Govt Khawrihnim Primary School kum 100-na lawm; "zirnain hma a sawn theih nan tun session-a third term atangin zirlaiten zawhna inang an chhang dawn," ~ Dr Mathlantea

Aizawl | November 22, 2025: Government Khawrihnim Primary School chuann vawiin khan an Centenary an tual zawlah an hmang a, School Education Minister Dr Vanlalthlana'n hmanpuiin, Centenary hriatrengna lung a hawng.

Minister chuan he hunah hian thusawiin Govt Khawrihnim Primary School kum za a tling ta chu a lawmpui thu a sawi a, he school atanga mi chhuanawm tak tak an chhuak chu lawmawm a tih thu a sawi.

Dr Mathlantea chuan zirna lama tan lak a tul thu sawiin khawtlang hruaitute, tlawmngai pawlte leh nu leh pate tanrual a ngai a, veng chhung an tanrual chuan MLA te pawhin an hawisan thei lova, sorkar leh mipuite tanho a ngai a ni, a ti.

Minister chuan Social media-in khawpui leh thingtlangte pawh min run nasa a, in awm tlei nan kan hmang nasa a, Smartphone leh TV te khawih chin tawk neih a ngai a ni a ti. Nu leh pate hian hmasawnna thil chi hrang hrang kan neih hian mawhphurhna kan neih belh zel tih kan hriat a ngai a ni a ti a. Nu leh pate chu an fate thil zir ngaihvenpui turin a chah a. Zirtirtute pawh thil thar hmu chhuaktu leh siamchhuaktu an ni a, syllabus mila thil thar zirtir thei ni turin a chah bawk.

Minister chuan, kan ram zirnain hma a sawn theih nan tun session-a third term atangin zirlaiten zawhna inang an chhang dawn a, Government, Deficit leh Adhoc Grant in aid school Class V - VIII zirlaiten an chhang dawn a, hei hian zirnaah danglamna a siam ang tih a beisei thu a sawi.

Khualzahawm Pachhunga University College Principal Prof H Lalthanzara pawhin he hunah hian souvenir a tlangzarh a, thusawiin zirna lama tan lak a pawimawhzia leh khawtlang nu leh pate pawhin zirna boruak tha siam a ngaih thu a sawi a, he sikul hi a zir chhuahna a nih thu leh hmasawn zel tura a duhsak thu a sawi bawk.

School Education Department Director Angela Zothanpuii, SCERT Director Caroline Zoramthangi leh Samagra Shiksha State Project Director C Lalthanzira te pawhin Centenary lawmpuina thu an sawi bawk.

Govt. Khawrihnim Primary School hi kum 1901 khan thingtlanga school enchhin 3 zingah a tel a. Kum 1925 atangin chhum lo chat lova kalpui a ni a, Headmaster hmasa ber chu Chalsuakpuia a ni a, tun thlenga he sikula thawk tawh te chu zirtirtu 17 an ni a, kumin hian zirlai 51 an awm mek a ni.

Govt Khawrihnim Primary School Centenary lawmna an sikul tuala neihah hian Minister hi School Education Officerten an tawiawm a. He sikula lo thawk tawh leh thawk mek te, Zirlaite leh zir chhuak tawh te, khawtlang hruaitute leh nu leh pate an kalkhawm a ni.