Lurh tlang Vavu Sanctuary hawng; Vavu puilting 20 awm mek!

Aizawl | Nov 22, 2025: Farkawn Village Council, All NGO’s Farkawn leh Conservation Mizoram te hmalakna a din, ‘Lurh Tlang Vavu Sanctuary, Farkawn’ chu November 21, 2025 Zirtawpni khan Champhai DFO Lalbiakchama, IFS in Lurh Tlangah a hawng.

Lurh Tlangah hian Mizoram State Bird, Vavu (Mrs Hume’s Pheasant) te hi an population a ṭha pangngai hle a hriat a ni a, kumin May – September inkara chhinchhiah theih zar chu - a puitling 20 (a pa pariat 8 leh a nu 12) leh a no 8 te a ni.

Heng lo pawh hi Bualpui tlang dung leh Lurh kawng chung tlangdungah te pawh hmuh ṭhin an ni bawk. Khawtlang hruaitute leh Conservation Mizoram te’n a humhalh hna thawkin, zirchianna kalpui mek zel a ni a, Vavu te hi nungcha mang mai hlauhawm dinhmuna ding mek niin, humhalh ngai tawh tak an ni.

Sanctuary hawngtu Lalbiakchama, IFS chuan Vavu pawimawhna te, State Bird a nihna leh kan rama an tlem tawh zia te sawiin community Sanctuary te siama humhalh a tul zia te sawiin, Farkawn khua ten an humhalhna avangin lawmthu a sawi a; department te, mipui te, Conservation NGO te hmalak ho a, humhalh hna tha tak a thawhho zel pawimawh zia a sawi. Biodersity a kan hausak zia te sawia Lurh Tlang chhehvel hi dan hmanga humhalh tlat a ni tih te a sawi a, kan ram hausak zia te sawiin a ram mi ten a hlutna kan hriat deuh deuh a, humhalh hna kan thawh a tul thu a sawi a. Kan ram hausakna Biodiversity te hi a hlutzia hria a,humhalh a tul zia a sawi bawk.

A theih chin chinah development te pawh biodiversity te tichhe lo zawnga hma lak a tul thu te, humhalh hna te nasa zawka thawh a tul thu uar taka sawiin Lurh Tlang Vavu Sanctuary, Farkawn kal zel na torah duhsakna a hlan a ni.

Lurh tlang Vavu Sanctuary, Farkawn hi Sanctuary Managing Committee te’n mumal taka enkawl tura ruahmanna siamin, inkaihhruaina fel tak siam a ni a. A tlawhtu tur te’n Sanctuary Managing Committee te biak hmasak zel tur a ni ang.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]