Mizoram State University Demand Committee Lunglei (MSUDCL) hruaitute'n kohhran hruaitute kawm chhunzawm

Aizawl | Nov 5, 2025: Mizoram State University Demand Committee Lunglei chuan Vawiin ni 5 November, 2025 khan Presbyterian Church of India Lunglei Administrative Secretary Rev H Lalhmingmawia kawmin, Mizoram State University Lunglei-a din a nih theih dan tur chungchang an sawipui.

Mizoram State University Demand Committee Lunglei (MSUDCL) hruaitute chuan State University chungchanga hma an lak tawhna leh an hmachhawp hrang hrangte an sawi a, India ram hmun dang ten an State University an kalpui dan leh zirna kawngah hmasawnna rualkhai zawk a awm theihna atan an State khawpuiah kher an dah loh thute sawiin zirchianna an neih tawh atangin Lungleiah Mizoram State University hi a dah theih ngei tih an hriat thu an sawi a. Chhim lam zirlaite tan leh Mizoramah rualkhai zawk a zirna kawnga hmasawnna a thlen theihna atan State University chu Lungleiah din a tul thu sawiin, Demand Committee hmalakna thlawp turin an ngen a ni.

Presbyterian Church of India, Lunglei Administrative Secretary Rev H. Lalhmingmawia pawhin Lungleia Mizoram State University dah chungchang chu mimal tak pawh a alo ngaihven thu leh Mizoramah hmun khatah ringawt hmasawnna thlen tir a ni thin chu Mizo mipuite tan a thil pawi tak anih thu, Demand Committee hruaitute hi alo hrilh a. Zirna piah lamah kawng chungchangah pawh Mizoram Chhim lam chu a hnufual hle nia a hriat thu sawiin Rev.H. Lalhmingmawia chuan Lungleiah State University a awm a nih chuan inkalpawhna kawngpui tha zawk a hrin chhuah a beisei thu a sawi a, hmasawnna kawng hrang hrang thenrual anih loh chuan Mizoram ram zimte chu aia zim zawka sawr tet zel a hlauhawm thu sawiin Demand Committee hmalakna chu theihtawp a thlawp a, tawngtaina lamah te an lo hriatreng tur thu a sawi a, Chutih rualin Kohhran an nih anga an tih chin turte lo hriatthiam sak turin Demand Committee chu a ngen bawk a ni.

Vawiina Presbyterian Church of India Lunglei AS an kawm naah hian State University Demand Committee hruaitute hi MJA Lunglei President Pu H.Lalthansanga leh Chhimbial Chhantu President Rev. F. Sangvela te’n an tawiawm a ni.

Mizoram State University Demand Committee Lunglei hian Presbyterian Church of India Lunglei Administrative Secretary bakah Mizoram Baptist Kohhran hruaitute leh UPC NEI District Hqrs Lunglei hruaitute an kawm tawh a, Kohhran hrang hrang hruaitute kawm chhunzawm zel an tum bawk.