Mizoram Lokayukta-in Larsap hnenah Sixth Annual Report thehlut; Mizoram Lokayukta hnuaiah eiruk thubuai 91 ziaklut tawh, 58 chingfel tawh

Aizawl | January 8, 2026: Mizoram Lokayukta Act, 2014 hnuaia Section 47 in a phut angin Mizoram Lokayukta Chairperson Lalmalsawma'n Larsap General (Dr) Vijay Kumar Singh, PVSM, AVSM, YSM (Retd) hnenah vawiin khan Mizoram Lokayukta Sixth Annual Report 2024-2025 a hlan. Annual report hian April ni 1, 2024 leh March ni 31, 2025 inkar a huam a, Mizoram Legislative Assembly thutkhawmah pharh a ni ang.

He hunah hian Mizoram Lokayukta Chairperson Lalmalsawma leh amah tawiawmtu Lalsanglura, Member leh Joel Joseph Denga, Member (Judicial) te chuan Larsap General (Dr) Vijay Kumar Singh, PVSM, AVSM, YSM (Retd) hnenah hian Mizoram Lokayukta dinhmun leh hmalakna tlangpuite an hrilh fiah a. Mizoram Lokayukta hnuaia case neih dan leh bawhzui dante bakah dinhmun leh thlen chinte Larsap hi an hrilh bawk a. Larsap chuan an hmalaknate fakawm tiin, tun aia nasa zawka tan laa theihtawp chhuah chhunzawm zel turin a chah a ni.

Mizoram Lokayukta Sixth Annual report-in a tarlan dan chuan kum 2024-2025 chhung khan Mizoram Lokayukta hnuaiah eiruk thubuai 20 ziahluh niin heng zinga 6 te hi preliminary inquiry tura thawn a ni a. Hemi hun chhung vek hian preliminary inquiry report 8 dawn a ni a, thubuai 5 chinfel niin, thubuai 1 ah mi 2 te thiam loh chantir an ni.

March 2019 a Mizoram Lokayukta din a nih atanga vawiin January ni 8, 2026 thleng hian Mizoram Lokayukta hnuaiah eiruk thubuai 91 ziahluh tawh a ni a. Thubuai 58 chinfel tawh niin, preliminary inquiry leh investigation kalpui mek 33 a awm bawk.

Eiruk thubuai hi engtik lai pawhin a thlawn vekin Mizoram Lokayukta Office MINECO-ah lehkha pheka ziakin emaw, email - Mizoram.lokayukta@mizoram.gov.in ah thlen theih a ni a. Mahni nihna tilang duh lote chu an nihna thup sak thin a ni a, amaherawhchu Lokayukta lam atanga biakpawh theihna tur erawh dah tur a ni.