek” tih a sawi hi bengah a cham reng mai. Rel rawn thlen tirh khan, kan tourist spot pakhat chuan an toilet a uih vek thu a sawi, an tam si a, an che tawp si a, a rim an ti thianghlim hman lo a ni awm e.
11. Kan kawngte, kan tuite, kan bawhhlawh paihnate kan engkim hi tourist ho hian min rawn hman pui dawn a, a awm sa pawh min dawl zo lo hian eng ang takin buai phah ang i maw? Raltlan nen kan Natural Resources kan inchuh a, Sairang/Sihhmui chheh vela mau/raw tuai inchuh mek a, tunah vai khual zin nen, kan indaih lo ang.
12. Tourist rawn lutin an hman ber tur chu, kan hospitality industry a ni, Kan hotel leh restaurant-te hi han en ila. Eng zat chiah hi nge Mizo ina kan enkawl? Kan restaurant tam zawk a cook hi Tripura mi an ni tih hi a chiang, kan hotel a inhlawhfa tam zawk hi hnam dang an ni. Keimahni ber hi a hlawkna tel tur hian kan inring em aw tih inen fel kan mamawh.
TLANG KAWMNA Kan thatchhe si, pawisa nei lo pawhin pawisa tho kan mamawh si, sum lak luh kan duh ve tho si, pawisak nei si lo. Sum lak luhna a nih chuan hnam pawi sawia vai nena inthlun zawm pawh kan pawisa si lo. Chanmari kawn lai taka restaurant lun em emte hi Mizo pain a hming hawha vai hnena cheng sing hnih vela a siamtir a ni.
Tichuan, thawk hah loa sum lak luhna zawngin vai hnenah kan hming zahawmna kan hralh ang a, khual zinte inhnangfakna vai enkawl a pung tawlh tawlh ang a, vaiin vai thingpui dawr an dawr ang a, vai chu vai hotel-ah a thleng a, vaiin vai chaw dawrah chaw a ei ang. Mass Tourism thlen hma pawha sumdawnna motor, pick-up khalh vai tamzia kan hmuin kan hria. In hriain in hmu ve em? Tourist tangka thlauh hi tual chhung mite kutah zaa eng zat nge lut ang le?
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: