"Hna hi chu a awm, a ST quota pawh kan hnawh khat zo ngai meuh lo. Kan taihmakna leh tumruhna hian min hruai thleng phak thin lo zawk a ni,"

Serchhip | Dec 17, 2025: Serchhip Govt. College Campus-ah College buatsaih 4th Winter Cum Cultural Fest chu vawiin khan bialtu MLA, Chief Minister Lalduhoma chuan a hawng.

A hawnna inkhawm tawi, College tuala buatsaihah Chief Minister chuan, India rama College endiktu National Assesment & Accreditation Council chuan College tha an tehna hrui pakhatah vantlang tana College luanchhuahna hi a hmang tel a. Kan hriat theuh angin Serchhip College hi NAAC Grade A kawl mektu a ni a, Grade sang zawk hmu tura tan lak chhoh zel a tul avangin vantlang tana Fest changtlung tak neih hi a tha viauin ka hria. He fest hi amah mai pawha Community Activity a nih tawh bakah Fest tanga sum leh pai hmuhchhuahte chu College-a Club hrang hrang ten activity neihna atan in hmang leh dawn niin ka lo hria a. Kawng hnihin College Activity lamah kan hlawkpui dawn a ni, a ti.

Tun hnaiah zirlai naupangte zingah hun ka hmang zauh zauh a. Taihmak leh tumruh a tulzia ka hrilh mawlh mawlh thin. Kumin May thla khan Mizoram chu fully literate state-ah kan inpuang a, India rama a hmasa ber kan ni. Amaherawh chu India ram huap inelna hrang hrangah hnam dangte kan pha lo hle. A chhan ber chu National Exam-ah kan tribal-puite kan tluk loh vang a ni. Hna hi chu a awm, a ST quota pawh kan hnawh khat zo ngai meuh lo. Kan taihmakna leh tumruhna hian min hruai thleng phak thin lo zawk a ni.

Zirlaite tan Mizoram State University kan kalpui thuai dawn a, Mizoram Engineering College, Lungleia mi chu nakkum atanga class tantir kan tum.

Sorkar hna hi a sang tel kan la tawh a, a tling leh tlakte fair takin an lut thin. Thlai thar pangaah Support Price kan pe a, pa taima leh nu taima chuan sum an lalut awk awk mai a ni. Mahni kea din tuma hma la, pawmtlak project neite hnenah a pung awm lo, dahkham ngai bawk si lovin Bana Kaih loan kan pe bawk.

Ruihhlo nasa takin kan nawr tawm a, thalai ngawlvei tam tak kan chhanchhuak a, eizawnna khawp thiamna an neih theih nan Skill training kan pe.

Sorkarin mi taima leh thawkrimte tana hmasawn theihna kawng zau taka kan sial lai hian, thalaite zawk hi in lo inbuatsaih lo vang tih kan hlau a ni, a ti.

Winter Fest hlawhtling tak an neih theih nan duhsakna a hlan a, Fest puala Slogan inphuahsiaka lawmman dawngtute hnenah lawmman a hlan bawk.

Inkhawm kaihruaitu Pu C. Laldintluanga, Principal chuan Festival hawnsaktu Chief Minister chungah lawmthu a sawi a. Kan college zirlai naupangte leh an chhungkua te, Serchhip mipuite ngei pawh hian han hawi thawven an mamawh tih kan hmu a. Zirlai naupangten Fest an buatsaih hian an entreprenuership skill lam a tanpui nasa tih kan hmu leh zel a. Chung thil pawimawh tak takte rilrua hre chungin he fest hi kan buatsaih a ni, a ti.

Dr. Zarzosanga, Organising Secretary chuan report tlangpui a pe a. He fest atan hian budget Rs 5.6 lakh budget kan siam a, Chief Minister hian eng emaw zat min pe a, Winter Fest hmasa ber atang tawh khan kumtin min la tanpui ziah a, kan fest bultumtu hi kan Chief Minister zel hi a ni, tiin lawmthu a sawi a ni.

Pu K. Lalrinchhana, Organising Chairman chuan lawmthu sawiin a hawnna inkhawm hi a khar a ni.