Minister Dr Vanlalthlana'n Champhaiah 'Meet Your Minister' programme hmang

Champhai | Nov 27, 2025: Education Minister Dr Vanlalthlana chuan vawiin khan Education Training Hall, Champhaiah "Meet Your Minister" programme hmangin sikul naupangte nen inkawmna hun a hmang.

Minister Dr Vanlalthlana chuan zirlaite chu fuihin lehkhabu chhiar tam turin a fuih a, eng lehkhabu pawh an chhiar chuan thiamna leh finna an chhar chhuak zel a ni tih a hrilh a. Scientist ropui Thomas Alva Edison pawh vawi tam tak a hlawhchham hnuah thil ropui tak tak a siam chhuak a, thil siam thiam James Dyson pawh vawi tam tak hlawhchham hnuah mi hausa tak a ni tawh a, actor Sylvestor Stallone pawh harsatna tam tak paltlang hnuah khawvel mi lar a ni tawh a, heng mi ropui tak tak te ang hian engpawh tawn tlangin mi ropui an ni ve thei tih a sawi a. Chutiang thleng tur chuan taimakna leh tumruhna nen mahni kalna lam zir leh thiam tum a tul a, intihhlimna khawvelah rilru fim leh ngaihtuahna tha neih a tul thu a sawi a, social media pawh mahni hmasawn nana hmang hram turin a chah a ni.

Minister chuan thu a sawi zawh hian naupangte zawhna chhangin fuihna thu a sawi chhunzawm a, sawrkar policy chungchang te, Education Department thil tum hrang hrang te a sawi bawk. Director of School Education Angela Zothanpuii, SCERT Joint Director Zoramthangi Ralte leh Samagra Shiksha State Project Director C Lalthanzira te'n thu an sawi bawk.