Aizawl | Dec 9, 2025: Mizoram Pradesh Congress Committee (MPCC) Spokesperson Lalbiakzama chuan vawiin chun dar 1 khan Aizawl Press Club-ah thu thar thedarhtute kawmin, "Kan CM zahawmtak pawh hian kan Police te hi ring ngamin lo thlamuanpui tawh teh se," a ti a. "HPC Area ah curfew puan thin khan chhunlam a huam ngailo a, zan inkhawm pawh kha hmun tamtak ah chuan phalsak an ni. Tin, heng hunlai a tuna kan CM in a kal dawn ah Lt.Governor curfew min hlih sak turin ka ngen a tih hi a mak khawp mai. Mizoram State kan ni kha 1987 a ni a, khami hnu kha chuan Lt.Governor kan nei tawh silo a..?" a ti bawk.
.jpg)
PRESS STATEMENT
Dt. 5.12.2025 ah kan CM zahawmtak in Saipum a H.S.A khawmpui a hmanpuina a a thusawi thenkhat bihchian na.
1. Kum 1991/92 HPC te movement vanglai khan Saipum khua Saiphai a tih luihna nen khawm tum an ni a tih hi thu belhchian dawl lo ani. Tih luih na nilo in a duh tan duh thlan theihna siam ani a, sorkar khan rangva leh pawisa thlengin pek a in huam a, Saipum mai nilo in Sakawrdai lam ah te pawh he rawtna hi siam ani. An mahni duhthlan na in chhungkaw engemaw zat chu he rawtna ang hian an pemkhawm ni a hriat a ni.
2. HPC Area ah curfew puan thin khan chhunlam a huam ngailo a, zan inkhawm pawh kha hmun tamtak ah chuan phalsak an ni. Tin, heng hunlai a tuna kan CM in a kal dawn ah Lt.Governor curfew min hlih sak turin ka ngen a tih hi a mak khawp mai. Mizoram State kan ni kha 1987 a ni a, khami hnu kha chuan Lt.Governor kan nei tawh silo a..?
3. MLA inthlan 1993 (?) khan lehkha in vauna te thehdarh chu ani ngei mai a, mahse a thehdarh tu kan nauten an han chhui chian khan MNF Block hruaitute leh an unit te tih ani tih pawh kan chhui chhuak a ni. Block President hi khatih lai khan Kohhran upa ani nghe nghe a..’ Upa tih ah chuan a mawilo mange..’ kan tih khum hial reng a nih kha. Heng thilthleng report te hi tih chhiat a la nih loh chuan kan CID ( SB ) ten an file hlui ah an la kawltha ang.
4. Tin, HPC te kan CM in ZALENNA sual anga a sawi kha a hriatsual a nih hmel, Autonomous District Council an ngen ( Demand) a ni zawk.
5. Kum 1994 ah inremna siam ani a, vanduaithlak tak in he inremna hi HPC te khan an pawm famkim theilo a, ralthuam an rawn tun ah te pawh silai pangai .303 Rifle leh Ulhbun 10 bawr vel leh za chuang zet tui pipe a siamchawp silai te an nih kha. Mizoram sorkar pawhin an inremna ang kha thahnem ngaitak in a bawhzui ta bik lo a. Tichuan kum 1996 ah HPC ‘D’ a lo piang leh ta a ni.
6. Kum 2013 atangin Mizoram sorkar leh HPC ‘D’ te remna zawngin an in bia a, mahse HPC ‘D’ lam ten ADC an demand tlat vangin hma kan sawn thei ta lo a. Heng hunlai hian Mizoram NGO hrang hrang leh political party te pawn Mizoram chhunga hnam bil ADC siam kha an remti theilo, tin, kan hriat a tan a tul chu State sorkar hian 6th Schedule hnuaia ADC siam turin thuneihna a neilo tih hi a ni. ( Kum 1972 UT kan nih khan chhimlam ADC pathum tih loh chu 6th Schedule atanga lak chhuah kan ni a. Mahse Minority te min hum duhtu INC chuan nikum MP inthlan dawn Manifesto ah khan Tribal te a hlawma an awmna te 6th Schedule a rin luh leh min tiam a sin. BJP te erawh chuan min paldarh leh pawlhdal zawng hlir in hma an la anih hi )
7. A tawi zawngin sawi ila, Demand Area chhunga mipuite mangang authawm vangin NGO a bikin Central YMA leh Demand area chhung YMA branch te ngenna vangin State sorkar pawhin zaizap in HPC ‘D’ te biak leh a remti a mahse ADC demand tawh bik lo se ti in thu delhkilh siam ani a. HPC ‘D’ lam ten ADC demand lo a inremna zawnga inbiak an duh ve tak ah chuan Mizoram sorkar nen tluangtak a inbiakna chhunzawm in 2nd April 2018 ah inremna kan lo neithei ta anih kha. Tin, inremna kan sign hma khan Act leh Rules te peih fel vek ani bawk. Engtik lai khan nge kan CM sawiang a Act awm silo a Rules chauh nei a Shinlung Hills Council hi engtia lo din nge anih kei chuan ka hre lo.
