PATHIAN REMRUAT CHU A ṬHA ZAWK FO

_Isua Tih Danin_

- Rick Warren 

- Nov 3, 2025

_"Mita hmuh ngai loh, benga hriat ngai loh, Mihring rilrua lut ngai lo, Pathianin a hmangaihtute tan a buatsaih apiangte chu."_ (1 Kor. 2:9)

Mahnia ruahmanna i siam ai khan Pathian ruahmanna chuan rah duhawm a chhuah zawk zel ang.

Chu chu he khawvel damchhunga lawmman chauh hi a ni lo. Chu chu a ken tel pakhat chauh a ni, mahse thil ropui zawk chu Pathian ruahmanna chu chatuan atana hlawkna a nih hi. 

Pathian ruahmanna leh i tana kawng a buatsaih aṭangin hringnuna hlutna leh lungawina a lo thleng ṭhin. Mahse Pathian remruat anga awm hi vanrama lawmman dawnna kailawn a ni bawk. 1 Kor. 2:9-ah chuan heti hian kan hmu, _"Mita hmuh ngai loh, benga hriat ngai loh, Mihring rilrua lut ngai lo, Pathianin a hmangaihtute tan a buatsaih apiangte chu."_

A remruatna anga i awmin Pathianin nangmah kaltlanga thil a tihtum i hrethiam phak lovang. Pathianin a ruahmanna te hmuh dawn ta che sela  mak tiin i lawm viau ang. Engtinnge mi naran mai hi thil harsa tak tak pawh tithei tura a hman tiin mak i ti ang. Mahse a remruat leh a thiltih dan kawng zawh i thlan a duh a ni. Amah thlang turin a duh che.

Kan duhthusam ṭhenkhatte chu ṭha ve deuh an ni, mahse duhthusam dik lo kan nei ṭheuh. Pathian kawng kan thlan loh chuan kawng ṭha ber kan hre ngai lovang.

Leia Isua nu leh pa, Mari leh Josefa kha han ngaihtuah teh. Pathianin an hnenah a ruahmanna a hrilhhriat hma khan ruahmanna ṭha tak an lo neih ve ngei a rinawm: inneih a, fate neih a, Pathian rawngbawl. Mahse chung an ruahman te chu an chunga Pathian ruahmanna nen khaikhin rual a ni lo. Pathian duhzawnga an inpek chinah chiah Pathian ruahmanna kha eng ang taka lian nge anih- chu chu khawvel tan eng ang taka malsawmna nge anih tih an hre ve chauh.

Pathian remruatna chu i remruatna aiin a ṭha zel a, a lian zawk zel bawk. Pathianin i nun a kaihhruai duh dan anga i inpek loh chuan i ngaihtuahna a zau tawk lo tihna a ni. He khawvelah hian i tan thil ṭha tak a dah a, nakina hun lo la awm tura a dah phei chu a lian leh zual.    

Mahse Pathianin a ruahmannaah chuan duhthlanna a pe che, a remruat anga i awm duh leh duh lohah. Mi tam tak chuan anmahni remruat anga kal an duh avangin an tana Pathianin a ṭha ber a lo dah chu an tawng lo ṭhiin.

Nun awmze nei, nun hlawhtling neih i duh chuan heti hian ṭawngṭai rawh: "Lalpa, ka duh dan ni lovin i duhdanin ka nunah lo che rawh. Ka tana thil ṭha ber i ruahmanna kawngah chuan min hruai la, tichuan i rawngbawlin ka hmangaih thei ang che."

Ngaihtuah zui atan.

* Engtinnge Bible hian thutlukna dik siam tura a puih che? Engtinnge Thlarau Thianghlimin a ṭanpui che?

* I nunah eng duhthusam nge i neih len ber theih? Chumi chu Pathianin i tawn a phal em tih i zawt tawh em?

* Engvangin nge Pathianin i ruahmanna anga kal chungchangah duhthlanna a pek che ni a i rin?

*[Lettu: Sangpuia]*