PIB-in Serchhip-ah Viksit Bharat - Guarantee for Razgor and Ajeevika Mission (Gramin) Act 2025' leh 'PM Vishwakarma Scheme' zirhona buatsaih

Aizawl | Jan 20, 2026: Sorkar laipui Ministry of Information & Broadcasting hnuaia Press Information Bureau (PIB), Aizawl chuan vawiin khan Serchhip Press Club-ah chanchinbumite leh khawtlang hruaitute pualin 'Viksit Bharat - Guarantee for Razgor and Ajeevika Mission (Gramin) Act 2025' leh 'PM Vishwakarma Scheme' zirhona a buatsaih.

Vawiina hun hman hi Serchhip District Addl DC Lalrinzuala MCS chuan khuallian niin a hmanpui a, PIB chu hun rei tak chhung sawrkar laipui hmalakna pawimawh hrang hrang hriatna pawimawh tak ani ṭhin a ti a, Vartalap kaltlangin central scheme chu mipuiten an hriat theih phah a beisei tih sawiin hmalakna hrang hrang chu mipuiten an hlawk pui ngei theih nana zirtir an nih theih nan a puangdarh tu ten hriat a pawimawh a ti a, District khawpui mai nilo Hmun kilkhawr thleng phak anih theih nan theihtawp chhuah a ṭul a ti a, Sawrkar mai nilo tlawmngai pawl hrang hrang ten ṭan lak tel a ngai tih sawiin ṭanrual a pawimawh tih a sawi.

Addl DC chuan sawrkar laipui scheme anih angin mipuiten a chipchiar taka an hamthatna tur hrang hrang an hriat theih nan puan chhuah tam a pawimawh a ti a, scheme hrang hrang chu Mizoramah hlawhtling tak kalpui anih theih nana zirtir mi tin ṭanrual a ngaih thu a sawi bawk.

Serchhip Joint Village Council Chairman R. Sanghmingthanga chuan VB G Ram G chu sawrkar laipuiin MGNREGA thlakna tur ani a ti a, sawrkar laipui hmalakna pawimawh tak anih avangin a chhawr tangkaitu mipuiten an hriat ngei theih nan theihtawpa mipui hrilhhriat kawngah ṭan lak a ngai a ti a, hmasawnna tam zawk a thlen dawn avangin hemi chungchang hi a tam zawka thehdarh a ṭul thu a sawi a, sawrkarin a thawh dan tur a duan ang ngeia ṭha tak thawh a pawimawh tih sawiin hemi kawngah hian mi tin intuaithar leh taihmak a pawimawh thu a sawi a ni.

Serchhip MJA President C Lalhminghlua chuan kum 2047-a India in ram hmasawn nih a tumna kawnga pawimawh tak VB G RAM G sawrkar laipuiin a duang chu mipuite tan thil tangkai tak ani a ti a, scheme hrang hrang chu mipuiten an hriatchian a pawimawh avangin mipuite hnenah a hamthatna hrang hrang thehdarh ṭhin a pawimawh a ti a, mi tam zawkin an chhawr theih na theihtawp chhuaha inhrilhriat a pawimawh tih a sawi.

Mizoram-a Press Information Bureau (PIB) hotupa Dr Rajeev Lourembam chuan, sorkar laipui scheme pawimawh pahnihte chu khawpui atanga thingtlang kilkhawr thlenga cheng ten chiang zawka an hriat theih nan zirhona chu buatsaih a nih thu a sawi a; zirho tur scheme chu mipui ten an ṭangkaipui ngei a beisei thu a sawi.

Vawiina hun hmanah hian Serchhip Joint VC, MHIP leh Sub. Hqrs YMA hruaituten thu an sawi a; chawhnu lamah Serchhip ARDO.Stephen Laltlansanga Auhmun chuan G-RAM-G Act, 2025 chungchang a sawifiah a, Commerce and Industries Deptt. aṭangin C Vanlalhriatpuii'n kalkhawmte PM Vishwakarma Scheme chungchang a zirtir bawk.

Media Workshop ‘Vartalap’ ah hian Mizoram Journalist’s Association Aizawl leh Serchhip atangin bakah Serchhipa YMA leh MHIP hotute an tel a, mithiamte hnen atanga sawrkar laipui scheme sawiho anih bakah zawhna leh chhanna hun hman a ni.