8. Hetia HPC ‘D’ leh Mizoram sorkar inbiakna ah hian Mizoram aiawh Team Leader ah ruat ka ni a. Khatia kan inbiak chhung zawng khan tuna kan CM zahawmtak Pu Lalduhoma hian vawikhat mah rawn inrawlhna a neih ka hrelo a, amah leh a party hian engmah an rawn nawrpui awm pawh ka hrelo. Kan inbiakna tum khat, engtik ber kha nge ka chiangta lo a, HPC ‘D’ palaite khan Pu Lalmuanpuia Punte hi an spokesperson anga a tel ve phalsak turin min rawn dil a, kan remtih sak.
9. Dt.5.12.2025 a Saipum khua a kan CM in HPC ‘D’ te nen inremna zawngin kan inbe mek a rawn ti leh ta mai hian min barakhaih deuh a. HPC ‘D’ te nen kan inbiak hlawhtlin dawn hnaih lam ah khan Cachar Hmarkhawlien chhehvel Tuirial leh Serlui chhuah a vaiho mau tawlh te hnen atanga chhiah khawn a eizawn nan hmang, HPC ‘D’ Demand chungchang pawh ngaihsak lem lo, Pu Lalhmingthanga Sanate leh a hote 10 rual vel, silai pahnih / pathum kawl an chetla ve a. Hengho te pawh hi tuna kan inremna ah hian rawn tel ve nghal mai se kan tih khan, an in la Rotekawlasepa ve tlat mai a. Amah pawh ka ko a, a hote zinga mi aiawh a rawn tir a,mahse HPC ‘D’ hotute nen an in hmuh thiam loh lak lawh bang te pawh a niang,an tel ve duh ta lo a ni. Khatiang a lo nih tak ah chuan Mizoram chhungah buaina siam zawnga an rawn khawsak chuan kan dimdawi dawn miah lo tih hre rawh u.. ‘ ti in thu ka chah nghe nghe a ni. HPC ‘D’ lam hotute pawh khan ‘Mizoram chhungah a kawhmawh bawl zawnga an rawn khawsak chuan keimahnin kan lo zilh hau mai ang’ an ti ve bawk.
10. Tunah hian enge an DEMAND? Mizoram chhungah buaina an rawn siam em? Mipui tan hnawksak siamin an rawn ti thlabar em? Chutiang a lo awm anih chuan sorkar hian engtin nge hma a lak tawh? Chutiang ni silo a hetia kan sorkar leh kan CM berin a lo chawtak khukpui chiam mai hi a fuh ber em.. ? Sinlung Hills Council piah lam enge pek belh tur a nei em ni? Nge a duh leh hman nazawng Peace Accord kan sign pui zel mai dawn em ni? Chuvangin Lalhmingthanga Sanate leh a hote uihum lek hian an duh anih chuan an ralthuam kawl angang nen rawn in surrender se Rehabilitation package phal tawk lo pe ila a tawk viau mai. Hetia sorkarin a khukpui chiam chiam chuan Rehabilitation sum beisei in an rawn in sawi tam belh khawp ang. Tun thleng pawh hian ka la ti thin Mizoram chhunga buaina siam zawnga an rawn chet vaih chuan.. Mizoram police a kan naute hian an hrechiangin a tul phawt chuan duh hun hun ah an kamkhat thei tih hi ka chiang khawp mai. Kan CM zahawmtak pawh hian kan Police te hi ring ngamin lo thlamuanpui tawh teh se.
Tunhma hun harsa kan lo paltlang tawh te kha theihnghilh lo in inzir nan hman a tha in a tul a. Mahse thumuhnu kaitho zawng leh Mizote inkar a rilru in tih nat sak thei zawnga belhchian dawl lem lo thusawi hi chu sim a tan a tha khawp mai.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: