Mizoram-a Missionary hmasa ber lo thlen champha phak 'Missionary Day' vawi 132 lawm dawn

Aizawl | Jan 10, 2026: Mizoram-a Missionary hmasa ber lo thlen champha phak, vawi 132-na, “Missionary Day' vawi 132 chu January 11, 2026 hi a ni a. Baptist Church of Mizoram (BCM) chuan, Kumin Missionary day thupui atan “Pathian thu lo hrilhtute che u chu hre reng ula” (Hebrai 13:7) tih hman a ni.

He Ni hi ram pumah hman a nih theih nan Mizoram Sorkar chuan Sorkar chawlh (State Holiday) atan a puang ţhin a, kumin hi Pathiannni nimahsela Sorkar chawlh-ah puan a ni thova, Kohhran hrang hrang te’n Missionary Day pual hian Inrinniah ruai nen hun an hmang ang.

BCM kohhran bikah chuan, Missionary day-ah hian zing lamah Pathian hnena lawmthusawi Inkhawm neih a ni ang a, Thupui thlan sa hmangin thuchah ngaihthlak a ni ang. Chawhnu lamah Pathian faka zaikhawm programme te siamin, zanlamah inkhawm leh zaikhawm chhunzawm a ni ang. Missonary Day-ah hian Headquarters a hruaitute pawhin kohhran te sawmna chhangin Kohhran hrang hrangah hun an hmanpui dawn a ni. Zan lam inkhawm pawh Missionary Day Prgamme hman chhunzawmin Kohhran tam zawkah Inkhawm banah zaikhawm programme-in chhunzawm leh a ni ang.

BCM Headquarters hruaitute hun hman dan tur

1. Rev Dr H Lalthlamuana General Secretary: BCM Ramthar-ah Inrinni aţanga Pathianni zan thlengin hun a hmang ang.

2. Rev R Lalrintluanga AGS – Mission: Inrinni zan aţanga Pathianni zan thleng hian BCM Venghlunah Mission Weekend neiin hun a hmang ang.

3. Rev Vanlalmuankima AGS – Service: Missionary Day (Pathianni zing)ah BCM Theiriat-ah hun a hmang anga, zanah BCM Ramzothlangah hun a hmang leh ang.

4. Rev Joseph Vanlalruata Mission Director: Inrinni zan aţanga Pathianni zan thleng hian BCM Rahsivengah hun a hmang ang.

5. Rev Lalzarliana Khiangte Administrative Officer: Missionary Day (Pathianni zing)ah BCM Farm Vengah hun ahmang ang.

6. Rev T Lalsangvunga Pastoral Director: Missionary Day (Pathianni zing leh zan) BCM Vaisamah hun a hmang ang.

7. Rev K Lalnunsanga Director Worship Department: Zirtawp zan aţanga Pathianni zan thleng hian BCM Chanmari Vengthlangah Mission Crusade neiin hun a hmang ang.

8. Rev Lalhmunsanga Director Communications Department: BCM Kanaan Haulawng-ah Missionary Day (Pathianni zing leh zan) hun a hmang ang.

9. Pu T Nghaksanga Mission Promoter: Missionary Day (Pathianni zing leh zan) BCM Venglaiah hun a hmang ang.

BCM General Secretary Rev Dr H Lalthlamuana chuan Missionary Day hi Zofaten Chanchin Ṭha kan dawn avang leh Chanchin Ṭha avanga Zofaten Chhandamna leh malsawmna kan dawn te hre thar chunga, Pathian hnena lawmthusawi na hun atan hmang turin Kohhran hote a chah a ni.

January 11, 1894-ah Robert Arthington-a tirhin Zosap Missionary hmasa ber Sap Upa leh Pu Buanga te chuan Sairang rawn thlengin Mizoram leilung an rawn rap a. Aizawl-ah kum 3 an awm hnu-ah March 8, 1903-ah Baptist Missionary Society tirh-in Mizoram Chhim lamah an rawn lut leh a, Serkawn, Lungleiah awmhmun an khuar ta a ni. Chanchin Tha lo thlen atanga kum 100-na, Gospel Centenary chu 1994-ah Mizoram pum-ah ropui takin lawm a lo ni ta a, kum 1989-ah Mizoram Sorkar chuan Kohhran pahni PCI leh BCM te ngenna angin January 11 chu Missionary Day-ah puangin heta ţang hian kum tin January 11 chu Sawrkar chawlh 'Misionary Day' atan a lo puang chhunzawm ta zel a ni.

Mizoram-a chanchin tha lo luh dan:

Sap Sipai Officer, Thomas Herbert Lewin (Thangliana) chuan 25th, December 1871 khan Belkhai atanga mel 6 Tuikawi khuaah Krismas hman puiin ngaihnawm takin Lal Isua pian thu hi a lo sawi tawh a. Kum sawmhnih a vei hnu 1891 khan, The Welsh Calvinistic Methodist Foreign Mission hnuaia Khasi Hills Missionary thawk lai Rev. William Williams pawh a thawhna hmun atangin Mizoramah rawn zinin Bible milemte pawh a sem ni awma sawi a ni. Mizote chanchin a lo hriat thawi tawh avangin missionary intirh nan a tha dawn awm em? tih enthlithlai tura lo kal a ni. Thla khat chauh Mizorama awm phalna pek a ni a, a thawhna hmun panin a haw leh ta a ni.

January 11, 1894 khan kan rama Missionary hmasa ber Sap Upa leh Pu Buanga-te chuan Sairang an lo thleng a. Heta tanga chhiar tana a kum za-na, Mizoram Gospel Centenery chu Mizoram kohhran lian pahnih Baptist Kohhran, Presbyterian Church of India, Mizoram Synod leh kohhran dangte chuan lungrual takin Mizoram pum pui huapin 1994 khan an lawm a ni. He hun pawimawh takah hian Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.

Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A AW B leh lehkha chhiar tur min siamsak bakah zirna sikul min dinsakin, lehkha min zirtir bawk a. Kan taksa, rilru leh thlarau tihdamna rawngbawl hna thawkin nun dan mawi leh tha min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin Tha-in min chhan chhuak a, chatuana nunna min pe a. Silh leh fen mumal tak pawh la inbel nachang hre lo, saruak deuh thaw a awm thin kha an rawngbawlna avangin khawvel pum pui huapa inchei dan pangngaiin kan lo inchei ve ta a.

A, AW, B nei lo kha India ram hmar chhak state pariat zingah ziak leh chhiar thiam tamna ber kan lo ni ta reng mai. India ram zau takah pawh a berte zinga mi kan ni ta. Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa ve ta. Ei leh in tur tuihnai engmah nei ngai lo khan Sap Upa leh Pu Buangate rawngbawlna avangin ei tur tuihnai leh tha tak tak kan lo eiin kan lo in phak ve ta. Mizo mipuite chhim leh hmar, chhak leh thlanga miten tun dinhmun kan lo thleng ta hi kan zosapte vang liau liau a ni. Lalpan kan pioneer missionary Sap Upa leh Pu Buanga-te hmangin thil ropui tak min tihsak avangin Pathian hnenah lawm thu i sawi ang u.

Kan ram sorkar, kohhran leh mipui zawng zawngte hian January 11, Missionary Day hi hlut nachang hria ila, kohhran tin ten Pathian hnena lawmthu sawia inkhawmna hun atan i hmang theuh ang u. He hun ropui leh awmze nei takah hian lam thei lam ila, a lawm nan ruai hial pawh theh thei chuan theh ila, kan missionary-te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm hle a, zofate khawvela kan awm ve chhung chu tidanglam lovin hmang chhunzawm zel thei ila a va lawmawm dawn em.

Heng bakah hian Regional Office leh Mission Field hrang hrangah pawh Field Director te kaihhruaina in Missionary leh thawktuten he Ni hi urhsun takin an hmang a ni.

- BCM Khawnvar

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]